ޖިއާންގެ މަރުގެ ބަދަލަށް 4.5 މިލިއަން ރުފިޔާ ދޭން ކުރި ޙުކުމް: ކުންފުނީގެ ފަރާތުން 16 އިސްތިއުނާފީ ނުކުތާއެއް
ނަފްސާނީ ގެއްލުމާއި ގުޅިގެން ކޮށްފައިވާ ޚަރަދުތައް ދައްކުވައިދޭ އެއްވެސް ލިޔެކިޔުމެއް ހުށަހަޅާފައި ނުވާކަމަށް ބުނެފައިވޭ
އިމާރާތަކުން ވެއްޓުނު ސިމެންތި ބަސްތާއަކުން ޖެހުމުގެ ސަބަބުން މަރުވި ރައުޝަން ޖިއާންގެ މަރުގެ މައްސަލަ
އިމާރާތަކުން ވެއްޓުނު ސިމެންތި ބަސްތާއަކުން ޖެހުމުގެ ސަބަބުން މަރުވި ރައުޝަން ޖިއާންގެ މަރުގެ މައްސަލައިގައި ދައުވާ ލިބޭ ޑަބްލިއު ކޮންސްޓްރަކްޝަންގެ ފަރާތުން 16 އިސްތިއުނާފީ ނުކުތާއެއް ހައިކޯޓަށް ހުށަހަޅައިފިއެވެ.
ހައިކޯޓުގައި މި މައްސަލަ ބައްލަވާ ބެންޗުގައި ހިމެނިވަޑައިގަންނަވަނީ ފަނޑިޔާރު މުހައްމަދު ފައިސަލް އާއި ފަނޑިޔާރު ހުޒައިފާ މުޙައްމަދުގެ އިތުރުން ފަނޑިޔާރު މުޙައްމަދު ނިޔާޒެވެ.
މި މައްސަލަ އާ ގުޅޭ 2 ގަޒިއްޔާ އެއް ހައިކޯޓުގައި ކުރިއަށްދާއިރު، އޭގެ ތެރެއިން އެއް ގަޒިއްޔާއަކީ ޑަބްލިއު ކޮންސްޓްރަކްޝަންގެ ފަރާތުން ހައިކޯޓަށް ހުށަހެޅުމުން ބަލާ މައްސަލައެކެވެ. އަނެއް މައްސަލައަކީ ޖިއާންގެ އާއިލާގެ ފަރާތުން ހުށަހަޅާފައިވާ މައްސަލައެކެވެ.
ޑަބްލިއު ކޮންސްޓްރަކްޝަންގެ ފަރާތުން އިސްތިއުނާފު ކޮށްފައިވާ މައްސަލައަކީ ރައުޝަން ޖިއާންގެ މަރުގެ މައްސަލައިގައި ބަދަލެއްގެ ގޮތުން 4.5 މިލިއަން ރުފިޔާ ދޭން އެ ކުންފުނީގެ މައްޗަށް ސިވިލް ކޯޓުން ކުރި ޙުކުމެވެ. އެގޮތުން މަދަނީ ބަދަލު ނަގައިދިނުމަށް ހުށަހަޅާފައިވާއިރު، ދައުވާކުރި ފަރާތަށް ލިބިފައިވާ ނަފްސާނީ ގެއްލުމާއި ގުޅިގެން ކޮށްފައިވާ ޚަރަދުތައް ދައްކުވައިދޭ އެއްވެސް ލިޔެކިޔުމެއް ހުށަހަޅާފައި ނުވާކަމަށް ކުންފުނީގެ ފަރާތުން ބުނެއެވެ.
އޭގެ އިތުރުން، ކުންފުނީގެ ފަރާތުން ބަހައްޓަން ޖެހޭ އިންޒާރުގެ ބޯޑު ބަހައްޓާފައިވާނެ ކަމަށާއި، ރައުޝަން ޖިއާން އެ މަގުން ލާފައި ދިޔައިރު އޭނާ ހުއްޓުވުމަށް އޭނާގެ މަންމަ ފަރުޒާނާ ހުސައިން އެކަށީގެންވާ ގޮތެއްގައި މަސައްކަތް ކުރެވިފައި ނުވާކަން ޑަބްލިއު ކޮންސްޓްރަކްޝަން އިން ފާހަގަކޮށްފައިވެއެވެ.
ހަމައެއާއެކު، ޖިއާންގެ ބޭސްފަރުވާ ކޮށްފައިވަނީ ފަރުޒާނާ ހުސައިން އާއި އޭނާގެ ފިރިމީހާ ޖާވިދު ކަމާލްގެ ޚަރަދުގައިކަން އެނގޭނެ ލިޔުމެއް ހުށަހަޅާފައި ނުވާކަން ވެސް އިސްތިއުނާފީ ނުކުތާއެއްގެ ގޮތުން ހުށަހަޅާފައިވެއެވެ.
