ކްލަބް މޯލްޑިވްސް ކަޕްގެ ސެމީ ފައިނަލްގެ ފަހު ދެ ޖާގަ، މޯލްޑިވްސް ޕޯރޓްސް ލިމިޓެޑް (އެމްޕީއެލް)އާއި, ކްލަބް އެޗްޑީސީ ހޯދައިފިއެވެ.

ކްއާޓަރ ފައިނަލްގައި ކުޅުނު ވަރަށް ވާދަވެރި ދެ މެޗަށްފަހު އެމްޕީއެލް ސެމީގެ ޖާގަ ހޯދީ ޕެނަލްޓީ ޖަހައިގެން އެސްޓީއޯ ރެކްރިއޭޝަން ކްލަބްގެ މައްޗަށް ކުރި ހޯދައިގެންނެވެ. އެޗްޑީސީ ކްއާޓަރ ފައިނަލް މެޗު ކާމިޔާބުކުރީ ފަހު ސިކުންތުގެ ގޯލުން ސްޓެލްކޯ ކްލަބް ބަލިކޮށްގެންނެވެ.

އެމްޕީއެލްއިން ޕެނަލްޓީގައި އެސްޓީއޯ ބަލިކުރީ 6-5ންނެވެ. 2-2ން މެޗު އެއްވަރުވުމުން ނަތީޖާ ނެރުނީ ޕެނަލްޓީ ޖަހައިގެންނެވެ. މެޗުގައި ފުރަތަމަ ކުރިހޯދީ އަހުމަދު ޒިފާން އިބްރާހީމްގެ ލަނޑުން، އެސްޓީއޯއެވެ. އެމްޕީއެލްއިން ނަތީޖާ ހަމަހަމަކުރީ މުހައްމަދު ސާދު ނިޒާރުގެ ލަނޑުންނެވެ. ކުރިހޯދީ އަލީ ހައިސަމްގެ ލަނޑުންނެވެ. 2-1ން އެމްޕީއެލް ކުރީގައި ވަނިކޮށް, އެސްޓީއޯގެ އިސްމާއީލް އީސާއަށް ދެވަނަ ރީނދޫ ކާޑާއެކު ރަތްކާޑު ދެއްކިއެވެ. ނަމަވެސް މެޗު ނިމުމުގެ ކުރިން މުހައްމަދު އިމްރާން ލަނޑު ޖަހައި ނަތީޖާ ހަމަހަމަކޮށްދިނެވެ. ޕެނަލްޓީގައި އެސްޓީއޯގެ ޒިފާންއާއި, މުހައްމަދު ސަނީމް ޖެހި ޕެނަލްޓީ ނާކާމިޔާބުވީއެވެ. އެސްޓީއޯއިން ޕެނަލްޓީ ކާމިޔާބުކުރީ ހަސަން މުހައްމަދާއި, އިޔާން އަހުމަދު ރަޝީދާއި, މުހައްމަދު އިމްރާނެވެ. އެމްޕީއެލްއިން ނާކާމިޔާބުވީ އަލީ ހައިސަމްގެ ޕެނަލްޓީއެވެ. އަހުމަދު ހުސެއިންއާއި, ސާޖިދު ރަޝީދުއާއި, މުހައްމަދު ޔަފާއުއާއި, އަލީ ޝަމާލް އަބްދުﷲ ޕެނަލްޓީ ކާމިޔާބުކުރިއެވެ. ސެމީގައި އެމްޕީއެލް ވާދަކުރަން ޖެހޭނީ ކްލަބް އެޗްޑީސީއާއެވެ.

އެޗްޑީސީ ސެމީން ޖާގަހޯދީ 4-3ން ސްޓެލްކޯ ކްލަބް ބަލިކޮށްގެންނެވެ. 3-3ން މެޗު އެއްވަރުވާން ދަނިކޮށް އެޗްޑީސީން މެޗު ކާމިޔާބުކުރީ ފަހު ސިކުންތުގައި ލަނޑު ޖަހައިގެންނެވެ. ފަހު ސިކުންތުގައި ޖެހި ލަނޑާއެކު އަބްދުﷲ ޝާފިއު ތިން ލަނޑު ޖެހިއެވެ. އަނެއް ލަނދު ޖެހީ އަހުމަދު ސިޒާންއެވެ. ސްޓެލްކޯގެ ތިން ލަނޑުގެ ތެރެއިން ދެ ލަނޑު ޖެހީ އިބްރާހީމް ރިމާހުއެވެ, އަނެއް ލަނޑު ޖެހީ މުހައްމަދު ވިލްފްއެވެ.

ސެމީފައިނަލްގައި ވެމްކޯ ވާދަކުރާނީ ފެނަކައާއެވެ. ސެމީފައިނަލް ދެ މެޗު ކުޅޭނީ އާދިއްތަ ދުވަހުގެ ރެއެވެ.