އދ. ދުވަސް ފާހަގަކުރުމުގެ ގޮތުން އާންމުންނަށް ހުޅުވައިލައިގެން ޚާއްސަ ހަރަކާތެއް ހުކުރު ދުވަހު ބާއްވައިފިއެވެ.

ހުކުރު ދުވަހުގެ ހަވީރު ދަރުބާރުގޭގެ ރަންނަބަނޑޭރި މާލަމުގައި ހަވީރު 16:00ން ރޭގަނޑު 19:00ށް ކުރިއަށް ގެންދިޔަ މި ހަރަކާތުގައި ރާއްޖޭގައި ހުންނަ އެކި ޤައުމުތަކުގެ އެމްބަސީން ވަނީ ބައިވެރިވެފައެވެ.

އޭގެ ތެރޭގައި ބަންގްލަދޭޝް، ޗައިނާ، އިންޑިއާ، ޖަޕާންގެ އިތުރުން ޕާކިސްތާން، ސައުދީ އަރަބިއްޔާ ސްރީލަންކާ އަދި އިނގިރޭސިވިލާތުގެ އެމްބަސީ ހިމެނެއެވެ.

މި ހަރަކާތް ޝަރަފުވެރިކޮށްދެއްވީ ޖެންޑަރ މިނިސްޓަރު އާއިޝަތު މުހައްމަދު ދީދީއެވެ.  މި ހަރަކާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ ރާއްޖެއަކީ ކިތަންމެ ކުޑަ ޤައުމަކަށް ވިޔަސް، އަހަރުމެންގެ "ބަހާއި އަމަލު" މުހިންމުވާކަން މި ސަރުކާރުން ސާބިތުކޮށްދީފައިވާ ކަމަށެވެ. އަދި މިނިސްޓަރު ވިދާޅުވީ ކޮވިޑުގެ ހާލަތުން ލިބިގެންދިޔަ ފިލާވަޅަކީ އެއްބައިވަންތަކަން ކަމަށާއި އެއްވެސް ޤައުމަކުން އެއް ޤައުމު އަނެއް ޤައުމުގެ އެހީތެރިކަމާއި ނުލާ މިފަދަ ބޮޑު ކާރިސާއަކުން އަރައިނުގަނެވޭނެކަން ކަމަށެވެ.

ޔޫއެންޑީޕީގެ ރެސިޑެންސް ކޯޑިނޭޓަރު ކެތްރިން ހޭސްވެލް ވެސް މި ހަރަކާތުގައި ބައިވެރިވެވަޑައިގެންނެވިއެވެ.

މި ހަރަކާތުގައި ވާހަކަ ދައްކަވަމުން ކެތްރިން ވިދާޅުވީ މި ހަރަކާތް ކުރިއަށް ގެންދިޔައީ ރާއްޖޭގެ ފޮރިން މިނިސްޓްރީގެ އެހީތެރިކަމާއެކު ކަމަށެވެ. އަދި ކޮވިޑުގެ ހާލަތުގައި ވެސް އެކި ޤައުމުތަކުން އެމްބަސީން އެހީތެރިކަން ފޯރުކޮށްދީފައިވާ ކަމަށެވެ. އަދި ރާއްޖެ އާއި އޮތް ގުޅުން އިތުރަށް ބަދަހިކުރުމަށް އދ އިން މަސައްކަތް ކުރައްވާނެ ކަމަށް ވެސް ވިދާޅުވިއެވެ.

މި ހަވީރުގައި ކުޑަކުދިންނަށް ޚާއްސަ ގިނަ ގޭމް ސްޓޯލްތަކަކާއި މައުލޫމާތު ހިއްސާކުރުމަށް ހަރަކާތްތަކެއް ކުރިއަށް ގެންގޮސްފައިވާއިރު ގައުމުތަކުގެ ސަގާފަތް ދައްކުވައިދޭ ސްޓޯލްތައް ވަނީ ބަހައްޓާފައެވެ.

އދ. ދުވަހަކީ 1945 ވަނަ އަހަރު އދ. ގެ ޗާޓަރަށް އަމަލުކުރަން ފެށި ދުވަހާ ގުޅުވައިގެން ކޮންމެ އަހަރެއްގެ އޮކްޓޯބަރު 24 ގައި ފާހަގަ ކުރަމުން އަންނަ ދުވަހެކެވެ.