ކަރާ ކިލޯއެއްގެ އަގު 80ރ. އަށް އަރައިފި
މާރުކޭޓުގައި ކަރާ ލިބެން ހުރީ މަދުން
މާރުކޭޓުގައި ތަކެތި ވިއްކުން
ރަމަޟާން މަސް ފެށުނު އިރު 15ރ. އަށް ލިބެން ހުރި ކަރާ ކިލޯއެއްގެ އަގު 80ރ. އަށް އަރައިފި އެވެ.
ލޯކަލް މާރުކޭޓުގައި ތަކެތީގެ އަގުތަކަށް އައިސްފައިވާ ބަދަލުތަކަށް ބަލާ އިރު، އެންމެ އަގު އުފުލިފައި ވަނީ ކަރާއިންނެެވެ. ރާއްޖޭގެ ކަރާ މާރުކޭޓުގައި ލިބެން ނެތް އިރު، ބޭރުން ގެނެސްގެން ވިއްކާ ކަރާ ވިއްކަނީ، ކިލޯއެއް 80ރ. އަށެވެ.
ރަމަޟާން މަސް ފެށުނު އިރު ކަރާގެ އަގު އުޅެނީ 15ރ. އާ 20ރ. އާ ދެމެދުގެ އަގުތަކެއްގަ އެވެ.
ލޯކަލް މާރުކޭޓުގައި ލިބެން ހުރި އެެހެން ތަކެތީގެ އަގުތަކަށް ބަލާ އިރު، ކޮޕީ ފަތް ތިން ފަތް ބޮޑި އެއް 20ރ. އަށް އުޅޭ އިރު ކުއްޅަފިލާ ފަތް އުޅެނީ ބޮޑިއެއް 15ރ. އާއި 25ރ. އާ ދެމެދުގެ އަގުތަކެއްގަ އެެވެ.
ޢީދު ދުވަހު، މާރުކޭޓުގެ ގިނަ ސްޓޯލްތަކެއް ބަންދު ކުރާނެ ކަމަށް ތަކެތި ވިއްކާ ފަރާތްތަކުން ބުނެ އެވެ. ކުރިއަށް އޮތް ހަފްތާއެއްގެ ތެރޭގައި، ތަކެތީގެ އަގުތައް ދަށަށް ދާނެ ކަމަށް ތަކެތި ވިއްކާ ފަރާތްތަކުން ބުނެއެވެ.
މާރުކޭޓުގައި މިރުހުގެ އަގު 100 ގްރާމް 15ރ. އަށް އުޅޭ އިރު، މިރުސް ކިލޯއެއްގެ އަގު އުޅެނީ 100ރ. އަށެވެ. ލުބޯ ކިލޯއެއްގެ އަގު އުޅެނީ 40ރ. އަށެވެ.
މީގެ އިތުރުން ފަނި ގިރުމަށް ބޭނުން ކުރާ ގިނަ ސާމާނު ވެސް މިއަދު ވެސް މާރުކޭޓުގައި ލިބެން އެބަ ހުއްޓެވެ.
މަސް މާރުކޭޓުގައި ކަނޑުމަސް ކިލޯއެއް އުޅެނީ، 25ރ. އާ 40ރ. އާ ދެެމެދުގެ އަގުތަކެއްގަ އެވެ. ޢީދު ދުވަހު، މަސް ވިއްކާ ގިނަ ފަރާތްތަކުން ވެސް މަސް ނުވިއްކާނެ ކަމަށް އެ ފަރާތްތަކުން ހާމަކުރެ އެވެ.
އެހެން ކަމުން ޢީދު ދުވަހު، މާރުކޭޓުގައި މަސް ލިބެން ހުންނަނީ ވަރަށް މަދުން ކަމަށް ލަފާކުރެވެއެވެ.
ފަރު މަސް މާރުކޭޓުގައި ހުރީ ވަރަށް މަދުންނެެވެ. އެގޮތުން އާއްމުކޮށް މާރުކޭޓުން ލިބެން ހުންނަ، ފާނަ، ގިނި މަސް ފަދަ ބާވަތްތައް މާރުކޭޓުގައި ލިބެން ނެތެވެ.
