އިމްރާން ޚާނަށް ފަރުވާދެއްވުމަށް ގެންދިޔައީ ލާހޯރްގެ ހޮސްޕިޓަލަކަށް
ހަމަލާދިނުމަށްފަހު އެމީހާ ވަނީ ފިލަން މަސައްކަތްކޮށްފައި
ޕާކިސްތާނުގެ ކުރީގެ ބޮޑުވަޒީރު އިމްރާން ޚާނަށް ބަޑިން ހަމަލާދީފައި ވަނީ އެމަނިކުފާނުގެ ސަޕޯޓަރުންނާއެކު މުޒާހަރާކުރައްވަނިކޮށް
ޕާކިސްތާންގެ ކުރީގެ ބޮޑުވަޒީރު އިމްރާން ޚާނަށް ދިން ބަޑީގެ ހަމަލާގައި ލިބިވަޑައިގަތް އަނިޔާތަކަށް ފަރުވާހޯއްދެވުމަށް އެމަނިކުފާނު ލާހޯރްގެ ހޮސްޕިޓަލަށް ގެންދެވިފައިވާކަމަށް މީޑިއާ ރިޕޯޓުތައް ބުނެފިއެވެ.
އިމްރާން ޚާނަށް އަމާޒުކޮށް ބަޑީގެ ހަމަލާއެއް ދީފައިވަނީ, އަވަސް އިންތިޚާބެއް ބޭއްވުމަށް ގޮވާލައްވައި، އެމަނިކުފާނުގެ ސަޕޯޓަރުންނާއެކު މުޒާހަރާކުރައްވަމުން ދަނިކޮށް، ބުރާސްފަތި ދުވަހުއެވެ. މިހަމަލާގައި އެމަނިކުފާނުގެ ފައިންޕުޅަށް ވަނީ ވަޒަން އަރާފައެވެ.
މިހާދިސާ ހިނގާފައިވަނީ ޕާކިސްތާނުގެ ވެރިރަށް އިސްލާމްއާބާދާ 120 މޭލު ދުރުގައި އޮންނަ ވަޒީރުއާބާދުގައެވެ.
ހަމަލާދިނުމަށްފަހު އެމީހާ ވަނީ ފިލަން މަސައްކަތްކޮށްފައެވެ.
އޭނާ މިހާރު ފުލުހުންގެ ބެލުމުގެދަށުގައި ހުރިއިރު، އޭނާ މަސައްކަތްކުރީ އަމިއްލައަށް، އެކަނިކަމަށް އޭނާ ބުނާ ވީޑިއޯއެއް ފުލުހުން ވަނީ އާންމުކޮށްފައެވެ. މި ވީޑިއޯގައި އޭނާ ވަނީ، އިމްރާން ޚާން ގެންދަވަނީ ގައުމުގެ އާންމުންނަށް އޮޅުވާލައްވަމުންކަމަށާއި އެހެންކަމުން އޭނާ ބޭނުންވީ އިމްރާން ޚާން އަވަހާރަކޮށްލަން ކަމަށްވެސް ބުނެފައެވެ.
މިހާދިސާއާ ގުޅިގެން އެެއްވެސް މީހަކަށް އަދި ދައުވާއެއް ނުކުރެއެވެ.
އިމްރާން ޚާން ނިސްބަތްވެވަޑައިގަންނަވާ، ޕާކިސްތާން ތަހްރީކީ އިންސާފް ޕާޓީގެ މެމްބަރަކާ ހަވާލާދީ ރޮއިޓަރސްއިން ރިޕޯޓުކޮށްފައިވާގޮތުން، މިހާދިސާގައި އިމްރާންގެ އިތުރުން އެވަގުތު އެމަނިކުފާނާއެކު ހަރަކާތްތެރިވަމުންދިޔަ އިތުރު މީހުންނަށްވެސް ވަނީ އަނިޔާވެފައެވެ. އަދި މިހާދިސާގައި އެކަކު މަރުވެފައިވާކަމަށްވެސް ރިޕޯޓުކޮށްފައިވެއެވެ.
އިމްރާން ޚާނަށް ދިން މިހަމަލާ ގައުމުގެ މިހާރުގެ ބޮޑުވަޒީރު ޝަހްބާޒް ޝަރީފް ވަނީ ކުށްވެރިކުރައްވާފައެވެ. އަދި މިހާދިސާ ތަހުގީގުކުރުމަށް އިންޓީރިއަރ މިނިސްޓަރަށް ވަނީ އަންގަވާފައެވެ.
