ހަނދަށް ދާން ބޭނުމީވިއްޔާ، އިހަށް ދާންވީ ލަންޒަރޯތޭއަށް!

ސްޕެއިންގެ އިދާރީ ދާއިރާއެއްގެ ގޮތުގައި އެ ގައުމުން ވެރިކަން ހިންގަމުން ގެންދާ ކޭނަރީ އައިލަންޑްސްގެ ޖަޒީރާއެއް ކަމަށްވާ ލަންޒަރޯތޭއަކީ ހަނދަށް ދާން ބޭނުން މީހުންނަށް މިވަގުތު ލިބެން އޮތް އެންމެ ފަހި ފުރުސަތުކަމުގައި ދަންނަވަން ޖެހެނީ ސަބަބެއް ނެތިއެއް ނޫނެވެ. ނުސީދާ ގޮތަކަށް ފްރޭމްކޮށްގެން ނަގާފައިވާ މަންޒަރުތަކަށް އެއްލާ ފުރަތަމަ ކަޅިން، އެއީ ހަނދުގެ ސަތަހަ ނޫން ކަމަށް ބުނަން ދަތި ވާނެއެވެ.

އެއީ ހަމައެކަނި އާންމު މީހެއްގެ ލޮލަށް އެ މަންޒަރު ސިފަވާ ގޮތެއް ނޫނެވެ. ޖައްވީ ދިރާސާތަކުގައި ގިނަ ބައެއްގެ އިތުބާރު ހޯދާފައިވާ ވިލާތުގެ ޖައްވީ އިދާރާ ނުވަތަ ޔޫރަޕިއަން ސްޕޭސް އޭޖެންސީ (އިސާ) އިންވެސް ލަންޒަރޯތޭ ބޭނުންކުރަމުން ދަނީ، މި ދުނިޔެމަތީގެ ހަނދުގެ ސަތަހައިގެ ގޮތުގައެވެ. ކުރިއަށް އޮތް ތަނުގައި އެ އިދާރާއިން ހަނދަށް ދިއުމަށް ރާވާފައިވާ ދަތުރުތަކުގައި ބައިވެރިވާނެ ޖައްވީ ފަޅުވެރިންގެ ތަމްރީނުތައްވެސް ރުކުރުވާލާފައި ވަނީ ލަންޒަރޯތޭގައެވެ.

ހަނދުގެ އިތުރުން މާސް ތަރިއަށް ފޮނުވުމަށް އިސާއިން ތަމްރީނުކުރާ ޖައްވީ ފަޅުވެރިންނަށް ތަމްރީނު ދިނުމަށް އެ އިދާރާއިން ކުރިއަށް ގެންދާ "ޕެންޖިއާ" ތަމްރީނުތަކަކީ، ޖައްވީ މައިދާނުގައި ސައެންސްވެރިންގެ އަމަލީ ހަރަކާތްތެރިކަން އިތުރުކުރުމަށް، ފުޅާ ދާއިރާއެއްގައި ކުރިއަށް ގެންދާ ތަމްރީނުތަކެކެވެ.

"ޕެންޖިއާ" ތަމްރީނުތައް ކުރިއަށްދާ އިތުރު މަންޒިލްތަކަށް ބަލާއިރު; އިޓަލީވިލާތުގެ ބްލެޓާބެކް ކެންޔަންއާއި ޖަރުމަނުވިލާތުގެ ނޯޑްލިންގަރ ރީޒް ކްރޭޓަރ ސަރަހައްދު ފާހަގަކުރެވެއެވެ. އެ ސަރަހައްދުތަކަކީ، ފުރަތަމަ ފެންނަ ފެނުމަށް މި ދުނިޔެ މަތީގެ ތަނެކޭ ހީނުވާހާ ގާތް ތަންތަނެވެ.

އިސާއިން ދަނީ އެމެރިކާގެ ޖައްވީ އިދާރާ (ނާސާ)ގެ އަރޓެމިސް މަޝްރޫއުގައިވެސް ބައިވެރިވަމުންނެވެ. އަރޓެމިސް މަޝްރޫއަކީ، 2025 ވަނަ އަހަރުގެ ކުރިން، ފުރަތަމަ އަންހެނާ ނުވަތަ ދޮން ނަސްލު ނޫން ނަސްލެއްގެ މީހަކު ހަނދަށް ގެންދިއުމުގެ ވަރުގަދަ އަމާޒުގައި ހިންގާ މަޝްރޫއެއް ކަމަށް ނާސާއިން ވަނީ ބުނެފައެވެ.