ދުނިޔޭގެ ލީޑިންގ ޑެސްޓިނޭޝަން އެވޯޑް ރާއްޖެއިން ތިންވަނަ ފަހަރަށް ދިފާއުކޮށްފި

ވޯލްޑް ޓޫރިޒަމް އެވޯޑް (ޑަބްލިއުޓީއޭ)ގެ އެންމެ ޝަރަފުވެރި އެވޯޑް "ވޯލްޑްސް ލީޑިންގ ޑެސްޓިނޭޝަން" އެވޯޑް ރާއްޖެއިން ތިންވަނަ ފަހަރަށް ދިފާއުކޮށްފިއެވެ.

އޮމާންގެ ވެރިރަށް މަސްގަތުގައި ހުކުރު ދުވަހުގެ ރޭ ބޭއްވި، 29 ވަނަ ވޯލްޑް ޓްރެވެލް އެވޯޑްސް ގްރޭންޑް ފައިނަލް ގާލާ ރަސްމިއްޔާތުގައި ރާއްޖެއަށް ލިބުނު ލީޑިންގ ޑެސްޓިނޭޝަން އެވޯޑާ ހަވާލުވެވަޑައިގެންނެވީ ޓޫރިޒަމް މިނިސްޓަރު ޑރ. އަބްދުﷲ މައުސޫމާއި އެމްއެމްޕީއާރްސީގެ ޗީފް އެގްޒެކެޓިވް އޮފިސަރ އަދި މެނޭޖިން ޑިރެކްޓަރ ތޮއްޔިބު މުހައްމަދެވެ.

Advertisement

މި އެވޯޑް ރާއްޖެއިން ހާސިލުކުރީ 18 ގައުމަކާ ވާދަކޮށްގެންނެވެ. އެއީ އާޖެންޓީނާ، ބްރެޒިލް، ޗިލީ، ކޮލޮމްބިއާ، ކޯސްޓަރީކާ، ދުބާއީ، ގްރީސް، އިންޑިއާ، އިންޑޮނޭޝިއާ، ޖެމެއިކާ، ކެންޔާ، މެކްސިކޯ، ނިއުޒީލޭންޑް، ޕޯޗުގަލް، ދެކުނު އެފްރިކާ، ސްޕެއިން، އެމެރިކާ އަދި ވިއެޓްނާމެވެ.

ޖެހިޖެހިގެން ތިންވަނަ އަހަރު ރާއްޖެއަށް މި އެވޯޑް ލިބުނީ ރާއްޖޭގެ ފަތުރުވެރިކަމުގެ ދާއިރާއަށް 50 އަހަރު ފުރުން ފާހަގަކުރަމުން ދަނިކޮށެވެ.

ޑަބްލިޔުޓީއޭގައި ރާއްޖެއަށް އިތުރު އެވޯޑްތަކެއްވެސް ލިބިފައިވެއެވެ. އެގޮތުން ލީޑިންގ ޓޫރިޒަމް ބޯޑް އެވޯޑު އެމްއެމްޕީއާރްސީއަށް ލިބިފައިވެއެވެ. މިއީ މިއެވޯޑް އެމްއެމްޕީއާރްސީން ކާމިޔާބުކުރި ފުރަތަމަ ފަހަރެވެ. މިއެވޯޑް އެމްއެމްޕީއާރްސީން ކާމިޔާބުކުރީ 28 ޓޫރިސްޓް ބޯޑަކާ ވާދަކޮށްގެންނެވެ. އޭގެތެރޭގައި ވިޒިޓް ދުބާއީ، އިންކްރެޑިބަލް އިންޑިޔާ، ޓޫރިޒަމް އޮސްޓްރޭލިއާ އަދި ވިޒިޓް އިންގްލެންޑް ހިމެނެއެވެ.

