ފަތުރުވެރިކަމުގެ ސިނާއަތަށް 50 އަހަރު ފުރުމާއި ގުޅިގެން ބާއްވާ އެމް.އެން.ޔޫ ރޯޑް ޝޯވް ނޮވެމްބަރު 19 ގައި
މިއީ ޓޫރިޒަމް ދާއިރާގެ ފަރާތްތަކަށް ޚާއްސަކޮށްގެން ބާއްވާ ހިނގާލުމެއް
ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއާއި، ޓޫރިޒަމް މިނިސްޓްރީ ގުޅިގެން ބޭއްވި ނޫސްވެރިންގެ ބައްދަލުވުން
ފަތުރުވެރިކަމުގެ ސިނާއަތަށް 50 އަހަރު ފުރުމާއި ގުޅިގެން ބާއްވާ އެމް.އެން.ޔޫ ރޯޑް ޝޯވް ނޮވެމްބަރު 19 ގައި ބޭއްވުމަށް ހަމަޖެހިއްޖެއެވެ.
ބުދަ ދުވަހު މޯލްޑިވްސް ނެޝަނަލް ޔުނިވަރސިޓީގެ ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއާއި، ޓޫރިޒަމް މިނިސްޓްރީ ގުޅިގެން ބޭއްވި ނޫސްވެރިންގެ ބައްދަލުވުމެއްގައި ވަނީ ފަތުރުވެރިކަމުގެ ސިނާއަތަށް 50 އަހަރު ފުރުމާއި ގުޅިގެން ބާއްވާ އެމް.އެން.ޔޫ ރޯޑް ޝޯވް އާ ގުޅޭގޮތުން މައުލޫމާތު ފޯރުކޮށްދީފައެވެ.
މިއީ ޓޫރިޒަމް ދާއިރާގެ ފަރާތްތަކަށް ޚާއްސަކޮށްގެން ބާއްވާ ހިނގާލުމެއްކަމަށް އެމްއެންޔޫއިން މައުލޫމާތު ދެއެވެ. އެގޮތުން މި ހިނގާލުން އޮންނާނީ ނޮވެމްބަރު މަހުގެ 19 ވާ ހޮނިހިރު ދުވަހުގެ ހަވީރު 4ން 6ށް ކަމަށް ނޫސްވެރިންގެ ބައްދަލުވުމުގައި އެމްއެންޔޫގެ އޮފިޝަލުން ފާހަގަ ކުރެއްވިއެވެ.
މި ހިނގާލުން ފެށުމަށް ހަމަޖެހިފައިވަނީ އާރޓިފިޝަލް ބީޗު ސަރަޙައްދުންނެވެ.
އެމްއެންޔޫގެ އޮފިޝަލުން ވަނީ މިފަދަ ހިނގާލުމެއް ބޭއްވުމުގެ މަޤްސަދަށްވެސް އަލިއަޅުވާލައްވާފައެވެ. އެގޮތުން ފަތުރުވެރިކަމުގެ ދާއިރާގެ ތައުލީމު ފޯރުކޮށްދޭ ބައެއްގެ ޙައިސިއްޔަތުން މިހާތަނަށް އާދެވިފައިވާ ހިސާބު މި ރޯޑް ޝޯވް ގެ ތެރެއިން ދައްކާލުމަކީ އަމާޒެއްކަމަށް އޮފިޝަލުން ފާހަގަ ކުރެއްވިއެވެ.
މި ހިނގާލުމުގެ ޒަރިއްޔާއިން ފަތުރުވެރިކަމުގެ ދާއިރާގައި ދިވެހިންނަށް ލިބެންހުރި ވަޒީފާގެ ފުރުސަތުތަކާއި، ކުރިއަށް ދެވެން ހުރި ދާއިރާތަކުގެ މައުލޫމާތު ފޯރުކޮށްދެވިގެންދާނެއެވެ. އަދި ދެމެހެއްޓެނިވި ގޮތެއްގައި ފަތުރުވެރިކަން ފުޅާކުރުމާއި، ފަތުރުވެރިކަމުގައި މުޖުތަމައުގެ ބައިވެރިވުން ހިމެނޭ ގޮތުގެ މައްޗަށްެވެސް އަލިއަޅުވާލެވިގެންދާނެކަން އެމްއެންޔޫއިން ފާހަގަ ކުރެއެވެ.
މި ހިނގާލުމުގައި ގްރޭޓަރ މާލޭގެ 21 ސްކޫލަކުން ބައިވެރިވާއިރު، މި ހިނގާލުން މެދުވެރިކޮށް ދަރިވަރުންނަށްވެސް ދާއިރާއާ ގުޅުންހުރި ބޭނުންތެރި މައުލޫމާތުތައް ފޯރުކޮށްދެވިގެންދާނެއެވެ.
އޭގެ އިތުރުންވެސް މި ދާއިރާއާ ގުޅުންހުރި އެކި ފަރާތްތަކާއި އިދާރާތަކަށް ވަނީ ދައުވަތު ދީފައެވެ.
ޓޫރިޒަމް މިނިސްޓްރީން ވަނީ ފެކަލްޓީ އޮފް ހޮސްޕިޓަލިޓީ އެންޑް ޓޫރިޒަމުން އިސް ނަގައިގެން މިފަދަ ޙަރަކާތެއް ކުރިއަށްގެންދާތީ އެކަން ފާހަގަކޮށް އެކަމަށް ޝުކުރު އަދާކޮށްފައެވެ. އަދި މި ޙަރާކަތަށް ޓޫރިޒަމް މިނިސްޓްރީން ވެދެންޖެހޭ އެއްބާރުލުމެއް ދޭނެކަން ވަނީ ފާހަގަކޮށްފައެވެ.
