ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕްގައި ޕޮލެންޑު އޮތީ އުނދަގޫ ގްރޫޕެއްގައި ކަމަށް އެ ޓީމުގެ ކެޕްޓަން ރޮބާޓް ލެވަންޑޯސްކީ ބުނެފިއެވެ.
ލެވަންޑޯސްކީ މިހެން ބުނީ ދުނިޔޭގެ ފުޓުބޯޅައިގެ މައި އިދާރާ (ފީފާ) ވެބްސައިޓަށް ދިން އިންޓަވިޔު އެއްގައެވެ. ޕޮލެންޑު ހިމެނިފައިވަނީ އާޖެންޓީނާ، ސައުދީ އަރަބިއްޔާ އަދި މެކްސިކޯއާއެކު ގްރޫޕް ސީގައެވެ. ލެވަންޑޯސްކީ ބުނީ އޭނާ ދެކޭ ގޮތުގައި ވަރުގަދަ ޓީމުތަކަކާއެކު އުނދަގޫ ގްރޫޕެއްގައި އޮތް ނަމަވެސް، ޕޮލެންޑަށް ކާމިޔާބު ހޯދޭނެ ކަމަށެވެ.
އޭނާ ބުނީ ބޭނުންވަނީ ޤައުމުގެ ސަޕޯޓަރުންނާއި އޭނާގެ ސަޕޯޓަރުންނަށް ދަނޑު މަތީގައި އޭނާ އަށް ކުރެވޭނެ ކަންކަން ދައްކަން ކަމަށެވެ. ލެވަންޑޯސްކީ ބުނީ އުނދަގޫ ގްރޫޕެއްގައި އޮތް ނަމަވެސް އެކަމަށް އޭނާ ބަހަނާތަކެއް ދައްކަން ބޭނުންނުވާ ކަމަށެވެ. ލެވަންޑޯސްކީ ފާހަގަ ކުރި ގޮތުގައި އޭނޭ ބޭނުންވަނީ ކުރިއަށް ދެވޭނެ ގޮތްތަކެއް ހޯދައި، ކުރިއަށް ދާށެވެ.
މީގެ އިތުރުން ލެވަންޑޯސްކީ ބުނީ އާޖެންޓީނާ އަކީ މިފަހަރުގެ ވޯލްޑް ކަޕް ކާމިޔާބު ކުރުމަށް ފޭވަރިޓުންގެ ތެރޭގައި ހިމެނޭ ޓީމެއް ކަމަށާއި، މެކްސިކޯ އަކީ ނުރައްކާތެރި ޓީމެއް ކަމަށެވެ. އޭނާ ބުނީ އާޖެންޓީނާގެ ކެޕްޓަން ލިއޮނެލް މެސީ ކަހަލަ ލެޖެންޑަކާ ދެކޮޅަށް ކުޅޭ އިރު، އެއީ ޕޮލެންޑަށް އެންމެ އުނދަގޫ މެޗަށްވާނެ ކަމަށެވެ. މެސީ ކަހަލަ ހުނަރުވެރި ކުޅުންތެރިންނާ ދެކޮޅަށް ކުޅެލަން ލިބުމަކީ ރަނގަޅު ކަމެއް ކަމަށް ވެސް އޭނާ ބުނެފައި ވެއެވެ.
މެކްސިކޯއާ ގުޅޭ ގޮތުން ލެވަންޑޯސްކީ ބުނީ އެ ޓީމަކީ އެންމެ ފަހު ކަށިގަނޑާ ހަމައަށް ވެސް މަސައްކަތް ކުރާ ޓީމެއް ކަމަށެވެ. އޭނާ ފާހަގަ ކުރި ގޮތުގައި މެކްސިކޯ ޓީމު ބިނާވެފައި އޮތީ ތަޖުރިބާ ހުރި ކުޅުންތެރިންނާއި، ހުނަރުވެރި ކުޅުންތެރިންގެ މައްޗަށެވެ.
ވޯލްޑް ކަޕް ގްރޫޕް ސެޓޭޖުގެ ފުރަތަމަ މެޗުގައި ޕޮލެންޑު ނިކުންނާނީ މެކްސިކޯއާ ދެކޮޅަށެވެ.
