އިޤްތިޞާދީ އަދި މާލީ ގޮތުން އިނދަޖެހި، ހީނަރު ކަމުގެ އަނދަވަޅަކަށް ވެއްޓި، ސާފު ބޯފެނުގެ ޚިދުމަތުން މަޚްރޫމުވެ، ހޮސްޕިޓަލުތަކުގެ ޚިދުމަތްތައް މުޅިންހެން ހުއްޓިފައިވާ ލުބްނާންގެ ކޭމްޕުތަކުގައި ދިރިއުޅެމުންދާ ސޫރިއާގެ ރެފިއުޖީންނަށް ކޮލެރާ ރޯގާގެ ބިރުވެރިކަމާ ކުރިމަތިލާން މަޖުބޫރުވެއްޖެއެވެ.

ލުބްނާނުން ކޮލެރާގެ ފުރަތަމަ ކޭސް ރެކޯޑް ކުރީ މި ހިނގާ އޮކްޓޯބަރު މަހުގެ ކުރީކޮޅުގައެވެ. އެއީ ފާއިތުވީ 30 އަހަރު ދުވަހުގެ ތެރޭގައި ލުބްނާނުން ކޮލެރާ ބެކްޓީރިއާ ފެނިގެން ކުރި ފުރަތަމަ އިޝާރާތެވެ. މިއަދު އެ ޤައުމުގައި ކޮލެރާގެ 220 ކޭސް ރަޖިސްޓަރ ކޮށްފައި ވާ އިރު، މަރުގެ 5 ކޭހެއް ވަނީ ރިޕޯޓް ކޮށްފައެވެ.

ލުބްނާނުން ރެކޯޑް ކޮށްފައި ވާ ކޮލެރާގެ ގިނަ ކޭސްތައް ރިޕޯޓް ކޮށްފައި ވަނީ، ދާޚިލީ ހަނގުރާމައިގެ ސަބަބުން އުފަން ފަސްގަނޑު ދޫކޮށް، ރެފިއުޖީންގެ ގޮތުގައި ސޫރިއާގެ މިލިއަނެއްހާ މީހުން ދިރިއުޅެމުންދާ ކޭމްޕުތަކުން ކަމަށް، ލުބްނާނުގެ ސިއްޙަތާ ބެހޭ ވަގުތީ ވަޒީރު ފިރާޒް އަބިއާދު ވަނީ ވިދާޅުވެފައެވެ.

ޤުބް އިއްލިއާސް ސަރަޙައްދުން އެކަނިވެސް 7 ކޭސް ރެކޯޑް ކޮށްފައި ވާ އިރު، އޭގެ ތެރޭގައި ސޫރިއާގެ ކިތަން މީހުން ހިމެނޭ ކަމެއް، ނުވަތަ އަސަރު ފޯރާފައި ވަނީ ކޮންކޮން ކޭމްޕުތަކަކަށް ކަމެއް، ލުބްނާންގެ ސިއްޙަތާ ބެހޭ ވުޒާރާއިން ތަފްސީލު ކޮށްދީފައެއް ނުވެއެވެ.

ކޭމްޕުތަކުން ރޮއިޓަރޒްއާ ވާހަކަ ދެއްކި މީހުންނަށް ބަލާއިރު، އެންމެ އަންހެނެއް ފިޔަވާ އެހެން މީހުންނަކަށް ކޮލެރާ ރޯގާގެ މާ ބޮޑު ތަފްސީލެއް ނުވެސް އެނގެއެވެ.

9 ދަރިންގެ މަންމައެއް ކަމަށް ވާ ފާޠިމާ ހުޞައިން އޭނާގެ ހާލަތު ކިޔައިދިނެވެ.

ފާޠިމާ ބުނާ ގޮތުގައި، ނަޖިސް ފެން ބޭރު ކުރާ ސަރަޙައްދެއްގައި ހުރި ފެން އިސްކުރަކުން، އޭނާގެ އެންމެ ހަގު އަންހެން ދަރިފުޅު ފެން ބޯން ހުއްޓަތީ އޭނާއަށް ވަނީ ފެނިފައެވެ. އަދި ފެންވަޅުން ފެން ނުބުއިމަށް އޭނާގެ ދަރިންނަށް އިރުޝާދު ދެމުން ދާ ކަމަށް، ކަރުނަތައް ފޮހެމުން، ފާޠިމާ ބުންޏެވެ.

ރޮއިޓަރޒްއާ ވާހަކަ ދެއްކި ގިނަ ރެފިއުޖީން ބުނި ގޮތުގައި، ބަންދުކުރި ފުޅީގައި ހުންނަ ބޯފެނަށް ފައިސާ ދައްކަނީ އަމިއްލަ ޖީބުންނެވެ. ނަމަވެސް ބާޒާރުތަކުގައި ތަކެތީގެ އަގުތައް އިންތިހާއަށް އުފުލެމުން ދިއުމުގެ ސަބަބުން، އެއީ އަތްފޯރާ ވަރުގެ ކަމަކަށް ނުވުން އޮތީ މާ ދުރުގައި ނޫން ކަމުގައިވެސް ވެދާނެއެވެ.

ކަން މިހެން އޮތް އިރު، ބޮޑު މަންޒަރަށް ބަލާލުން މުހިންމެވެ.

ލުބްނާންގައި ހުންނަވާ، ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ)ގެ ޑައިރެކްޓަރު، ޢަބްދުއްނާޞިރު އަބޫބަކުރު ވިދާޅުވީ، ކޮލެރާގެ ސަބަބުން ލުބްނާނަށް ވަރަށް ބޮޑު ނުރައްކަލެއް ކުރިމަތިވެފައި ވާ ކަމަށާ، އެހެން ޤައުމުތަކަށްވެސް ބަލިމަޑުކަން ފެތުރިގެން ދިއުން ވަރަށް ގާތް ކަމަށެވެ.