މިއެވޯޑް ލިބުމާގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މި އެވޯޑަކީ ފަތުރުވެރިކަމުގެ މަންޒިލެއްގެ ގޮތުގައި ދިވެހިރާއްޖޭގެ މަގުބޫލުކަމުގެ ހެތްކެއްކަމަށެވެ. އަދި ވޭތުވެދިޔަ ތިން އަހަރުގެ ތެރޭގައި ފަތުރުވެރިކަމުގެ ސިނާއަތުން ހާސިލްކުރި އެވޯޑްތަކުން ދައްކުވައިދެނީ، މި ދާއިރާއިން ގުޅިގެން އެކުގައި ޖޮންޖެހުން ތަކުން އަރައިގަނެ ކޮންމެ ކަމެއްވެސް ހާސިލްކުރެވިދާނެކަމެވެ.

އެމްއެމްޕީއާރުސީގެ ސީއީއޯ އަދި އެމްޑީ ތޮއްޔިބު ވިދާޅުވީ، ދުނިޔޭގެ ލީޑިންގ ޑެސްޓިނޭޝަންގެ ޝަރަފުވެރި އެވޯޑް ޖެހިޖެހިގެން ތިންވަނަ އަހަރު ކާމިޔާބު ކުރެވުމަކީ ހަގީގަތުގައިވެސް ލިބުނު ޝަރަފެއްކަމަށެވެ. މި އަހަރަކީ ދިވެހިރާއްޖޭގެ ފަތުރުވެރިކަމުގެ ރަންޔޫބީލްކަމުން، ރާއްޖޭގެ އައްސޭރިފަށަށް ފަތުރުވެރިންނަށް މަރުހަބާ ކިޔަންފެށިތާ 50 އަހަރުފުރުން ފާހަގަކުރުމަށް މިއަށްވުރެ ރަނގަޅު ކާމިޔާބީއެއް ނެތްކަމަށްވެސް ތޮއްޔިބު ވިދާޅުވިއެވެ. 

މި ކާމިޔާބީއަކީ ސަރުކާރުގެ އިރުޝާދާއި، ބައިވެރިންގެ އެއްބާރުލުމާއި، މުޅި ފަތުރުވެރިކަމުގެ ސިނާއަތުގެ އެންމެންގެ ބުރަ މަސައްކަތުގެ ސަބަބުން ހާސިލުވި ޝަރަފެއްކަން ފާހަގަކުރައްވަމުން ތޮއްޔިބު ވިދާޅުވީ، ދުނިޔޭގެ ހުރިހާ ކަންކޮޅުތަކެއްގެ މީހުން ދިވެހިރާއްޖެ ދެކެ ވާ ލޯބި ވަރަށް ސާފުކޮށް ފެނިއްޖެކަމަށެވެ. އަދި މިއަހަރަކީ އެމްއެމްޕީއާރްސީ (ވިޒިޓް މޯލްޑިވްސް)އިން ދުނިޔޭގެ ލީޑިންގ ޓޫރިސްޓް ބޯޑުގެ ޝަރަފު ކާމިޔާބުކުރި ފުރަތަމަ އަހަރުކަމުން، ފާއިތުވި އަހަރުތަކުގައި ދުނިޔެއަށް ކުރިމަތިލާންޖެހުނު އެކިއެކި މުސީބާތްތައް ތަހައްމަލުކޮށް، އެމްއެމްޕީއާރްސީގެ ޓީމުން ކުރި ބުރަ މަސައްކަތުގެ އަގު ދުނިޔެއިން ވަޒަންކޮށްފައިވާކަން އުފަލާއެކު ތޮއްޔިބު ފާހަގަކުރެއްވިއެވެ.

ޑަބްލިޔުޓީއޭގެ އެވޯޑްތަކަކީ ދުނިޔޭގެ ޓޫރިޒަމްގެ އިތުރުން ދަތުރުފަތުރުގެ ސިނާއަތުގައިވެސް އެންމެ ޝަރަފުވެރި، އަދި އެންމެ ފާހަގަކޮށްލެވޭ އެވޯޑުތަކެވެ.