އެމެރިކާގެ ރައީސް ޖޯ ބައިޑަންއާއި ޗައިނާގެ ރައީސް ޝީ ޖިންޕިންގ ވަނީ ދެބޭފުޅުންގެ ފުރަތަމަ ސީދާ ބައްދަލުވުން މިއަދު މެންދުރެއްހާއިރު އިންޑޮނީޝިޔާގެ ބާލީގައި ބާއްވަވާފައެވެ. ދެބޭފުޅުން އިންޑޮނީޝިޔާއަށް ވަޑައިގެންނެވީ، މާދަމާ އެގައުމުގައި ފެށޭ ޖީ20 ސަމިޓްގައި ބައިވެރިވެ ވަޑައިގެންނެވުމަށެވެ.

ހޮޓަލުގެ ފެންޑާމަތިން ދެބޭފުޅުން ވަނީ ސަލާމްކުރައްވާފައެވެ. އަދި އެއަށްފަހު ބައްދަލުވުން އޮންނަ މާލަމަށް ވަޑައިގެންފައިވެއެވެ.

ބައްދަލުވުން ފެއްޓެވުމުގެގޮތުން ދެއްވި ރިމާކްސްގައި ޖޯ ބައިޑަން ވަނީ، އެމެރިކާއާ ޗައިނާއާ ދެމެދު ދެބަސްވުން ކުޑަކުރުމުގެ މުހިންމުކަމުގެ މައްޗަށް އަލިއަޅުވާލައްވައި ވާހަކަފުޅުދައްކަވާފައެވެ.

ޓައިވާނަކީ އެންމެ ދެބަސްވުން އުފެދޭ މައުލޫކަމަށްވާއިރު، ޓައިވާންގެ ކަންކަމުގައި ދެފަރާތުންވެސް "ރަތްރޮނގު" ކަނޑައަޅާނެކަމަށް ބައިޑަން ވިދާޅުވެފައި ވެއެވެ.

ރައީސް ޝީވެސް ވަނީ، މިއީ ޑާވޯސްގައި މީގެ 5 އަހަރުކުރިން ދެބޭފުޅުން ބައްދަލުވެވަޑައިގެންނެވިފަހުން ބާއްވަވާ ފުރަތަމަ ބައްދަލުވުންކަން ފާހަގަކުރައްވާފައެވެ. އަދި ބައިޑަން ރައީސްކަމަށް ވަޑައިގެންނެވިފަހުން މުޅިވެސް ބައްދަލުވެވަޑައިގެންފައިވަނީ އޮންލައިންކޮށްކަން ފާހަގަކުރައްވައި، ސީދާ ބައްދަލުވުން އަބަދުވެސް ތަފާތުވާނެކަމަށް ވިދާޅުވެފައިވެއެވެ. އަދި އެމެރިކާއާ ޗައިނާގެ ގުޅުން ކުރިޔަށް ދާންވީ ސީދާ މަގު ކަނޑައަޅައި، އަދި ގުޅުން އިތުރު ހަރުފަތަކަށް ގެންދެވޭނެ ގޮތްތައްވެސް ބަލަންޖެހޭކަމަށް ވިދާޅުވެފައި ވެއެވެ.

ޖީ20 ސަމިޓަށް ބާލީއަށް ވަޑައިގެން އުޅުއްވާ ލީޑަރުން މިއަދު ގެންދަވަނީ ވަކިވަކި ބައްދަލުވުންތައް ބާއްވަވަމުންނެވެ. މިއަދު މެންދުރުވަނީ އިނގިރޭސި ބޮޑުވަޒީރު ރިޝީ ސުނަކްވެސް އިންޑޮނީޝިޔާއަށް ވަޑައިގެންފައެވެ.

ޖީ20 ޖަމާއަތުގައި ހިމެނޭ 19 ގައުމުން ދުނިޔޭގެ އިގްތިސާދީ އައުޓްޕުޓްގެ 85 އިންސައްތަ، އަދި ވަރލްޑް ޓްރޭޑްގެ 75 އިންސައްތަ ހިއްސާ ކުރެއެވެ. ދުނިޔޭގެ އާބާދީގެ ތިންބައިކުޅަ ދެބައި ނިސްބަތްވަނީ މިގައުމު ތަކަށެވެ.

ރަޝިޔާ ތަމްސީލް ކުރައްވަނީ ފޮރިން މިނިސްޓަރ ސަރުގޭ ލަވްރޯވް އެވެ. ލަވްރޯވް ކުއްލި އާލާސްކަންފުޅެއްގައި ހޮސްޕިޓަލަށް ގެންދެވުނު ޚަބަރުތަކެއްވެސް ފެތުރިގެން ދިޔައެވެ. ނަމަވެސް އެކަން ވަނީ ރަޝިޔާގެ ފޮރިން މިނިސްޓްރީން ދޮގުކޮށްފައެވެ.