ދަރިން ގެވެށި އަނިޔާއިން ސަލާމަތްކުރަން މައިންބަފައިން މަސައްކަތްކުރަންޖެހޭ: މުފްތީ މެންކް
ދިރިއުޅުމުގައި ޖެހޭ މައްސަލަތައް މުޅި ދުނިޔެއަށް އިއުލާނުކުރުމުގެ މާނައެއް ނެތް
މުފްތީ މެންކް ހުޅުމާލޭގައި ދެއްވި ދަރުހުގެ ތެރެއިން
ގެވެށި އަނިޔާ އާއި އަނިޔާވެރި ދިރިއުޅުމެއްގައި ދަރިން އުޅޭ ނަމަ އެފަދަ ދިރިއުޅުމަކުން ސަލާމަތްކުރުމަށް މައިންބަފައިން މަސައްކަތް ކުރަންޖެހޭކަމަށް ދީނީ ޢިލްމުވެރިޔާ މުފްތީ މެންކް ވިދާޅުވެއްޖެއެވެ.
ހޯމަ ދުވަހުގެރޭ ހުޅުމާލެ ސިންތެޓިކް ޓްރެކްގައި އޮތް މި ދަރުސްގައި ތަޤްރީރުކުރައްވާފައިވަނީ ’އާއިލީ މައްސަލަތަކާއި ކުރިމަތިލާނެ ގޮތް‘ މި މައުޟޫއަށެވެ.
މާތް ﷲ އިންސާނާއަށް އަންގަވާފައިވަނީ އެކަލާނގެއަށް އަޅުކަންކުރުމާއި، މައިންބަފައިންނަށް ހެޔޮކޮށް ހިތުމާ އެކު ގާތްތިމާގެ މީހުންނަށް އަޅާލާ ހެޔޮކޮށް ހިތުމަށްކަމަށް ވިދާޅުވަމުން، ހަޤީޤީ ލޯތްބަކީ އެތައް ކަމެއް ޤުރުބާން ކޮށްފައި ވެސް އެމީހުންނާ އެކު އޮންނަ ގުޅުން ބަދަހިކޮށް އެކީގައި އުޅުންކަމަށް މުފްތީ މެންކް ވިދާޅުވިއެވެ. ލޯތްބަކީ އެކަކު އަނެކަކަށް ބަހައްޓާ ގާތްކަމާއި ކުލުނަށްވާއިރު ހަމަ އެ ލޯތްބަކީ ވޭނަކަށް ވެސް ބައެއް ފަހަރު ވާކަމުގައި ވިދާޅުވިއެވެ.
އާއިލީ މައްސަލަތަކާއި ކުރިމަތިލާނެ ގޮތަށް ބައްލަވަމުން މުފްތީ މެންކް ވިދާޅުވީ ދިރިއުޅުމުގައި މައްސަލައެއް ދިމާވާއިރަށް މުޅި ދުނިޔެއަށް އެވާހަކަ އިޢުލާންކޮށް، އާއިލާއި ރައްޓެހިންނާ ހަމައަށް އެވާހަކަތައް ގެންދިއުމުގެ މާނައެއް ނެތްކަމަށެވެ. ދިރިއުޅުމުގައި މައްސަލައެއް ޖެހޭއިރަށް އެކަކު އަނެކަކު ކުށްވެރިނުކޮށް މައްސަލަ ހައްލުކުރުމަށް ދެފަރާތުން ވެސް މަސައްކަތްކުރަން ޖެހެނީ އިހުތިރާމާ އެކު ކަމަށް ވިދާޅުވިއެވެ. އަދި އެއީ ގާތް ތިމާގެ މީހުންގެ މެދުގައި ދިމާވި މައްސަލައެއް ނަމަވެސް އެ މައްސަލައެއްގެ ދެކޮޅު ހޯދައި، ހައްލުކޮށް އަލުން އެފަދަ މައްސަލައެއް ތަކުރާރުވިޔަ ނުދިނުމަށް އަޒުމު ކަނޑައަޅަން އެދިވަޑައިގެންނެވިއެވެ.
