ޖެރާޑްގެ ވަޒީފާ ގެއްލިއްޖެ

ލިވަޕޫލްގެ ކުރީގެ ކެޕްޓަން ސްޓީވަން ޖެރާޑްގެ ވަޒީފާ ގެއްލިއްޖެއެވެ.

ޖެރާޑްގެ ވަޒީފާ ގެއްލުނީ ފުލަމް އަތުން 3-0 ން ބަލިވި މެޗަށްފަހު އެސްޓަން ވިލާއިން އޭނާ ކޯޗުކަމުން ވަކިކުރުމުންނެވެ. ރޭންޖަރސް ދޫކޮށް އެސްޓަން ވިލާއާ ހަވާލުވި އިނގިރޭސި ކުރީގެ މިޑްފީލްޑަރަށް މިސީޒަންގައި ލީގުގައި ހޯދައިދެވުނީ އެންމެ ދެ މޮޅެވެ. ރެލިގޭޝަން ޒޯނަށްވުރެ ކުރީގައި އޮތީވެސް ގޯލްގެ ތަފާތުންނެވެ. ޖެރާޑް އެސްޓަން ވިލާއާ ހަވާލުވީ 2021 ވަނަ އަހަރުގެ ނޮވެމްބަރު މަހުއެވެ. ޖެރާޑާއެކު އެސްޓަން ވިލާއިން ކުރި ދަތުރު ކާމިޔާބެއް ނޫނެވެ. އޭނާގެ އިރުޝާދުގެ ދަށުން ކުޅުނު 40 މެޗުގެ ތެރެއިން މޮޅުވީ އެންމެ 13 މެޗުންނެވެ. އެހެންކަމުން 11 މަހަށްފަހު ކްލަބުން ނިންމީ, ޖެރަޑްކޮށްދިން މަސައްކަތަށް ޝުކުރު އަދާކުރުމަށްފަހު ކޯޗުކަމުން ވަކިކުރާށެވެ.

ޖެރާޑް ވަނީ 2018 ވަނަ އަހަރު ރޭންޖަރސްއާ ހަވާލުވެ އެކްލަބާއެކު ރަނގަޅު މަސައްކަތްތަކެއް ކޮށްފައެވެ. އެކަމަކު ޕްރިމިއަރ ލީގުގައި އެކަށީގެންވާ ނަތީޖާތަކެއް ހޯދައި ނުދެވި 42 އަހަރުގެ ކޯޗު ވަކިކުރީ, ވަކިކޮށްފާނެކަމަށް އޭނާއަށްވެސް ބެލެވިފައި ވަނިކޮށެވެ.