އޭސީ މިލާނުން ޖިރޫޑްގެ އެއްބަސްވުން އައުކުރުމަށް މަސައްކަތް ކުރަނީ
އިތުރު އެއް އަހަރު ދުވަހުގެ އެއްބަސްވުމެއް ޖިރޫޑަށް ހުށަހެޅުމަށް މިލާނުން އަންނަނީ ތައްޔާރުވަމުން
އޭސީ މިލާން އާއި ސަލްސްބާގް ކުޅުނު މެޗުގެ ތެރެއިން
އޭސީ މިލާނަށް ކުޅެމުން އަންނަ ފްރާންސްގެ ފޯވާޑް އޮލީވިއޭ ޖިރޫޑްގެ އެއްބަސްވުން އައުކުރުމަށް އެ ކުލަބުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.
ޗެލްސީ ދޫކޮށްލުމަށްފަހު ޖިރޫޑް އޭސީ މިލާނަށް ބަދަލުވީ 2021 ވަނަ އަހަރުއެވެ. އޭނާ މިލާނަށް ގުޅުނީ ދެ އަހަރުގެ އެއްބަސްވުމެއްގެ ދަށުންނެވެ. އެ ޓީމާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުއެވެ. ނަމަވެސް މިހާރު އުމުރުން 36 އަހަރުވެފައިވާ ޖިރޫޑް އަދި ވެސް ދައްކަމުން އަންނަ މޮޅު ކުޅުމުގެ ސަބަބުން މިލާނުން ބޭނުންވަނީ އޭނާ އެ ކުލަބުގައި ބަހައްޓަން ކަމަށް ރިޕޯޓުތައް ބުނެއެވެ. އެހެންކަމުން އިތުރު އެއް އަހަރު ދުވަހުގެ އެއްބަސްވުމެއް ޖިރޫޑަށް ހުށަހެޅުމަށް މިލާނުން ތައްޔާރުވަމުން އަންނަ ކަމަށް ވެސް ރިޕޯޓުތައް ބުނެއެވެ.
ޖިރޫޑް ވަނީ މި ސީޒަންގެ މިހާތަނަށް މިލާނަށް ކުޅެދިން 18 މެޗުން ނުވަ ލަނޑު ޖަހާފައެވެ. މީގެ އިތުރުން އޭނާ އަންނަނީ މުހިންމު މެޗުތަކުގައި މޮޅު ކުޅުމެއް ދައްކައި، މިލާން މޮޅު ކޮށްދެމުންނެވެ. ޖިރޫޑާ ގުޅޭ ގޮތުން މިލާންގެ ކޯޗު ސްޓެފާނޯ ޕިއޯލީ ބުނީ ޖިރޫޑް ސާބިތުކޮށްދެނީ އުމުރަކީ ފުޓުބޯޅަ ކުޅުމަށް އޮތް ހުރަހެއް ނޫން ކަމަށެވެ. އޭނާ ބުނީ ޖިރޫޑަށް އަދި ވެސް ކުރިއަށް އޮތް ތަނުގައި ފެންވަރު ރަނގަޅު ކުޅުމެއް ދެއްކޭނެ ކަމަށް ޤަބޫލުކުރާ ކަމަށެވެ.
