72 ކިލޯ މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ޓްރެފިކްކުރަން އުޅުނު މައްސަލައިގައި ހިމެނޭ މީހުންގެ ތެރެއިން 7 މީހެއްގެ މައްޗަށް ކުރާ ޓްރެފިކިންގ ދައުވާ ދައުލަތުން އަނބުރާ ގެންގޮސްފިއެވެ.
މި މައްސަލައިގައި ޑައިމޯފިން ޓްރެފިކް ކުރުމުގެ ދައުވާ 10 މީހެއްގެ މައްޗަށް އުފުލިއެވެ.
މިމައްސަލައިގައި ދައުވާ އުފުލި މީހުން:
- ސ. ހުޅުދޫ، ދޭލިޔާގެ، ޢިރުފާން ތަގިއްޔު
- ރ. އިނގުރައިދޫ، އެލެސްކާ، މުހައްމަދު ވިސާމް
- ރ. އިނގުރައިދޫ، އެލެސްކާ، ޢަބްދުﷲ ވިސާމް
- ދ. މާއެނބޫދޫ، އަނބުގޮސްދޮށުގެ، އަހުމަދު ނަސީރު
- ކ. މާލެ، ހ. ގާރޑްންބިޔުޓީ، މުހައްމަދު އަކްރަމް
- ހދ. ނޮޅިވަރަންފަރު، ނޫރީއާގެ، މުހައްމަދު ޝަރީފް
- ލ. ގަން، ތުނޑި، ޕެރިސްހޮލިޑޭ، މުހައްމަދު ފުރުގާން
- ރ. ރަސްގެތީމު، ފީރޯޒްގެ، އަހުމަދު ޝިނާން
- ތ. ތިމަރަފުށި، ތަނޑިރަތްމާގެ، މުހައްމަދު ވަޖީހު
- ކ މާލެ، މއ. ކަނޑޫގެ، އަލީ އަހުމަދު
އޭގެ ތެރެއިން ޢިރުފާން ތަގިއްޔުއާއި، މުހައްމަދު އަކްރަމްގެ އިތުރުން، އަހުމަދު ނަސީރު ފިޔަވައި ދެން ތިބި 7 މީހުންގެ މައްޗަށް ކުރާ ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން ވަނީ އަނބުރާ ގެންގޮސްފައެވެ. އެކަން 2 ނޮވެމްބަރު 2022 ގައި ޕީޖީ އޮފީހުން ވަނީ ކޯޓަށް ސިޓީއަކުން އަންގާފައެވެ.
އެކަމާ ގުޅޭގޮތުން ހޯމަ ދުވަހުގެ އަޑުއެހުމުގައި ވާހަކަ ދައްކަވަމުން ދިފާއީ ވަކީލުން ވަނީ، މި މައްސަލައަށް އަހަރަކަށްވުރެ ގިނަ ދުވަސްވެފައިވާއިރު، އެމީހުން ޝަރީއަތް ނިމެންދެން ބަންދުކޮށްގެން ބޭތިބުމަށްފަހު އެންމެ ފަހުން ދައުވާތައް އަނބުރާ ގެންގޮސްފައިވާތީ ދައުލަތަށް ފާޑު ވިދާޅުވެ ވާހަކަ ދައްކަވާފައެވެ. މި މައްސަލައިގައި ދެން ތިބި 3 މީހުންގެ ބައިގައިވެސް މިހާތަނަށް ދައުވާ ސާފުކޮށްދިނުމުގެ މަރުޙަލާވެސް ނިމިފައިނުވާކަން ފާހަގަ ކުރައްވައި ދިފާއީ ވަކީލުން ވަނީ، ދައުވާ އިތުރަށް މުރާޖައާ ކޮށްފިނަމަ އެ ދައުވާތައްވެސް އަނބުރާ ދައުލަތުން ގެންދާނެކަމަށް ވިދާޅުވެ، ދައުލަތުން ކުރި ދައުވާތަކަށް އިންކާރުކޮށްފައެވެ.
މި މައްސަލައިގައި އެންމެ އިސްކޮށް ހުރި ކަމަށް ތުހުމަތު ކުރާ ސ. ހުޅުދޫ، ދޭލިޔާގެ، އިރުފާން ތަގިއްޔު، 32، ގެ މައްޗަށް އުފުލާފައިވާ، ޑައިމޯފިން ޓްރެފިކް ކުރުމުގެ ދައުވާއަށް މީގެ ކުރިން ބޭއްވި އަޑުއެހުމުގައި އޭނާ ވަނީ އިންކާރުކޮށްފައެވެ. ހޯމަ ދުވަހުގެ އަޑުއެހުމުގައި މުހައްމަދު އަކްރަމްގެ އިތުރުން، އަހުމަދު ނަސީރުގެ މައްޗަށް ކުރާ ދައުވާ ސާފުކޮށްދީފައިވާއިރު، ދައުލަތުން އެމީހުންގެ މައްޗަށް ދައުވާ ކޮށްފައިވަނީ އެމީހުންގެ ހިޔާޒަތުގެ ދަށުގައިވާ އެއްޗަކުން މަސްތުވާތަކެތި ފެނިފައިވާކަމަށް ބުނެއެވެ.
ދައުލަތުން ބުނާ ގޮތުގައި މަސްތުވާތަކެތި އުުފުލާފައިވާ ކާރަކީ އަކްރަމްގެ ހިޔާޒަތުގެ ދަށުގައިވާ ކާރެކެވެ. އަދި މަސްތުވާތަކެތި ގެނައި ލޯންޗަކީ ނަސީރު ދުއްވި ލޯންޗެއްކަމަށް ދައުލަތުން ބުނެއެވެ.
އެ 3 މީހުންވެސް ދައުވާއަށް އިންކާރުކޮށްފައިވާތީ ދެން މި މައްސަލައިގައި އޮންނާނީ ދައުލަތާއި ދިފާއުން ހެކި ހާމަ ކުރުމެވެ. އެ އަޑުއެހުން އޮންނާނީ 29 ނޮވެމްބަރުގައިކަމަށް މައްސަލަ ބައްލަވާ ގާޒީ ޙަސަން ސައީދު ވިދާޅުވިއެވެ.
