"އެއް ޖިންސުން ގުޅުން ހިންގުމަށް ހިތްވަރު ދޭ އެއްވެސް ކަމެއް ނުކުރެވޭނެ، 28 ދުވަހުގެ މުބާރާތަކަށް ދީން ބަދަލެއް ނުކުރެވޭނެ"

މިމަހުގެ 20 ވަނަ ދުވަހު ޤަތަރުގައި ފަށާ ފީފާ ވޯލްޑް ކަޕްގައި އެއް ޖިންސުން ގުޅުން ހިންގުމަށް ހިތްވަރުދޭ އެއްވެސް ކަމެއް ނުކުރެވޭނެ ކަމަށް ޤަތަރު ވޯލްޑް ކަޕްގެ ހެޑް އޮފް ސެކިޔުރިޓީ ޢަބްދުﷲ އަލް ނަސާރީ ވިދާޅުވެއްޖެއެވެ.

އަލް ނަސާރީ މިފަދައިން ވިދާޅުވީ މުބާރާތުގައި ބައެއް ޤައުމުތަކުގެ ކެޕްޓަނުން އެއް ޖިންސުން ގުޅުމަށް ހިރްވަރުދޭ ކެޕްޓަން ބޭންޑު އަޅާނެ ކަމާއި، ބައެއް ސަޕޯޓަރުން އެކަން ރަމްޒުކޮށްދޭ ދިދަ ބޭނުން ކުރާނެ ކަމަށް ބުނެފައި ވަނިކޮށެވެ. އަލް ނަސާރީ ވިދާޅުވީ އެކަން އެގޮތަށް ކޮށް، އެކަމުގައި އެ ބައެއްގެ ޚިޔާލާއި ފިކުރު ދައްކަން ބޭނުންވާނަމަ، އެކަން އެގޮތަށް ކުރާ ޤައުމަކަށް ގޮސް އެކަން ކުރަން އެދޭ ކަމަށެވެ. މީގެ އިތުރުން އެކަމާ މުޅިން ދެކޮޅު ޤައުމަކަށް އައިސް ކަންކަން ގޯސްކުރަން އުޅުމުގެ ބޭނުމެއް ނެތް ކަމަށް ވެސް އޭނާ ވިދާޅުވިއެވެ. އަލް ނަސާރީ ވިދާޅުވީ 28 ދުވަހުގެ މުބާރާތަކަށްޓަކައި ޤަތަރުން އެ މީހުންގެ ދީން ބަދަލު ނުކުރާނެ ކަމަށެވެ.

އިތުރަށް ވާހަކަ ދައްކަމުން އަލް ނަސާރީ ވިދާޅުވީ އެއްވެސް ސަޕޯޓަރަކު ދަނޑު ތެރޭގައި އެފަދަ ދިދައެއް ބޭނުންކޮށްފިނަމަ، ސަލާމަތީ ފަރާތްތަކުން އެ ދިދައެއް އަތުލާނެކަމަށެވެ. އެކަން އެގޮތަށް ކުރަނީ އެ ސަޕޯޓަރެއްގެ ވެސް ސަލާމަތާއި ރައްކާތެރިކަމަށް ކަން އޭނާ ފާހަގަ ކުރެއްވިއެވެ. އަލް ނަސާރީ ވިދާޅުވީ ޤަތަރުން އެކަން ނުކޮށްފިނަމަ، ދަނޑު ތެރެއިން އެހެން މީހަކު އެ ސަޕޯޓަރަކަށް ހަމަލާ ވެސް ދީފާނެ ކަމަށެވެ. އަލް ނަސާރީ ވިދާޅުވީ ފުޓުބޯޅަ މެޗެއްގެ ޓިކެޓު ގަންނަނީ މެޗު ބަލަން ކަމަށާއި، އެހެން ކަންތައްތަކެއް ދައްކައި، އެހެން ކަންތައްތަކެއް ކުރަން ނޫން ކަމަށެވެ.

މީގެ އިތުރުން އަލް ނަސާރީ ވިދާޅުވީ ޤަތަރަކީ އިސްލާމީ ޤައުމެއް ކަމަށާއި، މުބާރާތް ބާއްވާނީ ވެސް އެކަންކަމަށް ބަލައިގެން ކަމަށެވެ.