ކޮންމެ އަހަރަކުވެސް ޖޫން ޖުލައިގެ ވިއްސާރައަކީ އޭގެ ސަބަބުން މަދިރި އާލާވެ، މަދިރި އުފެދުން އިތުރުވެ، ވައިރަލްހުންތައް އާންމުވެގެންދާ ދުވަސްވަރެކެވެ. އެހެން އަހަރުތަކެކޭވެސް އެއްފަދައިން މި އަހަރުވެސް މި ދުވަސްވަރުން ފެށިގެން ދުވާފަރުގައި ވައިރަލްހުމުގެ އިތުރުން ޑެންގީ ހުން ހަލުވިކަމާއިއެކު ފެތުރެން މިވަނީ ފަށައިފައެވެ.

ޑެންގީ ހުން ޖެހިގެން މިދިޔަ މަހުގައި އެކަނިވެސް ދުވާފަރުންވަނީ 9 އަހަރުގެ ކުޑަކުއްޖަކާއި 21 އަހަރުގެ ޒުވާނެއް މިދުނިޔެ ދޫކޮށްފައެވެ. އަދި ހާލުދެރަވެގެން އިމަޖެންސީގައި އުނގޫފާރު ރީޖަނަލް ހޮސްޕިޓަލަށާއި މާލެއަށްވެސް އެތައްބަޔަކު ގެންގޮސްފައިވެއެވެ. މި ފަދަ ހާދިސާތަކުގެ ސަބަބުން ދުވާފަރުގެ ރައްޔިރުން މިވަގުތު ތިބީ ވަރަށްބޮޑު ކަންބޮޑުވުމެއްގެ ތެރޭގައިކަމަށް އެރަށުން ބުނެއެވެ.

މިކަމާއި ގުޅިގެން ދުވާފަރު ސިއްޙީ މަރުކަޒުގެ މެނޭޖަރު މުޙައްމަދު ޢަލީ ވިދާޅުވީ ޑެންގީ ކެސްއެއް ފުރަތަމަ ދުވާފަރުގައި ޕޮޒިޓިވްވި ދުވަހުން ފެށިގެން މިއަދާއި ޖެހެންދެންވެސް ޑެންގީ ރެޕިޑް ޓެސްޓް ކިޓް ހުސްނުކޮށް ދުވާފަރު ހެލްތް ސެންޓަރުގައި ހުންނާނެކަމަށާއި މިދިޔަ މަހުގެތެރޭގައި ތިންފަހަރެއްގެ މަތިން ޑެންގީ ރެޕިޑް ޓެސްޓްކިޓް އެއާރ ޕްރައިޓްކޮށް ދާއިރާގެ މެމްބަރުގެ އެހީތެރިކަމާއި އެކު ގެނެސްފައިވާކަމަށެވެ.

އަދި ޑޮކްޓަރަށް ދެއްކުމުގައި ދަތިކަމެއް ދިމާވަނީ ހުރިހާ ރައްޔިތުންހެން ރޭގަނޑާއި ދިމާކޮށް އެއްފަހަރާ ޑޮކްޓަރަށް ދައްކަން އަންނާތީކަމަށާއި ޓެސްތްތައް ހެދުމަށް ދަތިކަމެއް ކުރިމަތިވެފައިވަނީ އެންމެ ލެބް ޓެކްނީޝަނެއް ހުންނާތީ ކަމަށް ހެލްތު މެނޭޖަރު ވިދާޅުވިއެވެ. ނަމަވެސް މިމައްސަލައަށްވެސް ދާއިރާގެ މަޖިލިސް މެމްބަރ އިސްމާއީލް އަޙްމަދުގެ ފުރިހަމަ އެހީތެރިކަމާއި އެކު މިހާރު ހައްލު ކުރެވިފައިވެއެވެ. އެގޮތުން މިވަގުތު ދެ ޓެކްނީޝަނުން މަސައްކަތްކުރަމުންދާ ކަމަށް އޭނާވިދާޅުވިއެވެ.

އަދި ޓެސްޓްތައް ހެދުމަށްވެސް ވަކި އުސޫލެއްކަނޑައަޅައި ކިއު ނަންބަރު ދޫކުރުމަށާއި ޓެސްޓް ނަތީޖަތައް ދެއްކުމަށް ވަކި އުސުލެއް ހެދުމުގެ މަޝްވަރާތައް ކުރިއަށްދާކަމަށް މެނޭޖަރު ވިދާޅުވިއެވެ.

