ދެ ވަނަ މެޗުގައި ޗެލްސީން ޑައިނަމޯ ޒަގްރެބް ބަލިކޮށްފި

ޔުއެފާ ޗެމްޕިއަންސް ލީގު ގްރޫޕް އީގައި ޗެލްސީން ޑައިނަމޯ ޒަގްރެބް ބަލިކޮށްފިއެވެ.

ގްރޫޕް ސްޓޭޖުގައި މި ދެ ޓީމުގެ ފުރަތަަމަ މެޗު ކުޅުނީ ޒަގްރެބްގެ ދަނޑުގައެވެ. އެ މެޗުގައި އެ ޓީމުން ވަނީ 0-1 އިން ޗެލްސީ ބަލިކޮށްފައެވެ. އެ ނަތީޖާ އާ އެކު އޭރު ޗެލްސީގެ ކޯޗު މަގާމުން ވަކިކުރިއެވެ. ދެ ވަނަ މެޗުގައި ޗެލްސީގެ ދަނޑުގައި ޒަގްރެބާ ދެކޮޅަށް ނުކުތްއިރު ވެސް ޗެލްސީ ވަނީ ދެ ވަނަ ބުރުން ޖާގަ ހޯދާފައެވެ. ދެ ވަނަ މެޗުގައި 1-2 އިން ޒަގްރެބް ބަލިކޮށް ޗެލްސީން ވަނީ މި ގްރޫޕްގެ އެއް ވަނަ ހޯދާފައެވެ.

ޗެލްސީގެ ދަނޑުގައި އެންމެ ފުރަތަމަ ލަނޑު ޖަހާ ލީޑު ނެގީ ވެސް ޒަގްރެބުންނެވެ. މެޗުގެ ހަތް ވަނަ މިނެޓުގައި އެ ޓީމަށް ލީޑު ނަގައިދިނީ ބްރޫނޯ ޕްޓެކޮވިޗްއެވެ. ނަމަވެސް 18 ވަނަ މިނެޓުގައި ޗެލްސީން ވަނީ ނަތީޖާ ހަމަހަމަކޮށްފައެވެ. އޮބާމަޔަން ތަނަވަަސްކޮށްދިން ފުރުސަތެއްގައި ޗެލްސީ އަށް ނަތީޖާ ހަމަހަމަކޮށްދިނީ ރަހީމް ސްޓާލިންއެވެ. ޗެލްސީ މޮޅުވި ލަނޑު 30 ވަނަ މިނެޓުގައި ޖެހީ ޑެނިސް ޒަކަރިއާއެވެ.

ޗެލްސީ މި ގްރޫޕްގެ އެއް ވަނަ ހޯދީ ކުޅުނު ހަ މެޗުން 13 ޕޮއިންޓާއެކުއެވެ. ދެ ވަނަ ލިބެނީ އޭސީ މިލާނަށެވެ. ޗެލްސީ އަތުން ބަލިވި ޒަގްރެބް އޮތީ ހަތަރު ޕޮއިންޓާއެކު ފުލުގައެވެ. ހަ ޕޮއިންޓާއެކު ތިން ވަނަ ލިބެނީ ސަލްސްބާގަށެވެ.