އަހަރުގެ މިހާތަނަށް ދައުލަތަށް އާމްދަނީއާ ހިލޭ އެހީގެ ގޮތުގައި 21.6 ބިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން މިއީ ފާއިތުވި އަހަރުގެ މި މުއްދަތާ އަޅާ ބަލާއިރު 5 ބިލިއަން ރުފިޔާ އިތުރު އަދަދެކެވެ. 2021 ވަނަ އަހަރުގެ މި މުއްދަތުގައި ދައުލަތަށް އާމްދަނީއާ ހިލޭ އެހީގެ ގޮތުގައި ލިބިފައިވަނީ 15.9 ބިލިއަން ރުފިޔާއެވެ.

އަހަރުގެ މިހާތަނަށް އެންމެ ބޮޑު އާމްދަނީއެއް ދައުލަތަށް ލިބިފައިވަނީ ޓެކްސްއިނެވެ. 15.5 ބިލިއަން ރުފިޔާގެ އާމްދަނީ ޓެކުހުން ލިބިފައިވާކަމަށް މިނިސްޓްރީން ހާމަކުރެއެވެ. މިގޮތުން އާންމު މުދަލާއި ޚިދުމަތުގެ އަގުން ނަގާ ޓެކުހުގެ ގޮތުގައި 2.3 ބިލިއަން ރުފިޔާ ދައުލަތަށް ވަނީ ލިބިފައެވެ. އަދި ފަތުރުވެރިކަމުގެ މުދަލާއި ޚިދުމަތުގެ އަގުން ނަގާ ޓެކުހުގެ ގޮތުގައި 5.1 ބިލިއަން ރުފިޔާ ލިބިފައިވާކަމަށް ތަފާސްހިސާބުން ދައްކައެވެ.

ވިޔަފާރިއާއި ޕްރޮޕަޓީ ޓެކްސްގެ ގޮތުގައި 3.9 ބިލިއަން ރުފިޔާ ލިބިފައިވެއެވެ. އިމްޕޯޓް ޑިއުޓީން 2.4 ބިލިއަން ރުފިޔާ އަދި ގްރީން ޓެކްސްގެ ގޮތުގައި 776 މިލިއަން ރުފިޔާ ލިބިފައިވާއިރު، އެއަރޕޯޓް ސާވިސް ޗާޖުގެ ގޮތުގައި 635.5 މިލިއަން ރުފިޔާ ލިބިފައިވާކަމަށް ފިނޭންސް މިނިސްޓްރީން ހާމަކުރެއެވެ.

މީގެ އިތުރުން ޓެކްސް ނޫން އެހެނިހެން ގޮތްގޮތުން 5.9 ބިލިއަން ރުފިޔާގެ އާމްދަނީއެއް ލިބިފައިވާކަމަށް ފިނޭންސް މިނިސްޓްރީން ބުނެއެވެ. އެގޮތުން ފީއާއި ޗާޖުގެ ގޮތުގައި 2 ބިލިއަން ރުފިޔާ ލިބިފައިވާއިރު، ރެޖިސްޓްރޭޝަން އަދި ލައިސަންސް ފީގެ ގޮތުގައި 638 މިލިއަން ރުފިޔާ ލިބިފައިވެއެވެ. ދައުލަތުގެ ބިންތަކުން ލިބުނު އާމްދަނީ 1.7 ބިލިއަން ރުފިޔާއަށް އަރާއިރު، ޖޫރިމަނާގެ ގޮތުގައި 205 މިލިއަން ރުފިޔާ ލިބިފައިވެއެވެ. އަދި އެހެނިހެން ގޮތްގޮތުން 375 މިލިއަން ރުފިޔާގެ އާމްދަނީއެއް ލިބިފައިވާކަމަށް ފިނޭންސް މިނިސްޓްރީގެ ތަފާސްހިސާބުން ހާމަކުރެއެވެ.

ކެޕިޓަލް ރިސިޕްޓުގެ ގޮތުގައި 14.7 މިލިއަން ރުފިޔާ ލިބިފައިވާއިރު، 308 މިލިއަން ރުފިޔާގެ ހިލޭ އެހީ ލިބިފައިވާކަމަށް ފިނޭންސް މިނިސްޓްރީން ވަނީ ހާމަކޮށްފައެވެ.