އީރާނުގެ މިސައިލް އަދި ޑްރޯން ޕްރޮގްރާމް އަށް އެހީތެރިވެދޭ ކަމަށް ބުނެ އެމެރިކާ އިން 32 ފަރާތަކަށް ދަތި ކުރުމުގެ ފިޔަވަޅު އަޅައިފި އެވެ.

ބުދަ ދުވަހު ނެރުނު ނޫސް ބަޔާނެއްގައި، އެމެރިކާގެ ސްޓޭޓް ޑިޕާޓްމަންޓުން ބުނީ އަދަބު ދިނުމަށް ކަނޑައެޅި ފަރާތްތައް އިރާން، ޗައިނާ، ހޮންކޮންގ، ޔޫއޭއީ، ތުރުކީ، އިންޑިއާ އަދި އެހެނިހެން ސަރަހައްދުތަކަށް ނިސްބަތްވާ ކަމަށާއި، އެ ފަރާތްތަކުން "އިރާނުގެ ބެލިސްޓިކް މިސައިލް އަދި މީހުން ނުލާ ދަތުރުކުރާ ވައިގެ އުޅަނދު (ޔޫއޭވީ) އުފެއްދުމަށް އެހީތެރިވެދޭ ނެޓްވޯކްތައް ހިންގާ" ކަމަށެވެ.

އަލަށް އެޅި މި ފިޔަވަޅު ތަކަކީ އެމެރިކާގެ ރައީސް ޑޮނަލްޑް ޓްރަމްޕްގެ ދެވަނަ ދައުރުގެ ތެރޭގައި އިރާނާ ދެކޮޅަށް އިއުލާނު ކުރެއްވި މެކްސިމަމް ޕްރެޝަރ ކެމްޕެއިން ތަންފީޒުކުރުމުގެ ގޮތުން އެޅި ފިޔަވަޅުތަކެއް ކަމަށް އެ ޑިޕާޓްމަންޓުން ބުންޏެވެ.

އެމެރިކާ އިން ބުނީ އިރާނުގެ މިސައިލް އަދި ޑްރޯން ޕްރޮގްރާމްތައް "ހުއްޓުވުމަށް އަދި ހުރަސް އެޅުމަށް" "ލިބެން ހުރި ހުރިހާ ވަސީލަތްތައް" ބޭނުން ކުރާނެ ކަމުގައެވެ.

މީގެ އިތުރުން އެމެެރިކާގެ ޓްރެޜަރީ ޑިޕާޓްމަންޓުން ބުނެފައި ވަނީ ބްލެކް ލިސްޓު ކުރާ ފަރާތްތަކަކީ މެދުއިރުމަތީގައި ދިރިއުޅޭ އެމެރިކާ އާއި އެމެރިކާގެ އެކުވެރި ގައުމުތަކުގެ ރައްޔިތުންނަށާއި، ރަތް ކަނޑުގައި ހިންގާ ވިޔަފާރީގެ ދަތުރުތަކަށް ނުރައްކާ ކުރާ ފަރާތްތައް ކަމުގައެވެ.

މި ފިޔަވަޅުތަކާ ބެހޭ ގޮތުން އެމެރިކާގެ ޓްރެޜަރީގެ ޓެރަރިޒަމް އެންޑް ފައިނޭންޝަލް އިންޓެލިޖެންސް ގެ އަންޑަރ ސެކްރެޓަރީ ޖޯން ހާލީ ވިދާޅުވީ "ރައީސް ޓްރަމްޕްގެ އިރުޝާދުގެ މަތިން، އިރާނުގެ ނިއުކްލިއަރ ޕްރޮގްރާމް ހުއްޓުވުމަށް އެމެރިކާ އިން އިރާނަށް މެކްސިމަމް ޕްރެޝަރ ކުރަމުން ގެންދާ،" ކަމަށެވެ.

އެމެރިކާގެ މި ފިޔަވަޅު ތަކަކީ ޣައިރު ގާނޫނީ، އަދި އެ ފިޔަވަޅުތަކަށް އީރާނުން ހޭނިފައިވާ ފިޔަވަޅުތަކެއް ކަމަށް އީރާނުގެ އޮފިޝަލުން ބުނެއެވެ. އަދި މި ފިޔަވަޅުތައް އެޅި ދަނޑިވަޅަކީ އީރާނުގެ އިންފްރާސްޓްރަކްޗަރ ޕްރޮޖެކްޓްތަކަށް ފަންޑު ކުރުމަށް ތެލުގެ ވިޔަފާރި އިތުރުކޮށްފައިވާ ދަނޑިވަޅެއް ކަމަށް ވެސް އޮފިޝަލުން ބުނެއެވެ. އީރާނުން ބުނެފައި ވަނީ ދުޝްމަނުންގެ ރޭވުން ތައް ނާކާމިޔާބު ކޮށްލުމަށް އެގައުމުގައި އަމިއްލަ އަށް ދިފާއީ ގާބިލުކަން ތަރައްގީ ކުރަމުން ގެންދާނެ ކަމަށެވެ.

ފާއިތުވި ހަފްތާގައި، މަތީ ފަންތީގެ އެނާޖީ އެނަލިޓިކްސް ފާމެއް ކަމަށްވާ ޓޭންކަރ ޓްރެކަރސް ރިޕޯޓްކުރި ގޮތުގައި، އޮކްޓޯބަރު މަހު އިރާނުގެ ތެލުގެ އެކްސްޕޯޓް ދުވާލަކު 2.3 މިލިއަން ފީފާ އަށް އަރައި، ދަތިކުރުމުގެ ފިޔަވަޅު އަޅާފައިވާ އިރާނުގެ ތެލުގެ އެކްސްޕޯޓު ރެކޯޑް މިންވަރަކަށް ވަނީ މައްޗަށް ގޮސްފައި ކަމަށް ބުނެފައިވެ އެވެ.