މިސަރުކާރު ވެރިކަމާ ހަވާލުވިއިރު އޮތީ ރަށް ރަށުގައި ފުޓުބޯޅަ ކުޅުން އެއްކޮށް ނިމުމަކަށް އައިސްފައިކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުންނެވެ. މިނިސްޓަރު ވިދާޅުވީ ރާއްޖޭގެ ފުޓުބޯޅަ ކުރިއެރުވުމަށް ސަރުކާރުން ވަރަށް ބޮޑެތި މަސައްކަތް ކުރަމުން އަންނަ ކަމަށާއި، އޭގެ ތެރެއިން އެއް މަސައްކަތަކީ ރަށް ރަށުގައި ބޮޑު ފުޓުބޯޅަ ދަނޑު ޤާއިމުކުރުން ކަމަށެވެ. މި ސަރުކާރު އައިި އިރު ރަށްރަށުގައި ފުޓުބޯޅަ ކުޅުން ހުއްޓިފައި އޮތްކަން ފާހަގަކުރަމުން މިނިސްޓަރު ވިދާޅުވީ، ރަށްރަށުން ފެންނަނީ ފުޓްސަލް ކުޅޭ މަންޒަރު ކަމަށެވެ. މަޚްލޫފް ވިދާޅުވީ ރަށްރަށުގައި ބޮޑެތި ދަނޑުތައް ޤާއިމު ކުރުމުގެ ބޭނުމަކީ ރަނގަޅު ނަތީޖާއެއް ނެރުން ކަމަށެވެ.
އެހެންވީމާ އެތަނުގައި އެ ދަނޑުތައް ޤާއިމުކޮށްގެން އެ ރަށްރަށުގައި އަލުން މި ކުޅުން ފެށިގެން ގޮސް ރަނގަޅު ނަތީޖާއަކާ ހަމައަށް ދިޔުން އަޅުގަނޑުމެންގެ ބޭނުމަކީ. އަޅުގަނޑު އުންމީދުކުރަނީ މިހާރު މި ޤާއިމު ކުރެވޭ ވަސީލަތްތަކުގެ ނަތީޖާ، މީގެ ފަސް އަހަރު، ހަ އަހަރު ފަހުން ފެނިގެން ދާނެ ކަމަށް.އަޙުމަދު މަޚްލޫފް / ޔޫތު މިނިސްޓަރު
މީގެ އިތުރުން މިނިސްޓަރު މަޚްލޫފް ވިދާޅުވީ މިހާރު ރަށްރަށަށް ކުރަމުން އަންނަ ދަތުރުތަކުގައި ތުއްތު ކުދިން ނުކުމެ ފުޓުބޯޅަ ކުޅުމުގައި އުޅޭ މަންޒަރު މަޑުމަޑުން ފެންނަ ކަމަށެވެ. މިނިސްޓަރު ވިދާޅުވީ އެއީ ފުޓުބޯޅައިގައި ރަނގަޅު ހުނަރުވެރި ކުދިން އުފެދިގެން އަންނާނެ ކަމެެއް ކަމަށެވެ.
މަޚްލޫފް ވިދާޅުވީ މުބާރާތްތަކުގައި ރާއްޖޭގެ ކޮޅަށް ގިނަ ލަނޑު ޖެހިޔަސް، މިނިސްޓަރަކަށް ހުންނަ މީހަކު އެކަމުގައި ކުރާނެ ކަމެއް ނޯންނާނެކަމަށެވެ. ރާއްޖޭގެ ފުޓުބޯޅައިގެ ހާލަތު ގޮސްފައިވާ ހިސާބާމެދު ކަންބޮޑުވެވަޑައިގަންނަވާކަމަށް މީގެ ކުރީ ޖަލްސާގައި ވެސް މަޚްލޫފް ވަނީ ފާހަގަކުރައްވާފައެވެ. މަޚްލޫފް މިއަދު ވިދާޅުވީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސާ ބައްދަލުކުރެއްވި ކަމަށެވެ. އަދި އެކަމުގައި ހުރި ކަންބޮޑުވުންތައް ބައްސާމް އަދީލް ޖަލީލާ ހިއްސާކުރެއްވި ކަމަށެވެ. އަދި ސަރުކާރުން ފުޓުބޯޅަ ކުރިއެރުވުމަށް ބޮޑު ހޭދަ ކުރަމުން އަންނަ އިރު، ޤައުމީ ޓީމުތައް ރަނގަޅަށް ތައްޔާރުކުރުމަކީ މުހިންމު ކަމެއް ކަމަށް ވިދާޅުވެފައިވާނެ ކަމަށެވެ.