ބައެއް ބަދަލުތައް ނަގައިދިނުމުގައި ބަލަންޖެހޭ ޝަރުއީ އަދި ޤާނޫނީ އުސޫލުތަކަށް ރިއާޔަތް ކޮށްފައި ނުވާކަން ވެސް ކުންފުނީގެ ފަރާތުން ފާހަގަކޮށްފައިވެއެވެ.
ސިވިލް ކޯޓުގައި ހުށަހަޅާފައިވާ ދައުވާއަކީ ޑަބްލިއު ކޮންސްޓްރަކްޝަންގެ މައްޗަށް ހުށަހެޅޭނެ ދައުވާ އެއް ވެސް ނޫން ކަމަށާއި، މި މައްސަލައިގެ "ޕްރައިމަރީ ވިކްޓިމް" އަކީ ކޮބައިކަން ސާފު ނުވާކަމަށް ވެސް ކުންފުނިން ހުށަހެޅި އިސްތިއުނާފުގައި ބަޔާންކޮށްފައިވެއެވެ.
ޖުމުލަ 16 އިސްތިއުނާފީ ނުކުތާއެއް ކުންފުނީގެ ފަރާތުން ހުށަހަޅާފައިވާއިރު، ދެން އޮންނަ އަޑުއެހުމެއްގައި އޮންނާނީ އެ ނުކުތާތަކާއި ގުޅޭގޮތުން ތަފްސީލީ ގޮތެއްގައި ވާހަކަ ދެއްކުމެވެ.
އުމުރުން ހަތް އަހަރުގެ ރައުޝަން ޖިއާން މަރުވި މައްސަލައިގައި ދައުލަތުން ދައުވާކުރި ހަ މީހުންގެ ތެރެއިން ފަސް މީހުންގެ މައްޗަށް ކުށް ސާބިތުވާ ކަމަށް ކުރިމިނަލް ކޯޓުން ހުކުމް ކޮށްފައިވާއިރު، ޖަލަށްލާން ހުކުމްކުރީ ދެ ބިދޭސީއެއްގެ މައްޗަށެވެ. އޭގެ ތެރެއިން އެކަކަށް ހަ އަހަރުގެ ދުވަހުގެ ޖަލު ހުކުމެއް އިއްވާފައިވާއިރު، އަނެކަކުގެ މައްޗަށް އިއްވީ ތިން އަހަރު ދުވަހުގެ ޖަލު ހުކުމެކެވެ. އަދި އިތުރު ދެ ބިދޭސީއަކު 7،200 ރުފިޔާ އިން ޖޫރިމަނާ ކުރަން ހުކުމްކުރިއެވެ.
މީގެ އިތުރުން ޑަބްލިއު ކޮންސްޓްރަކްޝަންގެ ސީނިއަރ ސައިޓް ސުޕަވައިޒަރު ހަސަންގެ މައްޗަށް ސާބިތުވީ، މީހަކު މަރުވެ ދިޔުމުގެ އިހުމާލެއް ކުރުމުގެ ދައުވާއެވެ. އެ ދައުވާ ސާބިތުވެ އޭނާގެ މައްޗަށް 115،000 ރުފިޔާގެ ޖޫރިމަނާއެއް ވަނީ ކޮށްފައެވެ.
ސިވިލް ކޯޓުގައި ކުރިއަށް ގެންގޮސްފައިވަނީ މި މައްސަލައިގައި ގެއްލުމުގެ ބަދަލު ނަގައިދިނުން އެދި އާއިލާގެ ފަރާތުން ހުށަހެޅި މައްސަލައެވެ. އެގޮތުން މި ޙާދިސާގެ ސަބަބުން ޖިއާންގެ މައިންބަފައިންނަށް ލިބުނު މާލީ އަދި ނަފްސާނީ ގެއްލުމުގެ ބަދަލު ނަގައިދިނުން ވަނީ އެދިފައެވެ.
މި މައްސަލަ އާ ގުޅިގެން ސިވިލް ކޯޓުން ކުރި ޙުކުމުގައި ވަނީ ޖިއާންގެ އާއިލާ އަށް ލިބުނު ގެއްލުމުގެ ބަދަލުގެ ގޮތުގައި ލިބެންޖެހޭ 4،557،040.86 (ހަތަރު މިލިއަން ފަސް ލައްކަ ފަންސާސް ހަތްހާސް ސާޅީސް ރުފިޔުާ އަށްޑިހަ ހަ ލާރި) 31 އޯގަސްޓުން ފެށިގެން ދެ މަސް ދުވަހުގެ ތެރޭގައި ދެއްކުމަށް ޙުކުމް ކޮށްފައެވެ.
