ޓުޗެލް އާއި ކޮންޓޭގެ އަމަލަކީ އަދަބާ ޚިލާފު އަމަލެއް
އެފްއޭ އިން ބުނީ ޓުޗެލް އާއި ކޮންޓޭގެ އަމަލަކީ އެފްއޭ ޤަވާއިދުގެ އީތްރީއާ ޚިލާފު ކަމެއް ކަމަށް
ޓުޗެލް އާއި ކޮންޓޭގެ ހަމަނުޖެހުމުގެ ތެރެއިން
ޗެލްސީގެ ކޯޗު ތޯމަސް ޓުޗެލް އާއި ޓޮޓެންހަމްގެ ކޯޗު އެންޓޯނިއޯ ކޮންޓޭގެ އަމަލަކީ އަދަބާ ޚިލާފު އަމަލެއް ކަމަށް ފުޓުބޯޅަ އެސޯސިއޭޝަން (އެފްއޭ) އިން ބުނެފިއެވެ.
ޕްރިމިއަރ ލީގުގައި ޗެލްސީގެ ދަނޑުގައި ޓޮޓެންހަމާ ދެކޮށް ކުޅުނު މެޗަށްފަހު ސަލާމް ކުރުމުގެ ތެރޭގައި ޓުޗެލް އާއި ކޮންޓޭއާ ދެމެދު ވަނީ އަރާރުމެއް ހިނގާފައެވެ. އެ އަރާރުމުގެ ތެރެއިން ދެ ކޯޗު ދުރުކުރީ ދެ ޓީމުގެ ކުޅުންތެރިންނާއި އޮފިޝަލުންނެވެ. އެކަމުގެ ސަބަބުން ރެފްރީ ވަނީ ދެ ކޯޗުންނަށް ވެސް ރަތް ކާޑު ދައްކާފައެވެ.
އެފްއޭ އިން ބުނީ ޓުޗެލް އާއި ކޮންޓޭގެ އަމަލަކީ އެފްއޭ ޤަވާއިދުގެ އީތްރީއާ ޚިލާފު ކަމެއް ކަމަށެވެ. މީގެ އިތުރުން އެފްއޭ އިން ބުނީ މެޗަށްފަހު ދެ ކޯޗުންގެ ފަރާތުން ވެސް ފެނުނީ ބަލައިގަނެވޭނެ ފަދަ އަމަލެއް ނޫން ކަމަށެވެ. އެހެންކަމުން އެކަމަށް ޖަވާބުދާރީ ވުމަށް އެފްއޭ އިން ވަނީ ދެ ކޯޗުންނަށް ފުރުސަތު ދީފައެވެ. އެކަމާ ގުޅޭ ގޮތުން ޖަވާބުދާރީވުމަށް ދީފައިވާ މުއްދަތަކީ އޮގަސްޓު މަހުގެ 18 ވާ ބުރާސްފަތި ދުވަހާ ހަމައަށެވެ.
މެޗުގެ ތެރެއިން ވެސް ވަނީ އަރާރުމެއް ހިނގާފައެވެ. އެކަމުގެ ތެރެއިން އެންމެ ފުރަތަމަ ރެފްރީ ދެ ކޯޗުންނަށް ދެއްކީ ރީނދޫ ކާޑެވެ. މެޗަށްފަހު ހިނގި ކަންތަކަށް ދެ ވަނަ ރީނދޫ ކާޑާއެކު ވަނީ ރަތް ކާޑު ދައްކާފައެވެ.