އަދި ޑެންގީ ހުމުގެ އިތުރުން ވައިރަލް ފީވަރތަކަށް ބޭނުންވާނެ ހުރިހާ ވަސީލަތަކާއި ބޭހެއް މިއިން ދުވަހަކުވެސް ސިއްޙީމަރުކަޒުގެ ސްޓޮކަށް ނުލިބޭވަރުގެ ބޮޑުސްޓޮކެއް ލިބިފައި ހުރިކަމަށާއި، އިމަޖެންސީ ހާލަތްތަކަށް ބޭނުންވާނެ އާލާތްތައް މަދުނުވެ ހުންނާނެކަމަށް ސިއްޙީ މަރުކަޒުން މައުލޫމާތުދެއެވެ.

ޑެންގީ ހުން އެ އަތޮޅުތެރެއިން ފުރަތަމަ ފެނުނު ހިސާބުން ފެށިގެން ދުވާފަރު ކައުންސިލާއި އެކު މަޝްވަރާކުރެވި އެޅިފައިވާ ފިޔަވަޅުތަކުގެ ތެރޭގައި ސޯޝަލް މީޑިއާ މެދުވެރިކޮށް މަޢުލޫމާތު ދިނުމާއި، މަދިރި އުފެދި އާލާވާފަދަ ތަކެއްޗާއި ތަންތަން ބަލައި ޗެކްކުރުމުގެގޮތުން ރަށުގެ ސަރަހައްދުތަކުގެ އިންސްޕެކްޝަނެއް އަދި އާއްމުން ހޭލުންތެރިކުރުމުގެ ގޮތުން ޑެންގީ ހުމުން ރައްކާތެރިވާނެގޮތުގެ އިރުޝާދުތައް މެގަފޯނުން ރަށުތެރޭގައި ގޮވައި ހޭލުންތެރިކުރެވިފައިވެއެވެ.

މީގެ އިތުރުން ސްކޫލުތަކުގެ ބެލެނިވެރިންނަށް ޑެންގީ ހުމާއިގުޅޭގޮތުން މަޢުލޫމާތު ދިނުމާއި، ޑެންގީ ހުން ޖެހޭ ބަލިމީހުން ދުވާފަރުން ފެންނަމުން ދާތީ، މުއައްސަސާތަކާއެކު ކައުންސިލުން ބައްދަލުކޮށް، ސެޕްޓެމްބަރ މަހުގެ ތެރޭގައި އާއްމުން މިކަމަށް ސަމާލުވުމަށް ސޯޝަލް މީޑިއާ ގައި މައުލޫމާތު ހިއްސާކުރެވުނެވެ.

ދުވާފަރު ހެލްތު ސެންޓަރުން ބުނީ މި  ދަނޑިވަޅަކީ ހުރިހާ ރައްޔިތުންހެން މި ބަލި މަޑުކަމުގައި ހޭދަކުރަމުންދާ ދުވަސްވަރެއްކަމުން ދަތިތަކާއި ކުރިމަތިލާން ޖެހިދާނެކަން އެންމެންވެސް ދަނެގެން، މިކަމުން އަރައިގަތުމަށް ސިއްޙީ މަރުކަޒުން ކުރާ މަސައްކަތުގައި އެންމެންގެ އެއްބާރުލުމާއި އެހީތެރިކަން ބޭނުންވާ ކަމަށެވެ.

މީގެ އިތުރުންވެސް އާއްމު ފަރުދުންގެ ޒިންމާ ނަންގަވައި ތިމާ ދިރިއުޅޭ ގޭގައި މަދިރި އާލާވާގޮތަށް ހުންނަ ތަންތަނާއި ތަކެތި ނައްތާލައި، ވައިރަލް ފީވަރ އަދި ޑެންގީ ހުން އިތުރުވަމުންދާތީ އެކަމަށް ސަމާލުވުމަށާއި، މޫސުން ގޯސްވެ ވިއްސާރަ ދުވަސްވަރަކަށް ވުމުން ފެން އުފެދޭ ޒާތުގެ އެއްވެސް އެއްޗެއް ފެންހަރުލާ ގޮތަށް ނުބެހެއްޓުމަށް އިލްތިމާސްކޮށްފައިވެއެވެ.