ޤައުމީ ބިލިއާޑް މުބާރާތުގެ ޓީމު އިވެންޓުގެ މެޗުތައް ފަށައިފިއެވެ.

ޤައުމީ ބިލިއާޑް ސެންޓަރުގައި ޓީމު އިވެންޓުގެ މެޗުތައް ފެށީ ހޮނިހިރު ދުވަހުއެވެ. ހޮނިހިރު ދުވަހު ވަނީ ހަތަރު މެޗެއް ކުޅެފައެވެ.

ފުރަތަމަ މެޗުގައި ބައްދަލުކުރީ ކަސްޓަމްސް ރެކްރިއޭޝަން ކުލަބާއި ކުލަބް އީގަލްސްއެވެ. އެ މެޗު ކަސްޓަމްސް ރެކްރިއޭޝަނުން ވަނީ 3-2 އިން ކާމިޔާބުކޮށްފައެވެ. ދެ ވަނަ މެޗުގައި އައިލެންޑާސް ހޯޕް ސްޕޯޓްސް ކުލަބް ވަނީ މާޒިޔާ ސްޕޯޓްސް އެންްޑް ރެކްރިއޭޝަނާ ވާދަކޮށް 5-0 އިން ބަލިވެފައެވެ.

ތިން ވަނަ މެޗުގައި ބައްދަލުކުރީ މާޒިޔާ އާއި ކަސްޓަމްސްއެވެ. މި ދެ ޓީމު އޮތީ ފުރަތަމަ މެޗުތަކުން މޮޅުވެފައިކަމަށްވާތީ، މި މެޗު ވެގެންދިޔައީ ދެ ޓީމަށް ވެސް މުހިންމު މެޗެކެވެ. ދެ ވަނަ މެޗުގައި މާޒިޔާގެ މައްޗަށް ވެސް ކަސްޓަމްސް އިން ކުރި ހޯދީ 3-2 އިންނެވެ. ހަތަރު ވަނަ މެޗުގައި ބައްދަލުކުރީ އީގަލްސް އާއި ދިވެހި ސިފައިންގެ ކުލަބެވެ. ފުރަތަމަ މެޗުން ބަލިވި ނަމަވެސް ދެ ވަނަ މެޗުގައި އީގަލްސް ވަނީ 3-2 އިން ސިފައިން ބަލިކޮށް އުންމީދު ހޯދާފައެވެ.

ފުރަތަމަ ދުވަހުގެ ކުޅުން ނިމުނުއިރު އެއް ވަނައިގައި އޮތީ ކަސްޓަމްސްއެވެ. އެއީ އެ ޓީމު ކުޅުނު ދެ މެޗު ވެސް ކާމިޔާބުކޮށް ހަ ޕޮއިންޓާއެކުއެވެ. ދެ ވަނައިގައި އޮތް މާޒިޔާ އަށް ލިބެނީ ދެ މެޗުން ތިން ޕޮއިންޓެވެ. ތިން ވަނައިގައި އޮތީ އީގަލްސްއެވެ. ހަތަރު ވަނައިގައި އޮތް ސިފައިންނާއި، ފަސް ވަނައިގައި އޮތް އައިލެންޑާސް އަށް ޕޮއިންޓެއް ނުލިބެއެވެ.