އިންސާނެއްގެ ސިފަޔަށް އޮތް ކަންބަޅިއެއް އުފަންވުމާއެކު ދެކުނު އެފްރިކާ މީހުން ބިރުގަނެއްޖެ!

އިންސާނެއްގެ ސިފަތައް ސޫރަވާ ކަންބަޅިއެއް ދެކުނު އެފްރިކާގެ ވިލެޖަކަށް އުފަންވުމުން އެ ވިލެޖްގެ މީހުން ބިރުން އުޅެން ފަށައިފިއެވެ.

ދެކުނު އެފްރިކާގެ ކްރިސް ހާނީ ޑިސްޓްރިކްޓްގެ މި ވިލެޖުގެ މީހުން ބުނަނީ އެ ކަންބަޅި ވަޅު ނުލަނީސް އެމީހުންގެ ބިރުވެރިކަން ފިލާ ނުދާނެ ކަމަށާއި، ވަޅު ލުމުން ނޫނީ ހިތްހަމަ ވެސް ނުޖެހޭނެ ކަމަށެވެ.

ކަންބަޅި އުފަންވި އިރު މޫނުގައި އިންސާނެއްގެ ސޫރަ ސިފަވާއިރު ހަމުގައި ވަނީ ފިޔާތޮށި ކުލައެވެ.

ބައެއް މީހުން ގަބޫލު ކުރި ގޮތުގައި މިއީ ކަންބަޅިއަކަށް އިންސާނުންގެ ދަރިފަނި ވާސިލްކޮށްގެން ދިމާވި ގޮތެކެވެ.

މައްސަލައިގައި ތަފާތު ގޮތްގޮތައް ވާހަކަތައް ދެކެވި ކަންބޮޑުވުން ފާޅު ކުރުން ވަރަށް މައްޗަށް ދިއުމާއެކު ދެކުނު އެފްރިކާގެ ސަރުކާރުގެ ކަމާބެހޭ އޮފިޝަލުން މިކަމުގެ ތެރެއަށް ވަންނަން ޖެހުނެވެ.

އީސްޓަން ކޭޕް ޑިޕާޓްމަންޓް އޮފް ރޫރަލް ޑިވެލޮޕްމަންޓުގެ ދަނޑުވެރިކަމާބެހޭ އޮފިޝަލުން ބުނެފައިވަނީ ދައުރުވަމުންދާ ކަންބަޅީގެ ފޮޓޯއަކީ ފޭކް އެއް ނޫން ކަމަށާއި ނަމަވެސް، އެއީ އިންސާނުންގެ ދަރިފަނި ކަންބަޅިއަށް ވާސިލް ވެގެން އުފެދުނު ހައިބްރިޑް އެއް ނޫން ކަމަށެވެ.

ޗީފް ޑިރެކްޓަރ އޮފް ވެޓިނަރީ ސަވިސަސް ޑރ. ލުބާބަލޯ ވިދާޅުވީ، ބަލާބެލުމަށް އިންސާނެއްގެ ސިފަ އެ ކަންބަޅިން ސޫރަވި ނަމަވެސް އެއީ އިންސާނުންނާ ގުޅުން ހުރި ޖަނަވާރެއް ނޫން ކަމަށާއި، އެއީ އުފެދުމުގައި ދިމާވި އައިބު ތަކެއްގެ ސަބަބުން ކަންބަޅިއަށް އައި ބަދަލު ތަކެއް ކަމަށެވެ. އެއީ ބަނޑުގައި ކަންބަޅި ގަރުބަ ގަތްއިރު މައި ކަންބަޅިއަށް "ރިފްޓް ވެލީ ފީވަރ" ބަލި ޖެހުމުގެ ސަބަބުން މެދުވެރިވި ގޮތެއް ކަމަށްވެސް އޭނާ ވިދާޅުވިއެވެ.

އޭނާ ވިދާޅުވީ މިކަމާ ކަންބޮޑު ނުވުމަށާއި ބިރުގަންނަން ޖެހޭ ކަމެއް މިކަމުގައި މެދުވެރިވެފައި ނުވާ ކަމަށެވެ.