ފަތުރުވެރިކަމުގައި ދިވެހި އިންވެސްޓަރުންގެ ދައުރު ފުޅާކުރަންޖެހޭ: މިނިސްޓަރ
ރަޝިޔާ ޔޫކްރެއިން ހަނގުރާމައިގެ ސަބަބުން މިހާރު އިންވެސްޓަރުންގެ ހަރަކާތްތައް ދަށްވެފައިވާކަމަށް މިނިސްޓަރ ވިދާޅުވި
ޓޫރިޒަމް މިނިސްޓަރ ޑރ އަބްދުﷲ މައުސޫމް
ބޭރު އިންވެސްޓަރުންނަށް ފަސޭހައިން ފައިސާ ލިބެތީ ރާއްޖޭގެ ފަތުރުވެރިކަން ބޭރު ޕްރޮޑަކްޓެއްގެ ގޮތުގައި ބައްޓަންވެގެންދާކަމަށާއި އެހެންކަމުން ދިވެހި އިންވެސްޓަރުންގެ ދައުރު ފުޅާކުރަންޖެހޭކަމަށް ޓޫރިޒަމް މިނިސްޓަރ ޑރ އަބްދުﷲ މައުސޫމް ވިދާޅުވެއްޖެއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ވާހަކަދައްކަވަމުން މިނިސްޓަރ ވިދާޅުވީ ފަތުރުވެރިކަން ނެތް ހިސާބުތަކަށް ފަތުރުވެރިކަން ގެންދިޔުމުގައި އިންވެސްޓަރުން ބޮޑެތި މަސައްކަތްތަކެއް ކޮށްފައިވާކަމަށާއި އެފަދަ ބޭފުޅުންނަށް ކަންކަން ފަހިކޮށްދޭންޖެހޭކަމަށެވެ. މިޒަމާނުގައި ވިޔަފާރިއަކީ ސަރުކާރުން ކުރާ އެއްޗެއް ނޫންކަމަށާއި ސަރުކާރުން ކުރާ ކަމަކީ ކަންކަން ފަހިކޮށްދިނުންކަމަށް މިނިސްޓަރ ވިދާޅުވިއެވެ.
ރާއްޖޭގެ ފަތުރުވެރިކަމަށް އިންވެސްޓްކުރަން ބޭނުންވާ ބޭރުގެ ގިނަ ފަރާތްތަކެއް އެބަތިބިކަމަށާއި ނަމަވެސް ރަޝިޔާ ޔޫކްރެއިން ހަނގުރާމައިގެ ސަބަބުން މިހާރު އިންވެސްޓަރުންގެ ހަރަކާތްތައް ދަށްވެފައިވާކަމަށް މިނިސްޓަރ ވިދާޅުވިއެވެ. އެންމެ ބޮޑު އިސްކަމެއްދޭންޖެހޭ ކަމަކީ ދިވެހި އިންވެސްޓަރުންގެ ދައުރު ފުޅާކުރުމަށްކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިންވެސްޓްމަންޓަށް ފަހިކުރާއިރު ޓޫރިޒަމްގެ ވަޒީފާތައްވެސް ދިވެހިންނަށް ފަހިވެފައި އޮންނަންޖެހޭކަމަށެވެ. ކޮންމެ ދިވެއްސަކަށްވެސް ޓޫރިޒަމް ދާއިރާގެ ވަޒީފާ ޔަގީންކޮށްދޭންޖެހޭކަމަށް މިނިސްޓަރ ވިދާޅުވިއެވެ.
