މާލީ މައްސަލަތަކެއް ދިމާވެފައިވާ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް އަނެއްކާ ވެސް ސިވިލް ކޯޓުގެ ޙުކުމެއް އަތުވެއްޖެއެވެ.
އޭޑީކޭގެ ފަރާތުން ސިވިލް ކޯޓަށް ދައުވާ ހުށަހެޅީ މިއަހަރުގެ ފެބްރުއަރީ މަހުގެ ފަސް ވަނަ ދުވަހާ ހަމައަށް އެފްއޭއެމުން އެ ހޮސްޕިޓަލަށް ދައްކަން ޖެހޭ ފައިސާ ހޯދުމަށެވެ. މައްސަލައިގައި އޭޑީކޭ އިން ވަނީ އެފްއޭއެމުން އެ ހޮސްޕިޓަލުން ޚިދުމަތް ހޯދާފައިވާ 15 އިންވޮއިސް އެއް ޝަރީއަތަށް ހުށަހަޅާފައެވެ. އެ އިންވޮއިސްތަކުގެ ޖުމުލަ އަދަދަކީ 1،703،084/75 (އެއް މިލިއަން ހަތް ލައްކަ ތިން ހާސް އަށްޑިހަ ހަތަރު ރުފިޔާ ހަތް ދިހަ ފަސް ލާރި)އެވެ. އޭޑީކޭ އިން އެދިފައިވަނީ އެ ފައިސާ އެކީ އެއްފަހަރާ ދެއްކުމަށެވެ.
ދައުވާގެ ޖަވާބުގައި އެފްއޭއެމުން ވަނީ ކޯޓުގައި އެ އަދަދަށް އެއްބަސްވެފައެވެ. ނަމަވެސް އެފްއޭއެމުން ބުނެފައިވަނީ އެ ފައިސާ އެކީ އެއްފަހަރާ ދެއްކުމަކީ ދަތި އެހާމެ އުނދަގޫ ކަމަކަށްވާނެ ކަމަށެވެ. އެހެންކަމުން މިލާދީ 12 މަސް ދުވަހަށް ބަހާލައިގެން ކޮންމެ މަހަކު ވެސް އެ މަހަކަށް ޖެހޭ މިންވަރަށްވުރެ މަދު ނޫން އަދަދަކުން ދައްކަމުން ގޮސް، އެ ދަރަނި ޚަލާސް ކުރުމަށް ސިވިލް ކޯޓުން އަމުރުކޮށްދިނުމަށް ވެސް އެފްއޭއެމުން ވަނީ އެދިފައެވެ. ނަމަވެސް އޭޑީކޭ ހޮސްޕިޓަލުން ވަނީ އެފްއޭއެމްގެ އެދުމަށް ދެކޮޅު ހަދާފައެވެ. އެފްއޭއެމުން މުޅި ދައުވާ އަށް އެއްބަސްވެފައިވާތީ މައްސަލަ އާ ގުޅިގެން ހުށަހަޅާފައިވާ ހެކި ޝަރީއަތުން ވަޒަންކޮށްފަ އެއް ނުވެއެވެ.
މިކަމުގައި ޝަރީއަތުން ބުރަވަނީ ހައްޤުގެ ވެރި ފަރާތުން އެ ހައްޤާ މެދު ލުޔެއް ނުދޭހާ ހިނދަކު، ޝަރުއީ އަދި ޤާނޫނީ އުސޫލުތައް ނިޔާ ކުރަނީ އެ ހައްޤުގެ ވެރި ފަރާތަށް ހައްޤު ލިބެވެން އޮތް އެންމެ އަވަސް މުއްދަތެއްގައި ލިބިދިނުމަށް ކަމަށް މައްސަލަ ބެއްލެވި ޤާޟީ އަޙުމަދު ނިމާލް ޖުނައިދު ކުރެއްވި ޙުކުމުގައި ބަޔާންކޮށްފައިވެއެވެ. ބުދަ ދުވަހު ސިވިލް ކޯޓުން ކުރި ޙުކުމުގައި ބުނަނީ އެފްއޭއެމުން އޭޑީކޭ އަށް ދައްކަން ޖެހޭ ފައިސާ އެކީ އެއް ފަހަރާ އެއް މަސް ދުވަހުގެ ތެރޭގައި ދެއްކުމަށެވެ.
މިދިޔަ ސެޕްޓެމްބަރު މަހުގެ ތެރޭގައި ވެސް ސިވިލް ކޯޓުން ވަނީ އެފްއޭއެމަށް ޙުކުމެއް ކޮށްފައެވެ. އެއީ އެފްއޭއެމުން އެ ހޮސްޕިޓަލަށް ދައްކަން ޖެހޭ 152،082/93 (އެއް ލައްކަ ފަންސާސް ދެ ހާސް ދެ ރުފިޔާ ނުވަދިހަ ތިން ލާރި) ހަތް މަސް ދުވަހުގެ ތެރޭގައި ދެއްކުމަށެވެ. އެ މައްސަލައިގައި ވެސް އެފްއޭއެމުން ވަނީ ދައުވާ އަށް އިއުތިރާފުވެފައެވެ.
މިފަހަކަށް އައިސް އެފްއޭއެމަށް ވަނީ މާލީ ގޮތުން ބޮޑެތި މައްސަލަތަކާ ކުރިމަތިލާން ޖެހިފައެވެ. ޤައުމީ ޓީމުގެ ކުރީގެ ކޯޗުންނާއި، އެސިސްޓެންޓު ކޯޗުންނަށް ބަދަލު ދިނުމަށް ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ އެންގުންތަކެއް ވެސް ވަނީ އެފްއޭއެމަށް އައިސްފައެވެ.
