މިހާރަކަށް އައިސް އިސްލާމްދީނަށް ފާޅުގައި ދަނީ އިހާނެތިކޮށް ހިތަމުން:ޚުތުބާ

މިހާރަކަށް އައިސް އިސްލާމްދީނަށް ފާޅުގައި ދަނީ އިހާނެތިކޮށް ހިތަމުން ކަމަށާއި އިބްރާހީމްގެ ފާނާއި އެކަލޭގެ ފާނުގެ ދަރިކަލުން ދެއްކެވި ޤުރުބާނީން އިސްލާމީ އުއްމަތް މިއަދު މިވަނީ ޢިބްރަތް ހާސިލް ކުރަން ޖެހިފައި ކަމަށް މިއަހަރުގެ އަޟްޙާ ޢީދު ނަމާދުގައި ވިދާޅުވެފައިވާ ޢީދު ޚުތުބާގައި ވިދާޅުވެއްޖެއެވެ.

ޚުތުބާގައި ފާހަގަ ކުރައްވާފައިވާ ގޮތުގައި މިހާރަކަށް އައިސް ފެންނަމުން ދަނީ އިސްލާމްދީނަށް ފާޅުގައި އިހާނެތިކޮށް ހިތަމުންދާ ތަން ކަމަށާއި ކީރިތި ޤުރުއާނަށް ދަނީ އިހާނެތިކޮށް ހިތަމުން ކަމަށެވެ. މި ދީނުގެ ނަބިއްޔާއަށް ދަނީ ފުރައްސާރަ ކުރަމުން ކަމަށްވެސް ޚުތުބާގައި ވެއެވެ.

"މުސްލިމުންގެ މުޤައްދަސް ތަންތަނަށް އަރައި އެތަންތަން މި ދަނީ ފޭރިގަންނަމުންނެވެ. މުސްލިމުންގެ ވެރީންގެ އަބުރަށް ދަނީ އަރައިގަންނަމުންނެވެ. އިސްލާމީ ޤައުމުތަކުގެ އިންތަކުގެ ޙުރުމަތް ދަނީ ކަނޑަމުންނެވެ. މުސްލިމް ޢިލްމުވެރިންގެ ޤަދަރު ދަނީ ވައްޓައިލަމުންނެވެ. އިސްލާމީ ޔުނިވަރސިޓީތަކާއި މަތީ ތަޢުލީމުދޭ މަރްކަޒުތަކުގެ މަންހަޖުތައް ބަދަލުކުރެވޭތޯ ދަނީ ފިއްތުންތައް ކުރިމަތިކުރުވަމުންނެވެ. އިސްލާމްދީން މިވަނީ އެދީނުގެ ވަޠަނުގައި ބީރަށްޓެހި ކޮށްފައެވެ. ސައްތައިން ސައްތަ އިސްލާމީ ޤައުމެއް އޮވެގެން ނުވާނެ ކަމަށް ދަނީ އަޑު އުފުލަމުންނެވެ. މުސްލިމުންގެ ޙައްޤުތައް ވަނީ ޗިސްޗިސްކޮށްފައެވެ. އިސްލާމްދީނަށް އެމީހުންގެ ވަގުތުންނާއި، އެމީހުންގެ މުދަލުންނާއި، އެމީހުންގެ އީޖާދުތަކުން ޤުރުބާންވާން ކެރޭ މީހުންނަށް މިއަދު ވަނީ ބޭނުންވެފައެވެ. އިސްލާމްދީނުގެ ބުރުސޫރަ ހުތުރު ކުރުވާ މީހުންނަށް ނޫނެކޭ ބުނަން ކެރޭވަރުގެ މުސްލިމް ދަރިންނަށް ވަނީ ބޭނުންވެފައެވެ."

ޚުތުބާގައި ވިދާޅުވެފައިވާ ގޮތުގައި އީދަކީ މިނިވަންކަމުގެ ޢީދެއް ކަމަށާއި ޢީދު ހަދަންވާނީ ހަސަދަވެރިކަމުންނާއި ފުރައްސާރަ ކުރުންފަދަ ރޯގާތަކުން މިނިވަންކޮށްދޭ ޢީދަކަށް ކަމަށެވެ.

"ޢީދަކީ މިނިވަންކަމުގެ ޢީދެވެ. އަޅުގަނޑުމެންގެ ޢީދު ހަދަން ވާނީ ނަފްސުތައް ޝަހަވާތްތަކުން މިނިވަންކޮށްދޭ ޢީދަކަށެވެ. ހަވާ ނަފްސުގެ ދަހިވަތިކަމުން މިނިވަންކޮށްދޭ ޢީދަކަށެވެ. ހިތްތައް ޙަސަދަވެރިކަމުންނާއި ނީހަވެރިކަމުންނާއި ދެފުށް ދެގޮތްކަމުން މިނިވަންކޮށްދޭ ޢީދަކަށެވެ. ދޫތައް ދެބައޮޑުވުމާއި ނެތިމޮށުމާއި އާޑަފުރައްސާރަކުރުންފަދަ ރޯގާތަކުން މިނިވަންކޮށްދޭ ޢީދަކަށެވެ."