ރައީސް ޞާލިޙުގެ ޚާއްސަ މަންދޫބެއްގެ ގޮތުގައި މިނިސްޓަރު ޝާހިދު އޮމާން އަށް
މި ދަތުރުފުޅުކުރެއްވުމަށް ހަމަޖެހިފައި ވަނީ މިމަހުގެ 18 އިން 20ގެ ނިޔަލަށް
އޮމާން އަށް ޝާހިދު ކުރައްވާ ދަތުރުފުޅުގެ ތެރެއިން
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ ޚާއްސަ މަންދޫބެއްގެ ގޮތުގައި ފޮރިން މިނިސްޓަރު އަބްދުﷲ ޝާހިދު އޮމާން އަށް ވަޑައިގަންނަވައިފިއެވެ.
އަންގާރަ ދުވަހު އެމަނިކުފާނު ކުރެއްވި ޓްވީޓެއްގައި އެމަނިކުފާނު ވަނީ އޮމާންގެ މުސްކަޓް އަށް ވަޑައިގެންނެވިކަން ފާހަގަކުރައްވާފައެވެ. އޮމާންގައި ނަންގަވާފައިވާ ފޮޓޯއަކާ އެކު ކުރެއްވި އެ ޓްވީޓުގައި އޮމާން އާއި ރާއްޖެ އައި ދެ ގައުމުގެ ދެމެދުގައި އޮތް ޚާރިޖީ ގުޅުންތަކާ މެދު މަޝްވަރާ ކުރެއްވުމަށް ރައީސުލްޖުމްހޫރިއްޔާގެ ހާއްސަ މަންދޫބެއްގެ ގޮތުގައި އޮމާންއަށް ވަޑައިގަތުމަކީ ލިބިވަޑައިގަތް ފަޚުރެއް ކަމަށް އެމަނިކުފާނު ވިދާޅުވިއެވެ. މި ދަތުރުގެ ތެރެއިން ރާއްޖެ އާއި އޮމާންގެ ގުޅުން އެކި ދާއިރާއަކުން އިތުރަށް ބަދަހިކުރުމަށް އާ ދޮރުތައް ހުޅުވިގެން ދާނެ ކަމަށް ޤަބޫލުކުރައްވާ ކަމަށް ވެސް މިނިސްޓަރު ޝާހިދު ވިދާޅުވިއެވެ.
މިނިސްޓަރު ޝާހިދު އޮމާން އަށް ވަޑައިގަތުމުން އެމަނިކުފާނަށް އޮމާން އިން މަރުޚަބާ ދަންނަވާފައި ވަނީ އޮމާންގެ ޗީފް އޮފް ޕްރޮޓޮކޯލް ޚާލިދު އަލްޖަރާދީއެވެ.
ފޮރިން މިނިސްޓްރީ އިން ބުނީ މި ދަތުރުފުޅުކުރެއްވުމަށް ހަމަޖެހިފައި ވަނީ މިމަހުގެ 18 އިން 20ގެ ނިޔަލަށް ކަމަށެވެ. މި ދަތުރުފުޅުގެ ތެރެއިން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ ފަރާތުން އޮމާންގެ ރަސްގެފާނު ހައިތަމް ބިން ތާރިގު އަށް ޚާއްސަ ސިޓީ އެއް އެރުވުމަށް ވަނީ ހަމަޖެހިފައެވެ. އަދި ގުޅުން ހުރި ދާއިރާތަކުން މަޝްވަރާކުރުމާއި، ދެ ގައުމުގެ ގުޅުން ބަދަހިކުރެވިދާނެ ދާއިރާތަކާ މެދު މަޝްވަރާކުރުމުގެ އިތުރުން ގުޅުން ހުރި ބައިނަލްއަޤުވާމީ މައުޟޫތަކާ މެދު މަޝްވަރާކުރުމަށް ވަނީ ހަމަޖެހިފައެވެ.
މީގެ އިތުރުން އޮމާންގެ ފޮރިން މިނިސްޓަރު ސައްޔިދު ބަދުރް އަލް ބުސައިދީ އާއި ބައްދަލުކުރައްވުމާއި، އޮމާންގެ ހެރިޓޭޖް އަދި ޓުއަރިޒަމް މިނިސްޓަރު ސަލީމް ބިން މުހައްމަދު އަލް މަޙްރޫގީ އާއި ބައްދަލުކުރައްވުމާއި، އޮމާންގެ އިންވެސްޓްމެންޓް އޮތޯރިޓީ އާއި ބައްދަލުކުރައްވާ ފަތުރުވެރިކަމުގެ ދާއިރާގައި އިންވެސްޓްކުރުމަށް ހުރި ފުރުސަތުތަކާ މެދު މަޝްވަރާކުރުމަށް ވަނީ ހަމަޖެހިފައެވެ.
