މިބިލް ފާސްކުރުމަށްޓަކައި، ސަރުކާރު ހިންގާ މައި ޕާޓީ (އެމްޑީޕީ)ން ތުރީ ލައިން ވިޕެއް ނެރެފައިވޭ
މުހައްމަދު ނަޝީދު- ރައްޔިތުންގެ މަޖިލީހުގެ ރައީސް
ޖީއެސްޓީއާއި ޓީޖީއެސްޓީ ބޮޑުކުރުމަށްޓަކައި، މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމަށް ހުށަހަޅާފައިވާ ބިލް ދިރާސާކުރަމުން އަންނަ މުޅި މަޖިލީހުގެ ކޮމިޓީން އެބިލާމެދު ގޮތެއް ނިންމާނީ، ކަމާބެހޭ މާހިރުން ކޮމިޓީއަށް ގެނެސް މައުލޫމާތު ސާފުކުރުމަށްފަހު ކަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހަޅުއްވާފައިވާ މިބިލް ދިރާސާކުރުމަށް މުޅި މަޖިލީހުގެ ކޮމިޓީގެ ބައްދަލުވުމެއް މިދިޔަ ހަފުތާގެ އަންގާރަ ދުވަހު ވަނީ ބާއްވާފައެވެ. ނަމަވެސް ކޮމިޓީ ބައްދަލުވުން ކުރިއަށްދަނިކޮށް ކޯރަމް ހަމަނުވެގެން އެދުވަހުގެ ބައްދަލުވުން ވަނީ ނިންމަވާލައްވާފައެވެ.
އޭގެފަހުން ހަމައެދުވަހު ވަނީ މިބިލް ފާސްކުރުމަށް ސަރުކާރު ހިންގާ މައި ޕާޓީ (އެމްޑީޕީ)ން ތުރީ ލައިން ވިޕެއް ނެރެފައެވެ. އަންގާރަ ދުވަހު ބޭއްވި އެމްޑީޕީ ޕީޖީ ގްރޫޕްގެ ބައްދަލުވުމުގައި ބިލް ފާސްކުރުމަށް ތުރީ ލައިން ވިޕް ނެރެފައިވަނީ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުންނެވެ.
ބިލް ދިރާސާކުރުމަށް ކޮމިޓީ ބައްދަލުވުން އަންގާރަ ދުވަހު ކުރިއަށްގެންގޮސްފައިވާއިރު، ކޮމިޓީން ފާސްކުރުމަކާނުލައި، ކަމާގުޅޭ މާހިރުން ކޮމިޓީއަށް ހާޒިރުކުރަން މަޖިލީހުގެ ރައީސް ނިންމެވުމާއެކު ބައްދަލުވުން ވަނީ ހޫނުވެފައެވެ.
ކޮމިޓީ ބައްދަލުވުމުގައި ވާހަކަދައްކަވަމުން މެދުހެންވޭރު ދާއިރާގެ މެމްބަރު އަލީ އާޒިމް ވަނީ، ޓެކްސް ބޮޑުކުރުމުގެ ސަބަބުން ވިޔަފާރިތަކަށް ކުރާނެ އަސަރު ދެނެގަތުމަށް ކަމާގުޅޭ މާހިރުންނާ މަޝްވަރާކުރުމަށް ކުރީ ބައްދަލުވުމުގައި ހުށަހަޅާފައިވަނިކޮށް، ޕާލަމަންޓްރީ ގްރޫޕުން ބިލް ފާސްކުރުމަށް ތުރީ ލައިން ވިޕެއް ނެރުމުން، މަޝްވަރާގެ މަގު ބަންދުވެފައިވާކަމަށެވެ.
އާޒިމް އެގޮތަށް ވިދާޅުވުމުން ނަޝީދު ވަނީ ބިލާ ގުޅޭގޮތުން ކަމާގުޅޭ ފަރާތްތައް ކޮމިޓީއަށް ހާޒިރުވުމަށް އަންގަވާފައިކަމަށް ވިދާޅުވެފައެވެ. އެގޮތުން ބުދަ ދުވަހު ބިލާ ގުޅޭގޮތުން ކަމާގުޅޭ މާހިރުންގެ ލަފާ ހޯދުމަށް އެބޭފުޅުން ކޮމިޓީއަށް ހާޒިރުކުރައްވާނެކަމަށް ނަޝީދު ވިދާޅުވިއެވެ.
ނަޝީދުގެ މިނިންމެވުމާ ގުޅިގެން ތިނަދޫ އުތުރު ދާއިރާގެ މެމްބަރު އަބްދުﷲ ސަނީފް ވިދާޅުވީ، ކަމާގުޅޭ މާހިރުން ހާޒިރުކުރުމަށް ނަޝީދު ނިންމަވާފައިވަނީ މެމްބަރުންގެ ރުހުމާ ނުލާކަމަށާއި އެއީ ރައީސަށް ނިންމެވޭނެ ނިންމެވުމެއް ނޫންކަމަށެވެ.
ނަޝީދު ވަނީ ނަޝީދުގެ ނިންމެވުން ދިފާއުކުރައްވައި ތަކުރާރުކޮށް ވާހަކަފުޅުދައްކަވާފައެވެ.
