ޑެންގީ ހުން އިތުރުވަމުން އަންނާތީ މަދިރި ނައްތާލުމަށް ހުޅުމާލޭގައި ބޮޑު ހަރަކާތެއް ބޭއްވުމަށް އެޗްޑީސީން ނިންމައިފިއެވެ.

އެޗްޑީސީން ބުނީ ޑެންގީ ކޮންޓްރޯލްކުރުމުގެ ގޮތުން މަދިރި ނައްތާލުމަށް "ޑެންގީ އިޖާބަ"ގެ ނަމުގައި އެ ކުންފުނިން އިންތިޒާމުކުރާ ހަރަކާތް އޮންނަނީ އަންނަ ހޮނިހިރު ދުވަހު ކަމަށެވެ. ހޮނިހިރު ދުވަހުގެ ހެނދުނު 7 ޖަހާއިރު ފެށުމަށް ހަމަޖެހިފައިވާ އެ ހަރަކާތުގެ ދަށުން، ހުޅުމާލޭގައި މަދިރި އުފެދޭ ތަންތަން ނައްތާލައި ސާފުކުރަން ވަނީ ހަމަޖެހިފައެވެ.

ހުރިހާ އެންމެން ގުޅިގެން، ހުޅުމާލޭގައި ޑެންގީ ހުން ފެތުރުން ހުއްޓުވުމަށް އެ ހަރަކާތުގައި ބައިވެރިވެ އެހީތެރިވުމަށް އެޗްޑީސީން އެދެއެވެ.

އެޗްޑީސީން ބުނި ގޮތުގައި މަދިރި އުފެދޭ ތަންތަން ނައްތާލުމަށް ކުރިއަށް ގެންދާ މި ހަރަކާތުގައި ސަރުކާރުގެ އެކި އިދާރާތަކާއި ކުންފުނިތަކާއި ސުކޫލްތަކުގެ އިތުރުން އަމިއްލަ ޖަމިއްޔާތަކުން ވެސް ބައިވެރިވާނެއެވެ.

ހަމައެއާއެކު އާންމުންނަށް ވެސް މި ހަރަކާތުގައި ބައިވެރިވެވޭނެ ކަމަށް އެޗްޑީސީން ބުނެއެވެ.

މިދުވަސްވަރު ޑެންގީ ހުން ފެންނަ މިންވަރު އަންނަނީ އިތުރުވަމުންނެވެ. އެޗްޕީއޭއިން ބުނީ މިއަހަރުގެ އޭޕްރިލް މަހުން ފެށިގެން މިހާތަނަށް މާލެއާއި އަތޮޅުތަކުން ޑެންގީ ހުން ޖެހިގެން ރިޕޯޓު ކުރެވެމުންދާ އަދަދު ވެސް އިތުރުވެފައިވާކަމަށެވެ.

އާންމު ގޮތެއްގައި ކޮންމެ އަހަރަކު ވެސް ވިއްސާރަ މޫސުމާ ގުޅިގެން ޑެންގީ އުޅޭ ނިސްބަތް އިތުރުވެގެންދާ ކަމަށާއި، މި އަހަރަކީ ގިނައިން ވިއްސާރަކުރި އަހަރަކަށްވެފައި، މިހާރު ވެސް ކުރަމުންދާ ވިއްސާރައާ ގުޅިގެން މަދިރި އާލާވެ އިތުރުވުން ކުރިއަށް އޮތްތަނުގައި ގިނަކަމަށް ބެލެވޭ ކަމަށް ވެސް އެޗްޕީއޭއިން ބުނެއެވެ.