ހެކިންގެ ހެކިބަސް ނުލިބުމާ، މައްސަލަތައް ގިނަ ދުވަސްވުމާ ގުޅުމެއްވާކަން، ތަފާސް ހިސާބުތަކުން ސާފުކޮށް ދައްކާ: ޕީޖީ
އޮކްޓޯބަރު މަހު، ޑްރަގް ކޯޓު ފިޔަވައި، އެންމެ ގިނަ މައްސަލަ ނިންމެވީ ކްރިމިނަލް ކޯޓުން
ޕީޖީ ހުސައިން ޝަމީމް ނޫސްވެރިންގެ ބައްދަލުވުމެއްގައި ވާހަކަ ދައްކަވަނީ
ހެކިންގެ ހެކިބަސް ނުލިބުމާ، މައްސަލަތައް ގިނަ ދުވަސްވުމާ ގުޅުމެއްވާކަން، ތަފާސް ހިސާބުތަކުން ސާފުކޮށް ދައްކާކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް އެހެން ވިދާޅުވީ، "އޮކްޓޯބަރު މަހުގެ މަސްރިޕޯޓު ދިރާސާކުރުން" މި ސުރުޙީގެ ދަށުން އޭނާގެ ބްލޮގްގައި ޝާއިއު ކުރައްވާފައިވާ ލިއުމެއްގައެވެ.
މިއަހަރުގެ ޖަނަވަރީ މަހުން ފެށިގެން، ކޮންމެ މަހެއްގެ މަސްރިޕޯޓު، ޕީޖީ އޮފީހުގެ ވެބްސައިޓުގައި ޝާއިއު ކުރަމުންދާއިރު، ޝަމީމް ވަނީ އޮކްޓޯބަރު މަހުގެ ރިޕޯޓާއި ގުޅިގެން ފާހަގަވި ބައެއް ކަންކަން ބްލޮގްގައި ހިއްސާ ކުރައްވާފައެވެ. އެގޮތުން ކޮންމެ މަހެއްގެ ރިޕޯޓު ފުންކޮށް ދިރާސާކުރުމުން، ރަނގަޅުކުރަންޖެހޭ ކަންކަމާއި، އިތުރަށް މަސައްކަތްކުރަންޖެހޭ ދާއިރާތައް ސާފުވާ ކަމަށާއި، މިހާރު ރަނގަޅަށް ކުރެވޭ ކަންކަމާއި، އިތުރު ބަދަލުތައް ގެންނަންޖެހޭ ދާއިރާތައް އެނގިގެންދާކަން ޝަމީމް ފާހަގަ ކުރެއްވިއެވެ.
ޝަމީމް ވިދާޅުވީ، އޮކްޓޯބަރު މަހު، ޑްރަގް ކޯޓު ފިޔަވައި، އެންމެ ގިނަ މައްސަލަ ނިންމެވީ ކްރިމިނަލް ކޯޓުންނާއި މާލެ އަތޮޅުގެ ކޯޓުތަކުން ކަމަށެވެ. އެއީ 48 މީހެއްގެ މައްސަލައެވެ. އޭގެ ތެރެއިން 43 މީހެއްގެ މައްޗަށް ކުށް ސާބިތުވެފައިވާއިރު، 3 މީހެއްގެ މައްޗަށް ކުށް ސާބިތުވެފައެއް ނުވެއެވެ. މި މައްސަލަތަކަށް ބަލާއިރު މައްސަލަތައް ކާމިޔާބު ކުރެވުނު ރޭޓު 90 އިންސައްތައިގައި ހިފެހެއްޓިފައިވާކަން ޝަމީމް ފާހަގަ ކުރެއްވިއެވެ.
ދެން އެންމެ ގިނަ މައްސަލަ ނިންމެވީ ހދ އަތޮޅުންކަން ފާހަގަ ކުރައްވައި ޝަމީމް ވިދާޅުވީ، އެ އަތޮޅުން ނިންމެވި 15 މައްސަލައިގެ ތެރެއިން 9 މީހެއްގެ މައްސަލަ ސާބިތުވި ކަމަށެވެ.
ޝަމީމް ވަނީ އޭގެ ތެރެއިން ސާބިތުނުވާކަމަށް ނިމިފައިވާ މައްސަލަތަކަށްވެސް އަލިއަޅުވާލައްވާފައެވެ. އެގޮތުން ސާބިތުނުވި މައްސަލަތަކުގެ ދައުވާ ކޯޓަށް ހުށަހެޅިފައިވާ އަހަރުތަކަށް ބެލިއިރު އޮތީ، 2009، 2012، 2018 އަދި 2019 ގެ އެއް މައްސަލައާއި، 2020 ގެ ދެ މައްސަލައާއި 2021 ގެ އެއް މައްސަލަކަން ފާހަގަ ކުރައްވައި ޝަމީމް ވިދާޅުވީ، މިހުރިހާ މައްސަލައެއްވެސް ސާބިތުނުވެފައި އޮތީ ހެކިންގެ ހެކިބަސް ނުލިބިގެން ކަމަށެވެ.
