ޕާކިސްތާނުގެ ބޮޑުވަޒީރު ސައޫދީ އަރަބިއްޔާއަށް ވަޑައިގެންފި
24 އޮކްޓޯބަރު 2022 | ހޯމަ 18:16މި ބައްދަލުވުމަކީ ދުނިޔޭގެ އިގުތިސާދަށް ކުރިއަށް އޮތްތަނުގައި ގެނެވިދާނެ އިސްލާހުތަކާ ބެހޭގޮތުން މަޝްވަރާކުރުމަށް ބާއްވާ ބައްދަލުވުމެއް
ޕާކިސްތާނުގެ ބޮޑުވަޒީރު ސައޫދީގައި
ޕާކިސްތާނުގެ ބޮޑުވަޒީރު މުހައްމަދު ޝަހްބާޒް ޝަރީފް، ރަސްމީ ދަތުރުފުޅެއްގައި ސައޫދީ އަރަބިއްޔާއަށް ވަޑައިގެންފިއެވެ. މިދަތުރުފުޅަކީ ސައޫދީ އަރަބިއްޔާގައި އަންގާރަ ދުވަހު ފެށޭ ފިއުޗަރ އިންވެސްޓްމަންޓް އިނީޝިއޭޓިވް(އެފް.އައި.އައި)ގެ ހަވަނަ ބައްދަލުވުމުގައި ބައިވެރިވެވަޑައިގެންނެވުމަށް ކުރައްވާ ދަތުރުފުޅެކެވެ.
ކިންގް ޚާލިދް އިންޓަރނޭޝަނަލް އެއާޕޯޓުން ޝަހްބާޒް ޝަރީފަށް މަރުހަބާ ދަންނަވާފައިވަނީ ރިޔާޟްގެ ޑެޕިއުޓީ މޭޔަރ، ޕްރިންސް މުހައްމަދު ބިން އަބްދުއްރަހްމާނާއި ސައޫދީ ސަރުކާރުގެ އިސް ބައެއް އޮފިޝަލުންނެވެ.
އޮކްޓޯބަރ 25ން 27ށް ރިޔާޒްގައި އޮންނަ އެފް.އައި.އައި.ގައި ބައިވެރިވާ ފަރާތްތަކުގެތެރޭގައި، ދުނިޔޭގެ އިސް ސީ.އީ.އޯ.އިންނާއި، ޕޮލިސީ މޭކަރުންނާއި، އިންވެސްޓަރުންނާއި، ޒުވާން ލީޑަރުންނާއި އެނޫންވެސް ބައިނަލްއަގުވާމީ އިންވެސްޓްމަންޓް އަދި ދުނިޔޭގެ އިކޮނޮމީ ބައްޓަންކުރުމުގައި އައު ވިސްނުންތައް ހުށަހެޅޭނެ ފަރާތްތައް ހިމެނެއެވެ.
