ރާއްޖޭގައި ހިނގާ ކުށްތަކުގެތެރެއިން 70 އިންސައްތަ ކުށަކީ މަސްތުވާތަކެއްޗާ ގުޅިފައިވާ ކުށްތައްކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

ހޯމް މިނިސްޓަރ މިފަދައިން ވިދާޅުވީ މި ސަރުކާރަށް 4 އަހަރު ފުރުމާ ގުޅިގެން ރާއްޖެޓީވީއަށް ދެއްވި ޚާއްސަ އިންޓަރވިއުއެއްގައެވެ.

މިނިސްޓަރ އިމްރާން ވިދާޅުވީ މަސްތުވާތަކެތީގެ ބައި ގަރުނައްވުރެ ދިގު ތާރީޚެއް ރާއްޖޭގައި ވާކަމަށެވެ. ރާއްޖޭގައި ހިނގާ ކުށްތައްވެސް އެންމެ ބޮޑަށް ގުޅިފައިވަނީ މަސްތުވާތަކެއްޗާ ކަމަށާއި، 65 އިންސައްތައާ 70 އިންސައްތައާ ކައިރިކުރާ ކުށްތައް ވަނީ ކޮންމެވެސް ގޮތަކުން މަސްތުވާތަކެއްޗާ ގުޅިފައިކަމަށް މިނިސްޓަރ އިމްރާން ވިދާޅުވިއެވެ. ގޭންގު މާރާމާރީތަކާއި، ވައްކަމާއި، ގެވެށި އަނިޔާއާއި އަދިވެސް މިފަދަ އެތައް ކުށެއް މިކަމާ ގުޅިފައިވާކަމަށް އިމްރާން ވިދާޅުވިއެވެ.

އިމްރާން ވިދާޅުވީ މިކަން ހުއްޓުވުމަށް ގިނަ މަސައްކަތްތަކެއް ކުރަންޖެހޭކަން ގަބޫލުފުޅުކުރައްވާކަމަށެވެ. މި ސަރުކާރު އައިފަހުން ކުރެވުނު އެންމެ މުހިންމު މަސައްކަތަކީ މަސްތުވާތަކެތީގެ މި ހާލަތަށް ބަދަލު ގެނައުމަށް ކުރެވުނު މަސައްކަތްކަމަށް އިމްރާން ވިދާޅުވިއެވެ. މިގޮތުން މި މައްސަލައާ ގުޅުހުންހުރި އެހެން އިދާރާތަކާ ގުޅިގެން މަސައްކަތްކޮށް، މަސްތުވާތަކެތީގެ އޮޕަރޭޝަންތައް ހިންގުމާއި، ރިހެބިލިޓޭޝަންގެ މަސައްކަތްތަކުގައި ކާމިޔާބު ހޯދާފައިވާކަން މިނިސްޓަރ އިމްރާން ފާހަގަކުރެއްވިއެވެ.

މިނިސްޓަރ ވަނީ މަސްތުވާތަކެތީގެ މައްސަލަ ހައްލުކުރުމަށް ރާއްޖެއިން ކޮށްފައިވާ މަސައްކަތްތައް ވަރަށް ގިނަކަން ފާހަގަކުރައްވާފައެވެ. އެހެންނަމަވެސް މި މައްސަލަތައް ބޮޑު ހައްލެއް ގެނައުމަށް އަދިވެސް ވަރަށް ގިނަ މަސައްކަތްތައް ކުރަންޖެހޭ ކަމަށާއި، އޭގެތެރޭގައި މަސްތުވާތަކެއްޗަށް ދެވިހިފައި، މި ވަބާއިން އަރައިނުގަނެވި ތިބި މީހުން ރިހެބިލިޓޭޓް ކުރުމުގެ މަސައްކަތް ހިމެނޭކަމަށް މިނިސްޓަރ އިމްރާން ވިދާޅުވިއެވެ.