ސައޫދީގެ ސަޕޯޓަރެއް ހިނގާފައި ޤަތަރަށް ދަތުރުކޮށްފި
2 ނޮވެމްބަރު 2022 | ބުދަ 11:54މި ދަތުރު އޭނާ ނިންމާލީ 55 ދުވަހުން
ހިނގާފައި ދޯހާއަށް ދަތުރުކުރި އަބްދުﷲ އަލް-ސަލާމީ
މި މަހު ޤަތަރުގައި ފަށާ ފީފާ ވޯލްޑް ކަޕް ބެލުމަށް ސައޫދީ އަރަބިއްޔާގެ ސަޕޯޓަރެއް ފައި މަގުގައި ޤަތަރުގެ ދޯހާއަށް ދަތުރުކޮށްފިއެވެ.
ސައޫދީގެ ޖިއްދާއިން ޤަތަރަށް ދަތުރުކުރީ ސައޫދީގެ ރައްޔިތެއް ކަމުގައިވާ އަބްދުﷲ އަލް-ސަލާމީއެވެ. މި ދަތުރު އޭނާ ފެށީ ސެޕްޓެމްބަރު މަހުގެ ނުވަ ވަނަ ދުވަހުއެވެ. ދެމަސް ތެރޭގައި ޤަތަރަށް ދަތުރު ކުރުމުގެ އުންމީދުގައި ފެށި މި ދަތުރު އޭނާ ނިންމާލީ 55 ދުވަހުންނެވެ.
އަބްދުﷲ އަލް-ސަލާމީ ދޯހާއަށް ދަތުރުކުރުމުން ދޯހާގައި ތިބި ސަޕޯޓަރުން ވަނީ އޭނާއަށް ހޫނު މަރުހަބާއެއް ކިޔާފައެވެ. މި ދަތުރުގައި އޭނާ ވަނީ 1600 ކިލޯމީޓަރުގެ ރާސްތާ ހިނގާފައި ކަޑައްތުކޮށްފައެވެ.
ވޯލްޑް ކަޕްގައި ސައޫދީ ލައްވާލާފައި އޮތީ ނިސްބަތުން ބަލާނަމަ ވަރުގަދަ ގްރޫޕެއްގައެވެ. ގްރޫޕް ސީގައި ސައޫދީ އާއެކު ދެން ހިމެނެނީ އާޖެންޓީނާ، މެކްސިކޯ އަދި ޕޮލެންޑެވެ. މުބާރާތުގައި ސައޫދީގެ ފުރަތަމަ މެޗު އޮންނާނީ މި މަހުގެ 22 ވަނަ ދުވަހުއެވެ. ފުރަތަމަ މެޗުގައި ބައްދަލުކުރާނީ އާޖެންޓީނާއާއެވެ.
އަބްދުﷲ އަލް-ސަލާމީގެ އިތުރުންވެސް މި މުބާރާތް ބެލުމަށް އެކި ސަޕޯޓަރުން އަންނަނީ ތަފާތު ގޮތްގޮތަށް ޤަތަރަށް ދަތުރު ކުރަމުންނެވެ. އެގޮތުން އޭނާއެކޭ އެއްގޮތަށް ހިނގާފައި ޤަތަރަށް ދަތުރުކުރި ސްޕެއިންގެ ސަޕޯޓަރެއް ވަނީ އީރާނުން ހައްޔަރުކޮށްފައެވެ. މީގެ އިތުރުން އާޖެންޓިނާގެ ސަޕޯޓަރެއް ވަނީ މުބާރާތް ފެށުމުގެ ހަމަސް ކުރިން ޤަތަރަށް ދަތުރުކޮށްފައެވެ.