ޝަމީމް ވިދާޅުވީ، ހެކިންގެ ހެކިބަސް ނުލިބުމާ، މައްސަލަ ނުނިމި ގިނަ ދުވަސްވުމާ ގުޅުމެއްވާކަން، މި ތަފާސް ހިސާބުތަކުން ސާފުކޮށް ދައްކާ ކަމަށެވެ.
އޭގެ އިތުރުން، ދެ މައްސަލައެއްގައި މަދަނީ މިންގަނޑުން ކުރިއަށް ނުގެންދެވޭނެކަމަށް ނިންމާފައިވާއިރު، އެ ދެ މައްސަލަވެސް ޕްރޮސެކިއުުޓަރ ޖެނެރަލް އޮފީހުން މިހާރު ވަނީ ދިވެހިރާއްޖޭގެ ހައިކޯޓުގައި އިސްތިއުނާފު ކޮށްފައެވެ.
ޝަމީމްގެ ބްލޮގްގައި ބަޔާން ކުރައްވާފައިވާ ގޮތުގައި އޮކްޓޯބަރު މަހު ސާބިތުވާކަމަށް ނިންމެވި މައްސަލަތައް ނިންމަވަން، އެވްރެޖްކޮށް 553 ދުވަސް ނެގިއެވެ. އަދި ސާބިތުނުވާކަމަށް ނިންމެވި މައްސަލަތައް ނިންމަވަން ނެގީ 870 ދުވަހެވެ.
ޝަމީމް ވަނީ ޕީޖީ އޮފީހުން ކޯޓުތަކަށް ހުށައެޅި މައްސަލަތަކަށްވެސް އަލިއަޅުވާލައްވާފައެވެ. އެގޮތުން އޮކްޓޯބަރު މަހު، 167 މައްސަލައެއްގައި، 225 މީހެއްގެ މައްޗަށް، 16 އަތޮޅެއްގެ ކޯޓުތަކަށް ދައުވާތައް ހުށަހަޅާފައިވާކަމަށް ޝަމީމް ވިދާޅުވިއެވެ. އޭގެ ތެރެއިންވެސް އެންމެ ގިނަ މައްސަލަ ހުށަހެޅިފައި އޮތް ފަސް ކޯޓަކީ، ކްރިމިނަލް ކޯޓު، ޑްރަގް ކޯޓު، ހުޅުމާލޭ މެޖިސްޓްރޭޓް ކޯޓު، އައްޑޫ ސިޓީ ހިތަދޫ މެޖިސްޓްރޭޓް ކޯޓު، އަދި އައްޑޫ ސިޓީ މީދޫ މެޖިސްޓްރޭޓް ކޯޓެވެ.
ޝަމީމް ވިދާޅުވާ ގޮތުގައި ހަމައެކަނި އޮކްޓޯބަރު މަހު ޕީޖީ އޮފީހަށް ބަލައިގަތް މައްސަލަތައް، ކޯޓަށް ހުށަހެޅުމުގެ ހުރިހާ މަރްޙަލާއެއްގައި ހޭދަވެފައިވަނީ 7 ދުވަހެވެ.
އޭގެ އިތުރުން، މިމަހު ކޯޓަށް ހުށަހެޅިފައިވާ މައްސަލަތަކުގެ ތެރެއިން 252 ދަޢުވާ އަކީ މިއަހަރުގެ ހާދިސާތަކާ ގުޅޭ ދައުވާތަކެއްކަމަށް ޝަމީމް ވިދާޅުވިއެވެ. 2021 ވަނަ އަހަރުގެ 34 ޙާދިސާ އަކާއި، 2020 ވަނަ އަހަރުގެ 12 ޙާދިސާވެސް މި މަހު ހުށައެޅިފައިވާ މައްސަލަތަކުގެ ތެރޭގައި ހިމެނެއެވެ.
ޝަމީމްގެ ބްލޮގްގައި ވިދާޅުވެފައިވާ ގޮތުގައި އޮކްޓޯބަރު މަހު އެންމެ ގިނައިން ހުށަހެޅިފައިވާ ފަސް ބާވަތުގެ މައްސަލަތަކަކީ، މަސްތުވާތަކެއްޗާގުޅޭ އެކިއެކި ދައުވާތަކާއި، ޓެރަރިޒަމާ ގުޅޭ ދައުވާތަކާއި، އެންޓި ޓޯޗަރގެ ޢަމަލުތަކާ ގުޅުންހުރި ދައުވާގެ އިތުރުން، ފުލުހުން ދައުރު އަދާކުރުމަށް ހުރަސްއެޅުމުގެ ދައުވާއެވެ. މި މައުލޫމާތުތަކަކީ ކުށް މަދުކުރަން ކުރާ މަސައްކަތާއި ޕޮލިސީ ހެދުމުގެ މަސައްކަތުގައި މުހިއްމު މައުލޫމާތުތަކަަކަށް ވާނެކަން ޝަމީމް ފާހަގަ ކުރެއްވިއެވެ.
