ނޮޓިންހަމްގެ އަތްދަށުގެ ލިވަޕޫލަށް އަނެއްކާވެސް ހާސްކަން

އިނގިރޭސި ޕްރިމިއަރ ލީގުގައި ނޮޓިންހަމް ފޮރެސްޓް އަތުން ބަލިވެ ލިވަޕޫލަށް އަނެއްކާވެސް ހާސްކަން ކުރިމަތިވެއްޖެއެވެ.

ލީގުގައި އެންމެ ފަހުން ލިވަޕޫލުން ވަނީ މެންޗެސްޓަރ ސިޓީއާ ދެކޮޅަށް ކުޅުނު މެޗުން މޮޅުވެފައެވެ. މި ސީޒަންގެ ލީގުގައި އެ ޓީމުގެ ފަރާތުން ދަށް ނަތީޖާ ތަކެއް ފެނުނުނަމަވެސް، ސިޓީގެ މެޗަށްފަހު އެ ޓީމު އޮތީ އުންމީދެއްގައެވެ. މެޗުން މޮޅުވެ ލިވަޕޫލަށް ފަސްވަނާގައި އޮތް މެންޗެސްޓަރ ޔުނައިޓެޑާ ޕޮއިންޓުގެ ގޮތުން އެއްވަރުކުރުމުގެ ފުރުސަތު އޮތެވެ.

ހޮނިހިރު ދުވަހުގެ ނޮޓިންހަމްގެ ދަނޑުގައި ކުޅުނު މެޗުގައި އެ ޓީމުން ލިވަޕޫލްގެ މައްޗަށް ކުރި ހޯދީ 0-1ންނެވެ. މެޗުގެ ހަމައެކަނި ލަނޑު ފެނުނީ ދެ ވަނަ ހާފުގައެވެ. ދެ ވަނަ ހާފު ފަށައިގެން 55 ވަނަ މިނެޓުގައި ނޮޓިންހަމަށް ލީޑު ނަގައިދިނީ ޓައިވޯއެވެ.

މެޗުން ބަލިވެ ލިވަޕޫލް އޮތީ ތާވަލްގެ ހަތްވަނަ މަގާމުގައެވެ. އެއީ އެ ޓީމު ކުޅުނު 11 މެޗުން ލިބުނު 16 ޕޮއިންޓާއެކުއެވެ. ނޮޓިންހަމް އޮތީ 12 މެޗުން ނުވަ ޕޮއިންޓާއެކު ރެލިގޭޝަން ޒޯންގައެވެ.