ހިލޭ ޑިގްރީގެ ސަބަބުން އިލްމީ، ހޭލުންތެރި ޖީލެއް ބިނާވެގެންދާނެ: ހަޔަރ އެޑިއުކޭޝަން މިނިސްޓަރު

ސަރުކާރުގެ ހިލޭ ޑިގްރީ ޕްރޮގްރާމުގެ ސަބަބުން، އިލްމީ، ހޭލުންތެރި ޖީލެއް ބިނާވެގެންދާނެ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.

"ރާއްޖެޓީވީ" ގެ ފަށާއިރު ޕްރޮގްރާމަށް ދެއްވި ހާއްސަ އިންޓަވިއުއެއްގައި މިނިސްޓަރު ވިދާޅުވީ މި ސަރުކާރުން ހަޔަރ އެޑިއުކޭޝަން މިނިސްޓްރީއެއް އުފެއްދުމަކީ ދިވެހިންނަށް މަތީ ތައުލީމުގެ ފުރުސަތުތައް ފަހިކޮށްދިނުމަށް ދޭ އިސްކަން ދޭހަކޮށްދޭ ކަމެއް ކަމަށެވެ. އެ މިނިސްޓްރީން ކުރަނީ ވަރަށް މުހިންމު މަސައްކަތްތަކެއް ކަމަށާއި އެ މަސައްކަތް ގުޅިފައިވަނީ ގިނަ ބައެއްގެ ދިރިއުޅުމާއި ރާއްޖޭގެ ތަރައްގީގެ ދުވެއްޔާ ގުޅިފައިވާ މަސައްކަތްތަކެއް ކަމަށް ވެސް މިނިސްޓަރު ފާހަގަކުރެއްވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ސަރުކާރަށް ހަތަރު އަހަރު ފުރިފައިވާއިރު މި ސަރުކާރުގެ އެންމެ ބޮޑު އެއް ކާމިޔާބީއަކީ ހިލޭ ފުރަތަމަ ޑިގްރީއާ ހަމައަށް ކިޔެވޭ ގޮތް ހެދުން ކަމަށެ މިނިސްޓަރު ވިދާޅުވިއެވެ. މި ސްކީމުގައި މިހާތަނަށް 15،500 އަށްވުރެ ގިނަ ދަރިވަރުން ބައިވެރިވެފައިވާއިރު 9،000 އަށްވުރެ ގިނަ ދަރިވަރުން މިހާރު ވެސް ކިޔަވަމުންދާ ކަމަށް ވިދާޅުވިއެވެ.

މި ސްކީމުގެ ފައިދާ ދުވަސްކޮޅެއް ފަހުން ފެންނާނެ ކަން ފާހަގަކުރައްވައި މިނިސްޓަރު ވިދާޅުވީ މި ސްކީމްގެ ދަށުން އިލްމީ، ތައުލީމަށް ލޯބި ކުރާ އަދި ހޭލުންތެރި ޖީލެއް ބިނާވެގެންދާނެ ކަމަށެވެ. އަދި ކޮވިޑު-19ގެ ފުރަބަންދުގެ ތެރޭގައި އިޖުތިމާއީ މައްސަލަތައް ފަހަގަކުރެވިފައިވާއިރު ގިނަ ދަރިވަރުންތަކެއް ހިލޭ ޑިގްރީގެ ދަށުން ކިޔަވާތީ އެކަމުގައި އަވަދިނެތި އުޅެން ޖެހުމުން އެ މައްސަލަތަކުން ސަލާމަތްވި ކަން ވެސް މިނިސްޓަރު ފާހަގަކުރެއްވިއެވެ.

ހިލޭ ޑިގްރީގެ ސަބަބުން ދަރިވަރުންގެ އިތުރުން ފުރަތަމަ ޑިގްރީއަށް ކިޔަވައިދޭ އަމިއްލަ ކޮލެޖާއި ޔުނިވަރސިޓީތަކަށް ވެސް ވަރަށް ބޮޑު ފައިދާއެއްވާކަމަށް މިނިސްޓަރު ފާހަގަކުރެއްވިއެވެ. އެގޮތުން، ދަރިވަރުން ދައްކަން ޖެހޭ ކޯސްފީ، އެކި ސަބަބުތަކާހުރެ ނުދެއްކޭ ކަމުގެ ޝަކުވާ މީގެ ކުރިން ކޮލެޖުތަކުން ކުރި ކަމަށާއި ނަމަވެސް މިހާރު އެ ފައިސާ ލިބޭނެ ކަމުގެ ޔަގީންކަން އެތަންތަނަށް އޮންނަ ކަމަށް ވިދާޅުވިއެވެ.

ސަރުކާރުން ފެށި ހިލޭ ޑިގްރީ ސްކީމާއެކު ޕްރައިވެޓް ކޮލެޖުތަކުގައި ފުރަތަމަ ޑިގްރީއާ ހަމައަށް ކިޔަވާ ދަރިވަރުން ކުރަން ޖެހޭ ޚަރަދު ކުރިއާ އަޅާބަލާއިރު ވަރަށް ބޮޑުތަނުން ކުޑަވެފައިވާ ކަމަށް ވެސް މިނިސްޓަރު ފާހަގަކުރެއްވިއެވެ.

މީގެ އިތުރުން، އޭލެވެލް އިން ތިން މާއްދާއިން ފާސްވާ ދަރިވަރުންނަށް ލިބޭ ސްކޮލަރޝިޕްގެ ފުރުސަތުތައް ވެސް މިހާރު ގިނަވާނެ ކަމަށާއި ކުރިއާ އަޅާ ބަލާއިރު އެކި ދާއިރާތަކުން ސަރުކާރުން ހުޅުވާލާ ސްކޮލަރޝިޕްގެ ފުރުސަތުވެސް އިތުރުވާނެ ކަމަށް މިނިސްޓަރު ވިދާޅުވިއެވެ.