އުފާފާގަތި މާދަމާއެއް ހޯދޭނެ ކަމުގެ ފެހި ސިގްނަލް ރާއްޖޭގެ އިގްތިސޯދީ މީޓަރުން ދައްކަމުންއެބަދޭ - ރައީސް

އުފާފާގަތި މާދަމާއެއް ހޯދޭނެ ކަމުގެ ފެހި ސިގްނަލް ރާއްޖޭގެ އިޤްތިޞާދީ މީޓަރުން ދައްކަމުންދާ ކަމަށް ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ޖުމްހޫރީ ދުވަހުގެ ރަސްމީ ޖަލްސާގައި ވާހަކަދައްކަވަމުން ރައީސް އިބްރާހިމް މުހައްމަދު ޞާލިހު ވަނީ ރާއްޖޭގެ އިގްތިސާދަށް އަލިއަޅުވާއްލާފައެވެ. އެގޮތުން ރާއްޖޭގެ ޚަރަދުތައް ކުޑަކުރުމަށް އަންނަ އަހަރުގެ ބަޖެޓްގައި ޚާއްސަ އިސްކަމެއް ދެއްވާފައިވާނެ ކަަމަށާއި މިކަންކަން ކުރާނީ ރައްޔިތުންނަށާއި އިޤްޠިޞާދަށް އޭގެ ސަބަބުން ކުރާނެ ނޭދެވޭ އަސަރު އެންމެ ކުޑަވާނެގޮތަކަށް ކަމަށް ރައީސް ވިދާޅުވިއެވެެ. އަދި ދުނިޔޭގެ މާލީ އިދާރާތަކުގެ ލަފަޔާ އެއްގޮތަށް، އާމްދަނީ އިތުރުކުރުމުގެ ގޮތުން ޓެކްސް ރޭޓްތަކަށް ބަދަލު ގެނައުމަށް ސަރުކާރުން ހުށަހަޅާފައިވާނެ ކަމަށް ރައީސް ފާހަގަކުރެއްވިއެވެ. ދައުލަތަށް ބޭރު ފައިސާ އެންމެ ގިނައިން ލިބެނީ ޓީޖީއެސްޓީގެ ގޮތުގައި ކަމަށް ވާއިރު، ޓެކްސްގެ ނިޒާމަށް ގެނެވޭ ބަދަލާއެކު، ދައުލަތުގެ ރަސްމީ ރިޒަރވްއަށްވެސް އޭގެ ހެޔޮ އަސަރުކުރާނެ ކަމަށް އެމަނިކުފާނު ފާހަަގަކުރެއްވިއެވެ.

Advertisement

މީގެ އިތުރުން ކޮވިޑް-19ގެ ސަބަބުން ރާއްޖެ އަށް ވެސް ބޮޑެތި ގޮންޖެހުންތަކާއި ދިމާވިކަން ރައީސް ފާހަގަކުރެއްވިއެވެ. އިންތިޚާބު ކޮށްފާ އޮންނަ ސަރުކާރެއްގެ ހަޤީގީ ޒިންމާއަކީ، އެ ބޮޑުބުރަ ވަކިވަކި ފަރުދުންގެ ބޮލުގައި ނާޅުވާ ސަރުކާރުން އުފުލުން ކަމަށާއި މި ސަރުކާރުން އެ ޒިންމާ ފުރިހަމައަށް އުފުލާފައިވާ ކަަމަށް ރައީސް ވަނީ ފާހަގަކުރައްވާފައެވެ. އަދި ގުޅިގެން މަސައްކަތްކޮށްފި ނަމަ މާދަމާ އުޖާލާ ވާނެ ކަމަށް ރައީސް ވިދާޅުވިއެވެ.

މަސައްކަތްތެރިންގެ ހައްގުތައް ކަށަވަރު ކުރުމަށް ސަރުކާރުން ކުރަމުންދާ މަސައްކަތްތަކަށް ވެސް ރައީސް ވަނީ އަލިއަޅުވާލައްވާފައެވެ. އެގޮތުން ވަޒީފާ އަދާކުރާ މީހާއަށް އެންމެ ކުޑަވެގެން ދެވޭނެ އުޖޫރަ ޤާނޫނަކުން ކަށަވަރުކޮށްދިނުމާއި، ތަޢުލީމީ ދާއިރާގެ މުސާރައިގެ އޮނިގަނޑަށް ބަދަލުގެނައުމާއި، ޞިއްޙީ ދާއިރާއިގެ މުސާރައިގެ އޮނިގަނޑަށް ގެންނަން ނިންމާފައިވާ ބަދަލުތައް ރައީސް ފާހަގަކުރެއްވިއެވެ.

މީގެ އިތުރުން މަސައްކަތްތެރިން މަސައްކަތްކުރާ މާޙައުލުގެ ސަލާމަތާ ރައްކާތެރިކަން ކަށަވަރުކޮށްދިނުމަށް، އޮކިއުޕޭޝަނަލް ހެލްތް އެންޑް ސޭފްޓީ އެކްޓް ރައްޔިތުންގެ މަޖިލީހަށް ފޮނުވާފައިވާ ކަމަށާއި މިއީ މަސައްކަތުގެ މާޙައުލުގާ ހަރަކާތްތެރިވާ ހުރިހާ ފަރުދުންނަށް ލިބިދޭންޖެހޭ ރައްކާތެރިކަން ކަށަވަރުކޮށްދޭ ޤާނޫނެއް ކަމަށް ރައީސް ވިދާޅުވިއެވެ.