ކައިވެނީގައި ދިމާވާ މައްސަލަތަކަކީ އާއިލާ އާއި ރައްޓެހިންނާއި ދުނިޔެއަށް އަންގަން ޖެހޭ ކަންކަން ނޫންކަމަށާއި ކަމަކާ ނުލާ ކުރެވޭ އެފަދަ ކަންކަމުގެ ސަބަބުން އިތުރު މައްސަލަތައް ހިލުން ނޫންކަމެއް ނުވާނެކަމަށް ވިދާޅުވިއެވެ. ދެމަފިރިންގެ ދެމެދުގައި މައްސަލަ އެއް ހައްލުނުކުރެވޭ ފަދަ ހާލަތަކަށް ހިނގައްޖެ ނަމަ އާއިލާގެ މަޝްވަރާ ހޯދާ އެކަމަށް ފިޔަވަޅު އަޅަންޖެހޭކަމަށް ވިދާޅުވިއެވެ. އެހެންނަމަވެސް އެއްވެސް ކަހަލަ އަނިޔާވެރިކަމެއް ނުވަތަ ގެވެށިއަނިޔާގައި ތިމާގެ ދަރިފުޅު، އާއިލާގެ މީހަކު ނުވަތަ ގާތްބަޔަކު އުޅޭކަން އެނގޭ ނަމަ އެކަމުން އެ މީހަކު ސަލާމަތްކުރުމަށް މަސައްކަތްކުރަންޖެހޭކަމަށް ވިދާޅުވިއެވެ. ޚާއްސަކޮށް ތިމާގެ ދަރިއަކު އެފަދަ ހިތްދަތި ދިރިއުޅުމެއްގައި އުޅޭކަން އެނގޭ ނަމަ އެ ދަރިފުޅު ގެއަށް އައުމަކީ މައްސަލައެއް ނޫންކަން ޚުދު މައިންބަފައިން އެ ދަރިފުޅަށް ވިސްނުވައިދޭންޖެހޭކަމަށް ވިދާޅުވިއެވެ. އެއީ އަނިޔާއަކީ އެއްވެސް ޙާލެއްގައި ބަލައިގަނެވޭނެ ކަމަކަށް ނުވާތީ ކަމުގައި ވިދާޅުވިއެވެ.
މުފްތީ މެންކް ވިދާޅުވީ ވަރިވުމަށްފަހު ވަރަށް ގިނައިން ދަރިން އެކަކު އަނެކަކަށް ނުދައްކާ އެފަދައިން ކަންތައް ކުރާތަން މުޖުތަމަޢުތަކުން ފެންނަކަމަށާއި އެހެންނަމަވެސް ދަރިން ހަތިޔާރެއްގެ ގޮތުގައި ބޭނުން ކޮށްގެން ނުވާނެކަމަށް ވިދާޅުވިއެވެ.
އަދި ހަމަ އެހެންމެ ކުދި ކުދި ކަންތަކާ ވަރިކުރުމަށް އިންޒާރު ދިނުމާއި ނޫނީ ވަރިކުރުމާއި، ވަރިއަށް ކިޔުމަކީ ވަރަށް ގިނައިން ކުރެވޭކަމެއްކަން ފާހަގަކުރައްވާ މި ނުބައި އާދައިން ދުލުހެލިވުމަށް ގޮވައިލެއްވިއެވެ.
ހުޅުމާލޭގައި ބޭއްވި މި ދަރުހަކީ މިނިސްޓްރީ އޮފް އިސްލާމިކް އެފެއާޒްގެ ދަޢުވަތަކަށް ރާއްޖެއަށް ކުރެއްވި މި ދަތުރުފުޅުގެ އެންމެ ފަހު ދަރުހެވެ.
