ދުބާއީގައި މަސައްކަތްކުރާ އިންޑިޔާ ރައްޔިތަކަށް ނަސީބު ނަންބަރަކުން 25 މިލިއަން ދިރުހަމް!!
4 ނޮވެމްބަރު 2022 | ހުކުރު 19:05ނަސީބު ނަންބަރު ގަތުމުގައި އޭނަ އާ އެކު ބައިވެރިވި އެންމެނަށް ފައިސާ އިން ބައި އަޅާނެ
ލަކީ ޑްރޯ ކާމިޔާބު ކުރި ސަޖޭޝް
ދުބާއީގެ ހޮޓަލެއްގައި މަސައްކަތް ކުރާ އިންޑިޔާގެ ރައްޔިތަކަށް ނަސީބު ނަންބަރެއް ގަނެގެން 25 މިލިއަން ދިރުހަމް ލިބިއްޖެއެވެ. ނަސީބު ނަންބަރު ދިމާކުރެވުނު ސަޖޭޝް ޔޫއޭއީ އަށް ގޮސްފައިވަނީ މީގެ ދެ އަހަރު ކުރިން އޮމާނުން ކަމަށް ވެއެވެ. އޭނާ ފާއިތުވި ހަތަރު އަހަރު ކޮންމެ މަހަކު ވެސް ނަސީބު ނަންބަރު ގަންނަ ކަމަށް ވެއެވެ.
އޮންލައިންކޮށް ނަސީބު ޓިކެޓު ގަންނަމުން ދާއިރު މިފަހަރުގެ ޓިކެޓު ގަތުމުގައި އޭނަ އާ އެކު މަސައްކަތްކުރާ އިތުރު ވިހި މީހުން ބައިވެރިވި ކަމަށް ވެއެވެ. އެހެން ކަމުން ސަޖޭޝް ބުނާގޮތުން މި ހުރިހާ އެންމެންނަށް ވެސް ފައިސާ އިން ބައި އަޅާނެއެވެ.
އޭނަ މަސައްކަތްކުރާ ހޮޓަލުގައި 150 މުވައްޒަފުން މަސައްކަތް ކުރާ ކަމަށާއި މި ލިބުނު ފައިސާ އިން ވީހާ ވެސް ގިނަ މީހުންނަށް އެހީވާން ބޭނުން ކަމަށް އޭނާ ބުނެފައިވާކަމަށް ގަލްފް ނިއުސް އާ ހަވާލާދީ ވިއޯންގައި ރިޕޯޓުކޮށްފައިވެއެވެ.
މިލިއަނަރަކަށް ވީ ނަމަވެސް ކުރިޔަށް އޮތް ތަނުގައި ވެސް ނަސީބު ނަންބަރު ގަތުން ހުއްޓާނުލާނެ ކަމަށް ސަޖޭޝް ބުނެފައިވާ ކަމަށް ވެއެވެ.