މީގެއިތުރުން ނަޝީދު ވިދާޅުވީ ރައްޔިތުންގެ މަޖިލީހުގެ ނިޒާމު ހިނގަނީ ތިން ކިޔުމެއްގެ މައްޗަށް ކަމަށެވެ. ފުރަތަމަ ކިޔުމަކީ މެމްބަރުން ބައިވެރިވެވަޑައިގެންނަވާ ގޮތަށް ތަޅުމުގައި ކުރިޔަށް ގެންދެވޭ މަސައްކަތް ކަމަށާއި، ދެވަނަ ކިޔުމަކީ ކޮމިޓީގެ މަސައްކަތްތައް ކަމަށެވެ.
ސަނީފް ވަނީ ކޮމިޓީ ބައްދަލުވުމުގެ ވަގުތު އިތުރުކުރުމަށް ދިއްދޫ ދާއިރާގެ މެމްބަރު އަބްދުﷲ ވަހީދު ހުށަހެޅުއްވި ހުށަހެޅުއްވުމަށް ތާއީދުކުރައްވާފައެވެ. އެކަމާގުޅޭގޮތުން ނަޝީދު ވިދާޅުވީ ކޮމިޓީ ވަގުތު އިތުރުނުކުރެވޭނެކަމަށެވެ.
ކޮމިޓީ ބައްދަލުވުން ނިންމަވާލައްވަމުން ނަޝީދު ވިދާޅުވީ ކަމާގުޅޭ މާހިރުން ބުދަ ދުވަހުގެ ކޮމިޓީ ބައްދަލުވުމަށް ގެންނަވާނެކަމަށެވެ.
ރައްޔިތުންގެ މަޖިލީހުގެ ގަވާއިދުގެ 160 ވަނަ މާއްދާގައި ބުނެފައިވަނީ، ކޮމިޓީއަކުން ކުރާ މަސައްކަތްތަކާ ގުޅޭގޮތުން ކޮމިޓީއަށް ހާޒިރުވެ ޖަވާބުދާރީވުމަށާއި ބަޔާނެއް ނުވަތަ ހެކިބަސް ދިނުމަށާއި، ކޮމިޓީއަށް ބޭނުންވާ ކޮންމެ ލިޔުމެއް ހުށަހެޅުމަށް އަމުރެއް ކުރެވޭނީ އެކޮމިޓީގެ ޖުމްލަ މެމްބަރުންގެ އަޣުލަބިއްޔަތުން އެކަން ފާސްކޮށްގެންކަމަށެވެ.
މަޖިލީހަށް މިހާރު ހުށަހަޅާފައިވާ ބިލުގައި ބުނެފައިވާގޮތުގައި، ޓެކްސް ބޮޑުކުރުމަށް ނިންމާފައިވަނީ އަންނަ އަހަރުގެ ޖެނުއަރީ 1 ވަނަ ދުވަހުން ފެށިގެންނެވެ. އެގޮތުން މުދަލާއި އާމްދަނީން ނަގާ ޓެކްސް (ޖީއެސްޓީ) 6 އިންސައްތައިން 8 އިންސައްތައަށް ބޮޑުކުރުމަށާއި، ފަތުރުވެރިކަމުގެ ދާއިރާގެ މުދަލާއި ޚިދުމަތުން ނަގާ ޓެކްސް (ޓީޖީއެސްޓީ) 12 އިންސައްތައިން 16 އިންސައްތައަށް ބޮޑުކުރަން ވަނީ ނިންމާފައެވެ.
އެންމެ ފުރަތަމަަ ރާއްޖޭގައި ޖީއެސްޓީއާއި ޓީޖީއެސްޓީ ނަގަން ފަށާފައިވަނީ 2011 ވަނަ އަހަރުއެވެ. 2011 ވަނަ އަހަރު އެންމެ ފުރަތަމަ ނަގަންފެށީ ޖީއެސްޓީ 3.5 އިންސައްތައެވެ. އަދި ޓީޖީއެސްޓީންވެސް 3.5 އިންސައްތައެވެ. އޭގެފަހުން 2012 ވަނަ އަހަރު ޖީއެސްޓީ 6 އިންސައްތަ ބޮޑުކުރިއެވެ. އަދި 2012 ވަނަ އަހަރު ޓީޖީއެސްޓީވެސް 6 އިންސައްތައަށް ބޮޑުކުރިއެވެ. އޭގެފަހުން 2013 ވަނަ އަހަރު ޓީޖީއެސްޓީ 8 އިންސައްތައަށް އަދި 2014 ވަނަ އަހަރު 12 އިންސައްތައަށް ބޮޑުކުރިއެވެ.
އޭގެފަހުން ޖީއެސްޓީއާއި ޓީޖީއެސްޓީއަށް ބަދަލު ގެނައުމަށް މަސައްކަތްކުރަމުންދަނީ މިހާރުއެވެ. ޓެކްސް ބޮޑުކުރުމަށް ހުށަހަޅާފައިވާ އިސްލާހާއެކު ޖީއެސްޓީން އިތުރުވާނީ 970 މިލިއަން ރުފިޔާކަމަށާއި، ޓީޖީއެސްޓީން އިތުރުވާނީ 2.1 ބިލިއަން ރުފިޔާކަމަށް ފިނޭންސް މިނިސްޓަރ އިބްރާހިމް އަމީރު ވަނީ ވިދާޅުވެފައެވެ. މިނިސްޓަރ ވިދާޅުވީ ޖީއެސްޓީއާއި ޓީޖީއެސްޓީ އިތުރުކުރުމަށްޓަކައި ހުށަހެޅި އެއް ސަބަބަކީ، ލިބޭ އާމްދަނީން ޚަރަދުތައް ހަމަޖެއްސުމަކީ ފިސްކަލް ޕޮލިސީގެ އެއް އަމާޒުކަމުގައިވާތީކަމަށެވެ.
