ހައިކޯޓުގެ ތާރީޚުގައި ފުރަތަމަ ފަހަރަށް 3 އަންހެން ފަނޑިޔާރުންގެ ބެންޗެއްގެ ޝަރީއަތެއް
16 ނޮވެމްބަރު 2022 | ބުދަ 05:54މި ޝަރީއަތް ހިންގާފައިވަނީ ބުދަ ދުވަހު
ހައިކޯޓުގެ ތާރީޚުގައި ފުރަތަމަ ފަހަރަށް، 3 އަންހެން ފަނޑިޔާރުންގެ ބެންޗަކުން ޝަރީއަތެއް ހިންގުން
ހައިކޯޓުގެ ތާރީޚުގައި ފުރަތަމަ ފަހަރަށް، 3 އަންހެން ފަނޑިޔާރުންގެ ބެންޗަކުން ޝަރީއަތެއް ހިންގައިފިއެވެ.
މި ޝަރީއަތް ހިންގާފައިވަނީ ބުދަ ދުވަހުއެވެ. އެގޮތުން މި ޝަރީއަތުގެ ބެންޗުގައި ހިމެނިވަޑައިގަންނަވަނީ ފަނޑިޔާރު އަލްއުސްތާޛާ ފާޠިމަތު ފަރުހީޒާ، ފަނޑިޔާރު އަލްއުސްތާޛާ ޙުޒައިފާ މުޙައްމަދު އަދި ފަނޑިޔާރު އަލްއުސްތާޛާ ދީބާނާޒް ފަހުމީއެވެ.
ތިން އަންހެން ފަނޑިޔާރުންގެ ބެންޗަކުން ކުރިއަށް ގެންދެވި މި މައްސަލައަކީ ރަހުނު ހިމެނޭ ލޯނާއި ގުޅޭ 3 ގަޒިއްޔާއެކެވެ. ނަޒާކީ އެލޫމިނިއަމް ޕްރައިވެޓް ލިމިޓެޑް، ނަޒާކީ ސަރވިސް ޕްރައިވެޓް ލިމިޓެޑް އަދި މުޙައްމަދު ޒަކީ، މ.އަޙްމަދީއާބާދު / ކ.މާލެ ގެ ފަރާތުން ދައުވާކުރި މި ގަޒިއްޔާތަކުގައި ދައުވާލިބޭ ފަރާތަކީ ދަ މޮރިޝަސް ކޮމަރޝަލް ބޭންކް (މޯލްޑިވްސް) ޕްރައިވެޓް ލިމިޓެޑްއެވެ.
މި ގަޒިއްޔާތަކަކީ ސިވިލް ކޯޓުގެ ނިންމުންތަކެއް ހައިކޯޓުގައި އިސްތިއުނާފު ކުރުމުން ބަލާފައިވާ ގަޒިއްޔާތަކެކެވެ. އަދި މި މައްސަލައިގެ އަޑުއެހުންތައް މިހާރު ނިމިފައިވާއިރު، ބުދަ ދުވަހުގެ އަޑުއެހުމަކީ މި މައްސަލައިގެ ބެންޗު ބަދަލުވެފައިވާތީ އިޖުރާއީ ގޮތުން ކުރިއަށް ގެންދެވުނު އަޑުއެހުމެކެވެ. އެގޮތުން މި އަޑުއެހުމުގައި ދެފަރާތުން ވަނީ މައްސަލަ ގޮސްފައިވާ ހިސާބާއި ގުޅޭގޮތުން ޝަރީއަތަށް ޚުލާސާ ކޮށްދީފައެވެ.
ހައިކޯޓުގައި މިހާރު 11 ފަނޑިޔާރުން މަސައްކަތް ކުރައްވައެވެ.
