އިސްލާމްދީނަށް ލޯބިކުރާ، ރިވެތި އަޚުލާގުގެ ދަރިވަރުންތަކެއް ބިނާކުރުމަށް ޕްރޮގްރާމެއް ފަށައިފި
ޕްރޮގްރާމުގައި މައިގަނޑު 4 ދާއިރާއަކުން ދަރިވަރުންނަށް ކަންކަން ދަސްކޮށްދޭނެ
"ދަ ލީޑަރ އިން މީ" އިފްތިތާހުކުރުމުގެ ރަސްމިއްޔާތު
ދަރިވަރުންގެ ގައިގައި ރިވެތި އަޚުލާގާއި ދިވެހި އިސްލާމީ މުޖުތަމަޢުއަށް ފައިދާހުރި ކުއްޖަކަށްވުމަށް ބޭނުންވާ އަގުތައް އަށަގެންނެވުމަށް އަމާޒުކޮށް "ދަ ލީޑަރ އިން މީ"ގެ ނަމުގައި ވެލިއު އެޑިޔުކޭޝަން ޕްރޮގްރާމެއް ފަށައިފިއެވެ.
މިކަމަށްޓަކާ ހޮނިހިރު ދުވަހުގެ ހެނދުނު ބޭއްވި ޚާއްސަ ރަސްމިއްޔާތުގައި މި ޕްރޮގްރާމް އިފްތިތާހުކޮށްދެއްވީ ރައީސުލްޖުމްހޫރިއްޔާގެ ނާއިބު ފައިސަލް ނަސީމެވެ. މި ރަސްމިއްޔާތުގައި ދަރިވަރުންނާއި، އެޑިއުކޭޝަން މިނިސްޓަރގެ އިތުރުން މިނިސްޓްރީގެ އިސްވެރިން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވީ މިޕްރޮގްރާމްގެ މައިގަނޑު މަގުސަދަކީ ޤައުމީ މަންހަޖުގައި ހިމެނިފައިވާ އަގުތައް ދަރިވަރުންގެ ގައިގައި އަށަގެންނެވުމަށް ސްކޫލުގެ ތެރެއިން ކުރެވޭ މަސައްކަތްތަކަށް އިތުރު ބާރެއް އެޅުން ކަމަށެވެ.
ގައުމީ މަންހަޖު މައިގަނޑު 8 ގާބިލިއްޔަތެއްގެ މައްޗަށް ބިނާވާއިރު، މަންހަޖުގެ ތެރެއިން ދަރިވަރުންގެ ގައިގައި އަށަގެންނެވުމަށް ބާރު އަޅާ އަގުތައް މައިގަނޑު 4 ބައެއްގެ މައްޗަށް ބަހާލެވިފައިވާކަމަށް މިނިސްޓަރ ވިދާޅުވިއެވެ. އެއީ ތިމާގެ އަމިއްލަ ނަފުސާ ގުޅުންހުރި އަގުތަކާއި ތިމާގެ އާއިލާއާއި އަނެކުންނާ ގުޅުންހުރި އަގުތަކާއި، ގައުމީ އަދި ބައިނަލްއަގުވާމީ މުޖުތަމައުއާ ގުޅުންހުރި އަގުތަކާއި ތިމާވެއްޓާއި ގުޅުން ހުރި އަގުތައް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިފަދަ ހަރަކާތް ތަކުގެ ސަބަބުން މަދަރުސާތަކުން ނުކުންނަ ކޮންމެ ދަރިވަރަކީ ސައްހަ އިސްލާމް ދީން މަތީގައި ދެމިތިބޭ، ޤައުމު ދެކެ ލޯބިވާ، 22 ވަނަ ޤަރުނުގައި ކާމިޔާބު ކަމާއެކު ދިރިއުޅުމަށް ބޭނުންވާ މަޢުލޫމާތާއި ހުނަރުތައް ލިބިތިބި، ދުޅަހެޔޮ ހަށިހެޔޮ ދަރިވަރުންތަކަކަށް ވުމަކީ އެދިލައްވާ ކަމެއް ކަމަށެވެ.
