މާލޭ ލީގުގައި ވެލެންސިއާއަށް ގެއްލެންވާ ހުރިހާ އެއްޗެއް ގެއްލިފައިވާ ކަމަށާއި، ދެން އޮތީ ލިބެން އޮތް އެއްޗެއް ހޯދުން ކަމަށް ވެލެންސިއާގެ ކޯޗު އަހުމަދު މުޖުތަބާ (ފެސްކޯ) ބުނެފިއެވެ.

މާލޭ ލީގުގައި އީގަލްސް އަދި ވެލެންސިއާ ބައްދަލުކުރާ މެޗުގެ ކުރިން ނޫސްވެރިންނަށް މައުލޫމާތު ދެމުން ފެސްކޯ ބުނީ ޓީމުގެ ކުޅުންތެރިނގެ އަހުލާގު ވަރަށް ރަނގަޅު ކަމަށާއި، މިހާރު ވެލެންސިއާއަށް ލީގުގައި ގެއްލޭނެ އެއްވެސް އެއްޗެއް ނެތް ކަމަށެވެ. އެގޮތުން މިހާރު ކުޅުންތެރިންވެސް މަސައްކަތްކުރާނީ ލިބެން އޮތް އެއްޗެއް ހޯދަންކަމަށް ފެސްކޯ ވަނީ ބުނެފައެވެ.

ފެސްކޯ ބުނީ ވެލެންސިއާ ޓީމުގެ ފޯކަސް މުޅިން އެހެން ދިމާލަކަށް ބަދަލުވެފައިވާ ކަމަށާއި، މިވަގުތު ކުޅެވޭ މެޗުތަކަކީ ޓީމަށް ލިބޭ ރަނގަޅު މެޗުތަކެއް ގޮތުގައި ދެކޭ ކަމަށެވެ. އޭނާ ބުނީ ޓީމުގައި ތިބީ ތަޖުރިބާގެ ގޮތުން ވަރަށް އައު ކުޅުންތެރިން ކަމަށާއި، މިއީ އެ ކުޅުންތެރިން ރަނގަޅަށް ޓެސްޓުކުރަން ލިބޭ ފުރުސަތެއްކަމަށެވެ.

މީގެއިތުރުން ފެސްކޯ ބުނީ ލީގުގެ ފުރަތަމަ ބުރުގައި ޕޮއިންޓެއް ލިބުނީ ގްރީން ސްޓްރީޓް އަތުން ކަމަށާއި، ފުޓުބޯޅައިގައި އޮންނަނީ ހަމައެކަނި އެންމެ ޓީމެއް އަތުން ޕޮއިންޓް ހޯދުން ނޫން ކަމަށެވެ. އޭނާ ބުނީ ވެލެންސިއާއިން އަބަދުވެސް މަސައްކަތްކުރަނީ މެޗަކަށްފަހު މެޗެއް ރަނގަޅުކުރުން ކަމަށެވެ.

މާލޭ ލީގުގައި ވެލެންސިއާ 10 މެޗު ކުޅެފައިވާއިރު، އެޓީމަށް ލިބިފައިވަނީ އެންމެ ދެ ޕޮއިންޓެވެ. އެއީ އެ ޓީމު އެއްވަރުވި ދެމެޗުން ލިބުނު ދެ ޕޮއިންޓެވެ. ދެން ކުޅުނު 8 މެޗުންވެސް ވެލެންސިއާ ބަލިވެފައިވާއިރު، އެ ޓީމަށް އެއްޗެސް މެޗަކުން ކާމިޔާބެއް ހޯދިފައެއް ނުވެއެވެ.