ވޯލްޑް ކަޕަށް ރިޗާލިސަން ފިޓްވާނެ- ކޮންޓޭ

ޓޮޓެންހަމްގެ ބްރެޒިލް ފޯވާޑް ރިޗާލިސަންއަށް ލިބުނު އަނިޔާ ސީރިއަސް ނޫންކަމަށާއި, ވޯލްޑް ކަޕަށް ފިޓްވާނެކަމަށް ޓޮޓެންހަމްގެ ކޯޗު އެންޓޯނިއޯ ކޮންޓޭ ބުނެފިއެވެ.

ރިޗާލިސަންއަށް އަނިޔާވީ ޕްރިމިއަރ ލީގުގައި އާދިއްތަ ދިވަހު އެވަޓަން އަތުން މޮޅުވި މެޗުގައެވެ. އަނިޔާވެ 52 ވަނަ މިނެޓުގައި އޭނާ ބަދަލުކުރުމުން ވޯލްޑް ކަޕްގައި ނުކުޅެވިދާނެކަމަށް ބެލެވުނެވެ އެހެންނަމަވެސް ސްކޭންތަކަށްފަހު ކޮންޓޭ ބުނީ ސީރިއަސް ނޫންކަމަށާއި, ވޯލްޑްކަޕަށް ފިޓްވާނެކަމަށެވެ. ކޮންޓޭ ބުނީ ވޯލްޑް ކަޕްގެ އިތުރުން ރިޗާލިސަންއަށް ޓޮޓެންހަމްއަށް ކުޅެވޭނެކަމަށް އުއްމީދުކުރާކަމަށެވެ. 25 އަހަރުގެ ފޯވާޑް ހުރީ ރަނގަޅު ފޯމެއްގައެވެ.

ރިޗާލިސަން ބުނީ އަނިޔާގެ ސަބަބުން ވޯލްޑްކަޕްގެ ބިރު އޮތްކަމަށާއި, އެކަމަކު ދެހަފްތާ ފަހުން އެނބުރި އާދެވޭނެކަމަށް އުއްމީދުކުރާކަމަށެވެ. ބްރެޒިލުން ވޯލްޑް ކަޕް ސްކޮޑް އިއުލާން ކުރާނީ ނޮވެމްބަރު ފެށުމުންނެވެ. ވޯލްޑްކަޕްގައި ބްރެޒިލް ކުޅޭ ފުރަތަމަ މެޗުގައި ނޮވެމްބަރު 24 ވަނަ ދުވަހު ވާދަކުރާނީ ސާބިއާއާއެވެ.