ސަރުކާރުން ރަށްރަށުގައި ފުޓުބޯޅަ ދަނޑުތައް ޤާއިމުކުރަމުންދަނީ އެ ރަށެއްގެ ކައުންސިލާއި، ރައްޔިތުން ބޭނުންވާ ގޮތަކަށް ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.
ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި މެމްބަރަކު ކުރި ސުވާލަކީ ޓާފް ދަނޑުތައް އެޅުމުގެ ބަދަލުގައި ވިނަ ދަނޑު ޤާއިމި ކުރުމުގެ ވިސްނުން ގެންގުޅެންތޯއެވެ. އެ ސުވާލަށް ޖަވާބު ދެއްވަމުން މިނިސްޓަރު މަޚްލޫފް ވިދާޅުވީ ރަށްރަށުގައި ދަނޑުތައް ޤާއިމު ކުރަނީ މިނިސްޓްރީން ބޭނުންވާ ގޮތަކަށް ނޫން ކަމަށާއި، އެކަންކަން ކުރަނީ އެރަށެއްގެ ކައުންސިލާއި ރައްޔިތުން ބޭނުންވާ ގޮތަަށް ކަމަށެވެ.
މިނިސްޓަރު ވިދާޅުވީ ކައުންސިލުން ބޭނުންވަނީ ޓާފްގެ ބަދަލު ވިނަ ދަނޑެއް ކަމުގައިވަނީނަމަ، އެ މަސައްކަތް ކުރިއަށް ގެންދިޔުމަށް ކައުންސިލާ ހަވާލުކުރާނެ ކަމަށެވެ. އަދި ޓާފް ދަނޑު އެޅުމަށް ކުރަން ޖެހޭ ޚަރަދަށްވުރެ، ވިނަ ދަނޑު އެޅުމަށްދާ ޚަރަދު ކުޑަކަމަށް މިނިސްޓަރު ވިދާޅުވިއެވެ. މިނިސްޓަރު ވިދާޅުވީ ތ.ކަނޑޫދޫގައި އޮތީ ވިނަ ދަނޑު ހަދާ ގޮތަށް ކައުންސިލާ ހަވާލުކޮށްފައި ކަމަށެވެ.
މިސާލަކަށް ތ.އަތޮޅު ކަނޑޫދޫގައި އަޅުގަނޑުމެން ވާނީ ވިނަ ދަނޑު ހަދާ ގޮތަށް ކައުންސިލާ ހަވާލުކޮށްފައި. އަދިވެސް އެހެން ރަށެއް އަޅުގަނޑު ހަނދާންވާ ގޮތުން ހަމަ އެގޮތަށް ބޭނުންވެގެން އަޅުގަނޑުމެން ވާނެ ހުއްދަ ދީފައި. ހަގީގަތަކީ ދަނޑު ހަދަން، އަޅުގަނޑުމެން ޓާފް ދަނޑު ހެދުމާއި ވިނަ ދަނޑެއް ހެދުމަށްދާ އަގަށް ބަލާއިރު އަޅުގަނޑު ޤަބޫލުކުރަނީ ވިނަ ދަނޑެއް ހެދުމުގެ މަސައްކަތް އަގު ވެސް ހެޔޮވާނެ ކަމަށް. އެކަމަކު މެއިންޓެނެންސް އަށް ބަލާއިރު، އަޅުގަނޑު ޕާސަނަލީ ގަބޫލެއް ނުކުރަން އެީ ރާއްޖޭގައި ކުރެވިދާނެ ކަމެއް ކަމަށް.އަޙުމަދު މަޚްލޫފް / ޔޫތު މިނިސްޓަރު
މިނިސްޓަރު ވިދާޅުވީ ރަށެއްގައި ވިނަ ދަނޑެއް ހައްދައިގެން އެކަން ކުރެވޭނެ ކަމަކަށް ޤަބޫލު ނުކުރެވޭ ކަމަށެވެ. ސަބަބަކީ އެ ދަނޑުގެ މެއިންޓެނެންސްއަށް ބޮޑު ހޭދައެއް ކުރަން ޖެހޭނޭތީ ކަމަށް މިނިސްޓަރު ވިދާޅުވިއެވެ. މީގެ އިތުރުން މިނިސްޓަރު ވިދާޅުވީ މާލާގެ ގަލޮޅު ދަނޑާއި، ހެންވޭރު ދަނޑުގެ މެއިންޓެނެންސް ބަލަހައްޓަން ޔޫތު މިނިސްޓްރީން ކުރަން ޖެހޭ ޚަރަދާއި މަސައްކަތް އެނގިލައްވާ ކަމަށެވެ. މިނިސްޓަރު ވިދާޅުވީ ރާއްޖޭގެ ތިމާވެށީގައި ވިނަ ދަނޑު ހައްދައިގެން ނުކުޅެވޭނެތީ ޓާފް ދަނޑު އަޅަނީ ކަމަށެވެ.
އިތުރަށް މިނިސްޓަރު ވިދާޅުވީ މިހާރު ވެސް ބަޖެޓު ކުރެވިފައިވާ ރަށްތަކުގެ ކައުންސިލުން ވިނަ ދަނޑު ހަދަން ބޭނުންވެގެން އެދޭނަމަ އެކަން އެގޮތަށް ކުރުމަށް ކައުންސިލާ ހަވާލުކުރާނެ ކަމަށެވެ.
