މަޖިލީހުގެ 67 އިންސައްތައަކީ ބޮޑު އަގުލަބިއްޔަތެއްކަމަށް ރައީސް ނަޝީދަށް ގަބޫލުކުރައްވަން ދަތި!

ޓެކްސް ބޮޑުކުރުމަށް މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހުގެ ގެނައުމުގެ ބިލު 67 އިންސައްތަ ވޯޓާއެކު ވެސް ފާސްވެފައިވަނީ ހަނި އަގުލަބިއްޔަތަކުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވެފައިވަނީ، ޓެކްސް ބޮޑުކުރުމަށް ހުށަހަޅާފައިވާ މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހަށް ވޯޓަށް އެހުމަށް 2 ފަހަރެއްގެ މަތިން އެޖެންޑާކުރުމަށްފަހު، އެ ބިލަށް ވޯޓަށް ނާހާ، ބުދަ ދުވަހުގެ ޖަލްސާފައި އެ ބިލު މަޖިލީހުގެ 55 މެންބަރުންގެ ބޮޑު އަގުލަބިއްޔަތަކުން ފާސްކުރުމާއި ގުޅިގެންނެވެ.

މިކަމާއި ގުޅިގެން ރައީސް ނަޝީދު ވިދާޅުވީ މިބާވަތުގެ ގާނޫނުތަކާއި ބިލްތަކަށް ގާނޫނު އަސާސީން ވަރަށް ބޮޑު އަގުލަބިއްޔަތެއް ލާޒިމްކުރައްވާކަން މެންބަރުން ވިސްނައިފިއްޔާ އެނގިވަޑައިގަންނަވާނެ ކަމަށެވެ. އަދި މިއަދު ސަރުކާރުން ހުށަހެޅި ގޮތަށް ބިލްވަނީ ފާސްވެފައި ކަމަށާއި، އެކަމާ އެއްވެސް ބޭފުޅަކު ޝައްކެއް ނުކުރައްވާނެ ކަމަށެވެ. އެހެންނަނަމަވެސް އެމަނިކުފާނު ދެކެވަޑައިގަންނަވާ ގޮތުގައި، ބިލު ފާސްވި ހަނި އަގުލަބިއްޔަތު ސަރުކާރުން ބައްލަވާނެ ކަމަށެވެ.

މަޖިލީހުގެ ރައީސާއި، އެމަނިކުފާނަށް ތާއިދުކުރައްވާ އެމްޑީޕީގެ މެންބަރުން އަދި އިދިކޮޅު މެންބަރުން ދެކޮޅު ހަދަމުންދިޔަ އިސްލާހު ފާސްކޮށްފައިވަނީ ބުދަ ދުވަހުގެ ޖަލްސާގައި ވޯޓުގައި ބައިވެރިވެވަޑައިގެންނެވި 81 މެންބަރުންގެ ތެރެއިން 55 މެންބަރުންގެ ބޮޑު އަގުލަބިއްޔަތަކުންނެވެ. މި ބިލާ ދެކޮޅަށް ވޯޓު ދެއްވީ 26 މެންވަރުންނެވެ.

ބިލު ފާސްކުރުމަށް 44 މެންބަރުންގެ ވޯޓު ބޭނުންވާ އިރު، ބިލު ފާސްވީ 55 މެންބަރުން ނުވަތަ 67.07 އިންސައްތަ މެންބަރުންގެ ބޮޑު ތާއީދަކާއެކުއެވެ.