ސައޫދީ ވަލީއަޙުދު އަންނަމަހު އިންޑިޔާ އަށް ދަތުރުފުޅެއް ކުރައްވަނީ

ބޮޑުވަޒީރު ނަރެންދުރަ މޯދީގެ ދައުވަތަކަށް ސައޫދީ ވަލީއަޙުދު މުހައްމަދު ބިން ސަލްމާން އަންނަމަހު އިންޑިޔާއަށް ދަތުރުފުޅެއް ކުރައްވަން ހަމަޖެހިއްޖެއެވެ.

މުހައްމަދު ބިން ސަލްމާން އިންޑިޔާ އަށް ވަޑައިގަތުމަށް ހަމަޖެހިފައިވަނީ އިންޑޮނިޝިޔާގެ ބާލީގައި އޮންނަ ޖީ ޓްވެންޓީ ގައުމުތަކުގެ ވެރިންގެ ސަމިޓު ބައްދަލުވުމަށް ވަޑައިގެންނެވުމުގެ މަގުމަތީގައެވެ.

އިންޑިޔާގެ ޚަބަރު ފަތުރާ ވަސީލަތްތަކުން ބުނާ ގޮތުގައި މުހައްމަދު ބިން ސަލްމާން ނޮވެމްބަރު 14 ވަނަ ދުވަހު އިންޑިޔާ އަށް ވަޑައިގެން ނަރެންދުރަ މޯދީ އާ ބައްދަލުކުރެއްވުމަށްފަހު އިންޑޮނީޝިޔާ އަށް ވަޑައިގަންނަވާނެ ކަމަށް ވަނީ ދެ ބޭފުޅުން އެކުއެކީގައެވެ.

ޖީ-ޓުވެންޓީ ސަމިޓު ބޭއްވުމަށް ހަމަޖެހިފައިވަނީ ނޮވެމްބަރު މަހުގެ 15 އިން 16 އަށް އިންޑޮނީޝިޔާގެ ބާލީގައެވެ.

އޭގެ ކުރިން، ދަތުރު ނުކުރެއްވުމަށް ޑޮކްޓަރުން ލަފާއަރުވާފައިވާތީ ނޮވެމްބަރު އެއްވަނަ ދުވަހު އަލްޖީރިޔާގައި އޮންނަ އަރަބި ސަމިޓުގައި ސައޫދީގެ ވަލީއަޙުދު ބައިވެރިވެވަޑައިނުގަންނަވާނެ ކަމަށް ބުނެ އަލްޖިރާގެ ރިޔާސަތުން ވަނީ، ބަޔާނެއް ނެރެފައެވެ. މިބަޔާނުގައި ބުނެފައިވާ ގޮތުން އަލްޖީރިޔާގެ ރައީސް އަބްދުލްމަޖީދު ތަބޫން އަށް ފޯނު ކުރައްވައި ސައޫދީ ވަލީއަޙުދުވަނީ އަރަބި ސަމިޓުގައި ބައިވެރިވެ ވަޑައިނުގެންނެވޭތީ ހިތާމަ ފާޅުކުރައްވާފައެވެ.

އޭގެ ފަހުން ސައޫދީ ޚާރިޖީ ވުޒާރާ އިން ވެސް ވަނީ ބަޔާނެއް ނެރެ، ދެ ބޭފުޅުން ފޯނުން ގުޅުއްވި ވާހަކަ ހާމަކޮށްފައެވެ. ނަމަވެސް އަރަބި ސަމިޓުގައި ވަލީއަޙުދު ބައިވެރިވެވަޑައިނުގަންނަވާނެ ކަމަށް ބުނެފައެއް ނުވެއެވެ.

އަރަބި ހެޑް އޮފް ސްޓޭޓުންގެ 31 ވަނަ ސަމިޓު ބޭއްވުމަށް ހަމަޖެހިފައިވަނީ ނޮވެމްބަރު 1ން 2އަށެވެ.

އިންޑިޔާގެ އެކްސްޓަރނަލް އެފެއާސް މިނިސްޓަރު އެސް.ޖައިޝަންކަރު މިދިޔަ މަހު ވަނީ ރިޔާޟް އަށް ދަތުރުފުޅެއް ކުރައްވާފައެވެ. އަދި މޯދީގެ ދައުވަތު ހުށަހަޅުއްވާފައިވަނީ އެ ދަތުރުފުޅުގައެވެ.