އިޒްރޭލާއި ފަލަސްޠީނާއި ދެމެދު ސަލާމަތާއި ބެހޭ އާންމު އެއްބަސްވުމެއް އޮތުން މުހިންމު ކަމަށް، ޗައިނާއިން އދއަށް ކަނޑައަޅާފައި ހުންނަވާ ޑެޕިއުޓީ ޕަރމަނަންޓް ރެޕްރެޒެންޓޭޓިވް ގެންގް ޝުއާންގް ވިދާޅުވެއްޖެއެވެ.
ގެންގް ވިދާޅުވީ، މެދުއިރުމަތީގެ މަސްރަހުގައި މިހާރު ކަން ހިނގަމުން ދާ ގޮތަށް ބަލާއިރު، ސަލާމަތާއި ބެހޭ އާންމު އެއްބަސްވުމެއް އޮތުން، ފަލަސްޠީނާއި އިޒްރޭލުގެ ރައްޔިތުންނަށްވެސް މުހިންމު ކަން އަންގައިދޭ ކަމަށެވެ.
މި ދަނޑަވަޅަކީ އިޒްރޭލާއި ފަލަސްޠީނާ ދެމެދު ބަދަލު ކުރާ ހަމަލާތައް އިތުރުވެ، ބިރުވެރިކަމާއި ނަފުރަތުގެ އޮއެވަރު އަނެއްކާވެސް ގަދަވެފައިވާ ދުވަސްވަރެކެވެ. ކުރިމަތިލުންތައް އިތުރުވަމުން ދާއިރު، ބައެއް ހާލަތްތައް ކޮންޓްރޯލުން ނެއްޓިގެންދާ ފަހަރުވެސް ދަނީ އިތުރުވަމުން ކަން ފާހަގަ ކުރަން ޖެހެއެވެ.
އދގެ ސަލާމަތީ މަޖިލީހުގެ ބައްދަލުވުމެއްގައި ވާހަކަދައްކަވަމުން ގެންގް ވިދާޅުވީ، މިކަމަކީ ޗައިނާއަށް އެދެވޭ ކަމެއް ނޫން ކަމަށެވެ. އަދި އިޒްރޭލާއި ފަލަސްޠީނާއި ދެމެދު ސަލާމަތާއި ބެހޭ އާންމު އެއްބަސްވުމެއް ގާއިމު ކުރުމަށް، ބައިނަލްއަޤުވާމީ މުޖުތަމައުންވެސް، ހަމަ އެހާމެ މުހިންމު ސަމާލުކަމެއް ދޭން ޖެހޭ ކަމަށް ގެންގް ވިދާޅުވިއެވެ.
ފަލަސްޠީނުގެ ރައްޔިތުންގެ ބިންތައް ފޭރިގަތުމަށް އިޒްރޭލުން ހިންގަމުންދާ ޖަރީމާތަކަށް ހުއްޓުމެއް ނުގެނެސް، އަދިވެސް އެކަންކަން ގެންދަނީ ކުރިއަށެވެ. އަމިއްލަ، މިނިވަން، އިސްތިޤުލާލީ ބައެއްގެ ގޮތުގައި ފަލަސްޠީނުން ތެދުވުމަށް އިޒްރޭލުން އަޅަމުންދާ ހުރަސްތަކަށް ހުއްޓުމެއް ނެތެވެ. މިހާލަތުގައި، އިޒްރޭލުން ހިންގަމުންދާ ވަޒަންވެރި ކުރުމުގެ ހަރަކާތްތައް ހުއްޓުމަކަށް ގެނެސް، ހުޅަނގު އައްސޭރީގައި ދިރިއުޅޭ ފަލަސްޠީނުގެ ވަޒަންވެރިންގެ އާބާދުތައް ތަރައްޤީ ކުރުމަށްވެސް ޗައިނާގެ ފަރާތުން ގެންގް ވަނީ ގޮވާލައްވާފައެވެ.
ހުރިހާ ފަރާތަކުންވެސް ވަކި އިމެއްގެ ތެރޭގައި ހަރަކާތްތެރިވުމަށް ގޮވާލަން. އިތުރު ހަމަނުޖެހުންތަކެއް އުފައްދަނިވި ގޮތަކަށް އަމަލު ކުރުމުން ވީ އެންމެ އަވަހަކަށް ދުރުވެ ގަތުމަށް ގޮވާލަން. ވެރިވެގެންފައިވާ ބިންތަކުގައި ދިރިއުޅެމުންދާ މަދަނީ ފަރުދުންގެ ޙައްޤުތައް ހިމާޔަތް ކުރަން ގޮވާލަން. މަޝްވަރާގެ ތެރެއިން، ސަލާމަތާ ބެހޭ އާންމު އެއްބަސްވުމެއް އެކުލަވާލުމަށް މަގު ތަނަވަސްކޮށްދިނުމަށާ، ފަލަސްޠީނާއި އިޒްރޭލުގައި ހުރި ސަލާމަތީ ކަންބޮޑުވުންތަކަށް ހަމަހަމަ ގޮތެއްގައި ސަމާލުކަން ދިނުމަށް ބައިނަލްއަޤުވާމީ މުޖުތަމައަށް ގޮވާލަން.ގެންގް ޝުއާންގް؛ ޗައިނާއިން އދއަށް ކަނޑައަޅާފައި ހުންނަވާ ޑެޕިއުޓީ ޕަރމަނަންޓް ރެޕްރެޒެންޓޭޓިވް
އިޒްރޭލާއި ފަލަސްޠީނާ ދެމެދު ސުލްޙައިގެ މަޝްވަރާތައް އަލުން ފެށުމުގެ މަގު ފަހި ކޮށްދިނުމަށް ބައިނަލްއަޤުވާމީ މުޖުތަމައުން މަސައްކަތްތަކެއް ކުރަން ޖެހޭ ކަމަށްވެސް ގެންގް ވަނީ ވިދާޅުވެފައެވެ. އަދި ވަކިވެފައިވާ މިނިވަން 2 ދަޢުލަތުގެ ގޮތުގައި އިޒްރޭލާއި ފަލަސްޠީނު އުފެދިގެން ދިއުމަށް، ދިގު މުއްދަތުގެ އެއްބަސްވުމަކަށް އައުމަށްވެސް ބައިނަލްއަޤުވާމީ އެހީ ބޭނުންވާ ކަން، ޗައިނާގެ މަންދޫބު ވަނީ ފާހަގަ ކުރައްވާފައެވެ.
ފަލަސްޠީނުގެ ކުރިމަގާ މެދު އުފެދިފައިވާ ސުވާލަށް، އިންސާފުވެރި އަދި ބިނާ ކުރަނިވި ފުރިހަމަ ހައްލެއް ހޯދުމަށް، ވަރުބަލިކަމެއް ނެތި ބައިނަލްއަޤުވާމީ މުޖުތަމައާއެކު ޗައިނާއިން ކުރަމުންދާ މަސައްކަތްތައް އެގޮތުގައި ކުރިއަށް ގެންދާނެ ކަމަށްވެސް ގެންގް ވަނީ ފާހަގަ ކުރައްވާފައެވެ.
