ފްލެޓްތަކަށް ފައިސާ ނުދައްކާ ފަރާތްތަކާ މިދަނީ ވާހަކަދައްކަމުން، ފިޔަވަޅު އަޅާނީ ފުރުސަތު ދިނުމަށްފަހު: އެޗްޑީސީ

ފްލެޓްތަކަށް ފައިސާ ނުދައްކާ ފަރާތްތަކާ ވާހަކަދައްކައިގެން އެ ފަރާތްތަަށް ފައިސާ ދެއްކުމަށް ލުއި ގޮތްތަކެއް ހޯދައިދެމުންދާކަމަށް، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ)ން ހާމަކޮށްފިއެވެ.

އެޗްޑީސީގެ އޮފިޝަލަކު ރާއްޖެ އެމްވީއަށް މައުލޫމާތުދެއްވަމުން ވިދާޅުވީ، ފްލެޓްތަކަށް ފައިސާ ނުދައްކާ ފަރާތްތަކާ މަޝްވަރާކޮށްގެން އެ ފައިސާ ދެއްކުމަށް ޕްލޭނެއް އެކުލަވާލައި، އެ ޕްލޭނާ އެއްގޮތަށް ފައިސާ ދެއްކުމުގެ ފުރުސަތު ފަހިކޮށްދީފައިވާކަމަށެވެ. އަދި އެއްވެސް ފަރާތަކާމެދު ފިޔަވަޅު އަޅާނީ ފައިސާ ދެއްކުމަށް ދެވެންހުރި ހުރިހާ ފުރުސަތުތަކެއް ދިނުމަށްފަހު ކަމަށްވެސް އޭނާ ވިދާޅުވިއެވެ.

ސަރުކާރުން ފޯރުކޮށްދޭ ބޯހިޔާވަހިކަމުގެ މަޝްރޫއުގެ ދަށުން، ފްލެޓް ލިބިފައިވާ ފަރާތްތަކުގެ ތެރެއިން 31-41 އިންސައްތަ މީހުން ގަވާއިދުން ކުލި ދައްކަމުން ނުދާކަން ފާހަގަކުރައްވައި ދާދިފަހުން ޕްލޭނިން މިނިސްޓަރ މުހައްމަދު އަސްލަމްވެސް ވަނީ ކަންބޮޑުވުން ފާޅުކުރައްވާފައެވެ. އެގޮތުން، ފްލެޓްތަކަކީ ފައިސާ ދައްކައިގެން އެތަން އަމިއްލަކުރުމުގެ ފުރުސަތު ލިބޭ ސްކީމުތަކުގެ ދަށުން އަޅާ ފްލެޓްތަކަށް ވާއިރު، ފައިސާ ނުދެއްކުމަކީ ސަރުކާރަށް އުފުލަންޖެހޭ ބުރައެއްކަން އަސްލަމް ވަނީ ފާހަގަކުރައްވާފައެވެ. މީގެ އިތުރުން އެއީ ދެމެހެއްޓެނިވި ގޮތެއްގައި އެ މަޝްރޫއުތައް ކުރިއަށްގެންދަން ބޭނުންނަމަ ބަދަލުކުރަންޖެހޭ ކަމެއްކަންވެސް އަސްލަމް ވަނީ ފާހަގަކުރައްވާފައެވެ.

މީގެ އިތުރުން ވޯރލްޑް ބޭންކުން މި މަހު ނެރުނު "މޯލްޑިވްސް ޑިވެލޮޕްމަންޓް އަޕްޑޭޓް" ރިޕޯޓުގައި ބުނެފައިވަނީ، ގިނަ އަދަދެއްގެ މީހުން ފްލެޓަށް ކުލި ނުދައްކާކަމަށެވެ. އެ ރިޕޯޓްގައި މި އަހަރުގެ އޭޕްރިލް މަހާ ހަމައަށް ހިޔާ ފްލެޓުގައި 6،338 އާއިލާ ދިރިއުޅެން ފަށާފައިވާއިރު، އޭގެ ތެރެއިން 2،345 ތަނުން ކުލި ނުދައްކާކަަމަށް ބުނެފައިވެއެވެ. މީގެ އިތުރުން ހުޅުމާލޭ ފުރަތަމަ ފިޔަވަހިން ސަރުކާރުން ދޫކޮށްފައިވާ އެކި ސޯޝަލް ހައުސިން ޔުނިޓުތަކުން ވެސް 800ށްވުރެ ގިނަ މީހުން ކުލި ނުދައްކާކަން އެ ރިޕޯޓުން ހާމަވެއެވެ.

މިހާރުވެސް ފްލެޓްތަކަށް ފައިސާ ދިނުމަށް ފްލެޓްތަކުގެ ވެރިންނަށް އިތުރު ފުރުސަތު ދެމުންދާއިރު، އެ ފްލެޓްތަކުގައި ދިރިއުޅޭ މީހުންނަށް ކުލި ދައްކަން ދޭ މިފަދަ ފުރުސަތުތަކުގެ ބޭނުން ނުހިފާކަމަށާއި، އެކަމުގައި އެއްވެސް ކުރިއެރުމެއް ނުލިބޭކަމަށް ވޯރލްޑް ބޭންކުން ވަނީ ބުނެފައެވެ. އެ ރިޕޯޓްގައި، އެފަދަ ފްލެޓްތައް އަތުލުމުގެ ބާރު އެޗްޑީސީއަށް އޮންނަކަން ފާހަގަކޮށްފައިވެއެވެ. އެހެންނަމަވެސް އެއްވެސް ބައެއްގެ އަތުން ފްލެޓެއް އަތުލަން މަސައްކަތްކޮށްފައި ނުވާކަން އެ ރިޕޯޓްގައި ވަނީ ފާހަގަކޮށްފައެވެ.

ސޯޝަލް ހައުސިންގެ ފްލެޓްތަކުގެ އެކި ފްލެޓްތަކުގެ އެގްރީމެންޓްތަކުގައި، އެ ތަންތަނަށް ފައިސާ ނުދައްކާނަމަ އަމަލުކުރަން ހަމަޖެހިފައިވާ އުސޫލުތައް ހުރީ ތަފާތުކޮށެވެ. ބައެއް ފްލެޓްތަކަށް ފައިސާ ނުދެއްކުމުން ޖޫރިމަނާވާއިރު، ބައެއް ފްލެޓްތަކަށް ފައިސާ ނުދައްކާނަމަ އެތަންތަން އަތުލުމުގެ ބާރު އެޗްޑީސީއަށް ވަނީ ދީފައެވެ. އެހެންނަމަވެސް މި ފަދަ ތަންތަނަކީ ސޯޝަލް ހައުސިންގ ފްލެޓްތަކަށް ވުމާއެކު ފައިސާ ނުދެއްކިގެން ބަޔަކު ފްލެޓްތަކުން ނެރޭނަމަ، އެކަމާމެދު ރާއްޖޭގައި ހުރި ޖަމްއިއްޔާ ޖަމާއަތްތަކުންވެސް ކަންބޮޑުވުން ފާޅުކުރެއެވެ. މީގެ ކުރިން ފްލެޓްތަކާ ގުޅުންހުރި އެހެން ކަންކަމުގައިވެސް އުސޫލާ ޚިލާފަށް އަމަލުނުކުރާ މީހުންނަށް ފިޔަވަޅު އެޅުމަށް އެޗްޑީސީއަށް ވަނީ ގޮންޖެހުންތައް ދިމާވެފައެވެ.