ޓީ20 މޯލްޑިވްސް ޕްރިމިއަރ ލީގުގެ ޗެމްޕިއަން މިލާން ކްރިކެޓް އެކެޑަމީއަށް ތަށި ހަވާލުކޮށްފި
4 ނޮވެމްބަރު 2022 | ހުކުރު 05:57މިލާން ކްރިކެޓް އެކެޑަމީން ލީގު ހޯދީ މެޗަކުން ބަލިނުވެ
މިލާން ކްރިކެޓް އެކެޑަމީން ޗެމްޕިއަން ޓްރޮފީ އާ އެކު
ޓީ20 މޯލްޑިވްސް ޕްރިމިއަރ ލީގުގެ ޗެމްޕިއަން މިލާން ކްރިކެޓް އެކެޑަމީން ތަށި އުފުލާލައިފިއެވެ.
ބާކީ މެޗެއް އޮއްވާ ޗެމްޕިއަންކަން ކަށަވަރުކުރި މިލާން ކްރިކެޓް އެކެޑަމީން ޗެމްޕިއަން ޓްރޮފީ އުފުލާލީ ލީގުގެ 43 ވަނަ މެޗުގައި 22 ލަނޑުން ވިޔަންސާ ބަލިކުރުމަށްފަހުއެވެ. ބުރާސްފަތި ދުވަހު މިލާން ކްރިކެޓް އެކަޑަމީން ކުޅުނު ފަހު މެޗުގައި އެޓީމުން ވަނީ 20 އޯވަރު ހަމަވިއިރު ހަތް ކުޅުންތެރިން ނުބައިވެގެން 147 ލަނޑު ހަދާފައެވެ. ވިޔަންސާގެ ހުރިހާ ކުޅުންތެރިން 17 ވަނަ އޯވަރުގައި ނުބައިވިއިރު ހެދުނީ 125 ލަނޑެވެ. ލީގު މިލާން ކްރިކެޓް އެކެޑަމީން ކާމިޔާބުކުރީ މެޗަކުން ބަލިނުވެއެވެ. މެޗަކުން ބަލިނުވެ ލީގު ނިންމާލި ހަމައެކަނި ޓީމަކީ ވެސް މިލާން ކްރިކެޓް އެކެޑަމީއެވެ. ލީގުގައި ކުޅުނު ނުވަ މެޗުގައި މިލާން ކްރިކެޓް އެކެޑަމީން ވަނީ 1236 ލަނޑު ހަދާފައެވެ. 66 ވިކެޓް ނެގިއެވެ.
ލީގުގެ ދެވަނަ ހޯދީ މާލޭ ވެޓަރެންސް ކްލަބެވެ. ލީގުގެ ގަދަ ހަތަރު ޓީމާ އެކު ކުރިއަށް އޮންނާނީ ޓީ20 ޕްރެޒިޑެންޓް ކަޕެވެ.
