ގެއްލުނު ސްޕެއިންގެ ސަޕޯޓަރު ހުރީ އިރާނުގެ ޖަލުގައި!
28 އޮކްޓޯބަރު 2022 | ހުކުރު 11:01ސަންޗޭޒް ހައްޔަރުކުރި ސީދާ ސަބަބު އަދި ސާފު ނުވޭ
ސަންޓިއާގޯ ސަންޗޭޒް (ރެއާލް މެޑްރިޑްގެ ޖާޒީގައި)
ވީނުވީއެއް ނޭންގި، ގެއްލިގެން ހޯދަމުންދިޔަ ސްޕެއިންގެ ސަޕޯޓަރު ހުރީ އިރާނުގެ ޖަލެއްގައިކަން ހާމަވެއްޖެއެވެ.
މިއަންނަ މަހު ފަށާ ފީފާ ވޯލްޑް ކަޕް ބެލުމަށް ހިނގާފައި ގަތަރަށް ދިޔަ ސްޕެއިންގެ ސަންޓިއާގޯ ސަންޗޭޒްގެ ޚަބަރެއް ނުވެގެން އޭނާ ހޯދަން ފެށި އޮކްޓޫބަރު މަހުގެ ފުރަތަމަ ކޮޅުގައެވެ. އޭނާ ގެއްލިގެން ހޯދަން ފެށިއިރު، އެންމެ ފަހުން އޭނާގެ ޚަބަރެއްވީ އޮކްޓޫބަރު ދެވަނަ ދުވަހުއެވެ. އުމުރުން 41 އަހަރުގެ ސަންޗޭޒްގެ ޚަބަރެއް އެންމެ ފަހުންވީ އޭނާ އިރާނަށް ވަތްއިރުއެވެ. އެހިސާބުން މީޑިއާތަކުގެ އިތުރުން އޭނާގެ އާއިލާއިންވެސް ތުހުމަތުކުރީ އިރާނުގެ ސިފައިން އޭނާ ހައްޔަރުކުރީ ކަމަށެވެ.
ބީބީސީއަށް ދިން އިންޓަރވިއުއެއްގައި ސަންޗޭޒްގެ ރަހުމަތްތެރިޔާފްރެންކޯ ސަލަމަންކާ ބުނީ ސަންޗޭޒްވީތަން މިހާރު އެނގިފައިވާ ކަމަށެވެ. އަދި އޭނާ ހުރީ އިރާނުގެ ވެރިރަށް ޓެހްރާންގައި ހުންނަ ޖަލުގައި ކަމަށެވެ. މިކަމާއި ގުޅިގެން ސްޕެއިންގެ ފޮރިން މިނިސްޓްރީން ބުނީ އިރާނުގައި ހުންނަ ސްޕެއިންގެ އެމްބަސީން ތެހްރާންގެ ކަމާއި ގުޅޭ ފަރާތްތަކާއި ވާހަކަދައްކާފައިވާ ކަމަށެވެ. ނަމަވެސް މިކަމާއި ގުޅޭ އިތުރު މައުލޫމާތެއް ނުދެއެވެ. އިރާނުގެ ފޮރިން މިނިސްޓްރީންވެސް މިކަމާއި ގުޅިގެން އެއްވެސް ބަހެއް މިހާތަނަށް ނުބުނެއެވެ. އެހެންކަމުން ސަންޗޭޒް ހައްޔަރުކުރި ސީދާ ސަބަބު އަދި ސާފު ވެފައެއް ނުވެއެވެ.
ސަންޗޭޒްގެ އިތުރުން ވެސް ވޯލްޑް ކަޕް ބެލުމަށްޓަކައި އެކި ފަރާތްތަކުން ވަނީ ތަފާތު ގޮތްގޮތަށް ދަތުރު ފަށާފައެވެ. އެގޮތުން ފްރާންސްގެ ދެ ސަޕޯޓަރެއް ވަނީ ބައިސަކަލުގައި ގަތަރަށް ދިއުމަށް ދަތުރު ފަށާފައެވެ. އަދި އާޖެންޓީނާގެ ސަޕޯޓަރެއް ވަނީ މުބާރާތް ފެށުމުގެ ހަ މަސް ކުރިން، މިދިޔަ މޭ މަހު ގަތަރަށް ދަތުރުކޮށްފައެވެ. ބެލެވޭ ގޮތުގައި އެއީ މުބާރާތް ބެލުމަށް އެންމެ ފުރަތަމަ ގަތަރަށް ދަތުރުކުރި ސަޕޯޓަރެވެ.
