އާރްބީ ލައިޕްޒިގަށް ކުޅެމުން އަންނަ ޖަރުމަނުގެ ފޯވާޑް ޓިމޯ ވާނާއަށް އަނިޔާވެ ކުޅުމާ ދުރަށް ދާން ޖެހިއްޖެއެވެ.

ވާނާއަށް އަނިޔާވެފައިވަނީ ޔުއެފާ ޗެމްޕިއަންސް ލީގުގައި ލައިޕްޒިގުން ޝަޚްތަރު ޑޮނެސްކާ ދެކޮޅަށް ކުޅުނު މެޗުގައެވެ. މެޗުގައި ވާނާއަށް ލިބުނު އަނިޔާއާ ގުޅިގެން ބުރާސްފަތި ދުވަހު ވަނީ އިތުރު މެޑިކަލް ޓެސްޓުތައް ކުރިއަށް ގެންގޮސްފައެވެ. މެޑިކަލް ޓެސްޓުތަކުން ދައްކާގޮތުގައި ވާނާގެ ވާއަތު ފައިގެ ކަކުލުގެ ލިގަމެންޓަށް ވަނީ އަނިޔާވެފައެވެ. އަނިޔާގެ ސަބަބުން އަހަރުގެ ބާކީ ބައި އެއްކޮށް ވާނާ ހުންނަން ޖެހޭނީ ކުޅުމާ ދުރުގައެވެ. އެހެންކަމުން މި މަހުގެ 20 ވަނަ ދުވަހު ފަށާ ވޯލްޑް ކަޕުންވެސް ވާނާ ނުފެންނާނެއެވެ. ވާނާއަކީ ޖަރުމަނުގެ ގައުމީ ޓީމުގައި ހިމެނޭ މުހިންމު ކުޅުންތެރިޔެކެވެ.

ޕްރިމިއަރ ލީގުގެ ޗެލްސީ ދޫކޮށް ވާނާ ލައިޕްޒިގަށް ބަދަލުވީ މި ސީޒަންގައެވެ. ޗެލްސީގައިވެސް އޭނާ މޮޅު ކުޅުމެއް ދެއްކިއިރު، ލައިޕްޒިގުގައިވެސް އަންނަނީ އެ ކުޅުން ތަކުރާރު ކުރަމުންނެވެ. ވާނާ ވަނީ މިހާތަނަށް ލައިޕްޒިގަށް ކުޅެދިން 16 މެޗުގައި ނުވަ ލަނޑު ޖަހާފައެވެ. މި ސީޒަނުގެ ޖަރުމަނު ލީގުގައި ލައިޕްޒިގުން ހޯދަމުން އަންނަ މޮޅުވުންތަކުގައި ވާނާގެ ދައުރު ބޮޑެވެ. ދެ ވަނަ ފަހަރަށް ވާނާ ލައިޕްޒިގަށް ބަދަލުވީ ހަތަރު އަހަރުގެ އެއްބަސްވުމެއްގެ ދަށުންނެވެ.

ޖަރުމަނުގެ ގައުމީ ޓީމަށް ވާނާ ކުޅެން ފެށީ 2017 ވަނަ އަހަރުއެވެ. އޭގެ ފަހުން އޭނާ ވަނީ ގައުމީ ޓީމަށް ކުޅެދިން 55 މެޗުގައި 14 ލަނޑު ޖަހާފައެވެ.